Mũnabii kũrũithia Jehoshafatu
1 Na rĩĩrĩ, Jehoshafatu mũthamaki wa Juda agĩcooka mũciĩ gwake Jerusalemu na thaayũ.
2 Naake mũnabii Jehu mũrũ wa Hanani agĩthiĩ kũmũtũnga na amuona akĩmũũria atĩrĩ, “Anga nĩwagĩrĩirwo nĩgũteithia andũ arĩa aaganu mathũũrĩĩte MWATHANI. Ũndũ ũcio wĩkĩĩte ndũkeneetie MWATHANI o na haniini.
3 No rĩĩrĩ, ti maũndũ moothe wĩkaga makoragwo marĩ mooru. Nĩwehereetie mĩhianano yothe ya ngai ĩrĩa ĩĩtagwo Ashera ĩrĩa andũ mathaathayagia na nĩũrũmĩrĩire MWATHANI na ngoro yaku.”
Jehoshafatu kwagĩria maũndũ
4 Naake mũthamaki Jehoshafatu agĩgĩtũũra Jerusalemu na akoimagaraga kaingĩ kũrora andũ aake kuuma Beerisheba o nginya bũrũri ũrĩa ũrĩ irĩma wa Efiraimu na mwena wa rũgongo. Eekaga ũguo nĩguo amaringĩrĩrie gũcookerera MWATHANI Ngai wa maithe maao.
5 Naake akĩiga atuithania kũu matũũrainĩ moothe ma Juda marĩa mairigĩirwo na thingo cia hinya.
6 Agĩcooka akĩmaatha atĩrĩ, “Menyagĩrĩraai mũno rĩrĩa mũgũtuithania maciira, nĩ ũndũ nĩ MWATHANI ũmũheete ũhoti wa gwĩka ũguo, naake e hamwe na inyuĩ mũgĩtuithania maciira.
7 Tondũ ũcio, tũũraai mũtĩĩĩte MWATHANI, na mwĩkage ũguo mwĩmenyereire wega. Menyaai wega atĩ, MWATHANI Ngai witũ ndoogomagia ciira, o na kana akarora gĩthiithi kĩa mũndũ, o na kana akaamũkĩra mahaki.”
8 Na rĩĩrĩ, Jehoshafatu agĩthuura Alawii, na athĩnjĩri Ngai amwe, o na anene amwe a nyũmba cia andũ a Isiraeli kũu Jerusalemu, akĩmatua a gũtuagĩra arĩa moinĩĩte watho wa MWATHANI, na a gũtuithanagia maciira gatagatĩ ka atũũri a Jerusalemu.
9 Naake akĩmataara akĩmeera atĩrĩ, “Maũndũ maanyu moothe rĩrĩa mũkũmeeka-rĩ, meekageei mũkĩheaga MWATHANI gĩtĩĩo. Ningĩ-rĩ, ikaragaai mũrĩ ehokeku maũndũinĩ maanyu moothe.
10 Na rĩĩrĩ, hĩndĩ o yothe aariũ a ithe wanyu makoima itũũrainĩ rĩmwe rĩanyu mamũreeheere ciira wa kũũragana, kana ciira o wothe wa kuuna watho kana maathani, no nginya mumataarage na kinyi nĩ geetha makahota gwĩciirĩrĩra wega nĩguo matikaahĩtagĩrie MWATHANI. Mũngĩkaaga gwĩkaga ũguo, inyuĩ eene na andũ aanyu nĩmũkaaherithio ni MWATHANI na maraakara.
11 Na rĩĩrĩ, Amaria Mũthĩnjĩri Ngai Ũrĩa Mũnene nĩ we ũrĩkoragwo arĩ mũtuithania maũndũinĩ moothe ma kĩndini. Naake Zebadia mũrũ wa Ishumaeli, mũnene wa Juda, nĩ we ũrĩtuithanagia maciira moothe ma kĩndũire. Nao Alawii nĩ o marĩonaga atĩ matua moothe nĩmaahingio na njĩra ĩrĩa yagĩrĩire. Mataaro macio moothe mũmeekage mũũmĩrĩirie, naake MWATHANI aroikara na arĩa eega.”