Hezekia kwagĩria mũhoere
1 Na rĩĩrĩ, magongoona macio moothe mathira, andũ oothe a Isiraeli, magĩthiĩ matũũrainĩ moothe ma Juda, makiunanga itugĩ ciothe cia kũhooywo, magĩtemenga mĩhianano ya ngai ĩrĩa yetagwo Ashera, na magĩtharia igongoona ciothe o na kũndũ gũtũũgĩru kũrĩa gwathaathayagĩrio mĩhianano. Ũguo noguo meekire kũndũ kũrĩa kũngĩ bũrũriinĩ wa Juda, o na ng’ongoinĩ cia Benjamini, Efiraimu o na Manase. Thuutha wa kũruta wĩra ũcio wothe, o mũndũ akĩinũka gwake mũciĩ.
2 Naake mũthamaki Hezekia akĩbanga wĩra wa athĩnjĩri Ngai na wa Alawii wega rĩngĩ nĩ geetha o mũndũ amenye wĩra wake kĩũmbe. Mawĩra marĩa maamegiĩ nĩ: magongoona ma njino, na magongoona ma thaayũ, gũtongoragia gũthaathaiya Hekaarũinĩ, na kũinagĩra MWATHANI na kũmũcookagĩria ngaatho.
3 Na rĩĩrĩ, mũthamaki nĩ we warutaga kuuma ndũũruinĩ ciake, nyamũ cia kũrutwo magongoona ma njino ma rũũciinĩ na ma hwaĩinĩ. O na ningĩ cia kũrutwo magongoona hĩndĩ ya Thabatũ, karũũgamo ka mweri, na thigũkũinĩ iria ingĩ ciothe ta ũrĩa watho wa MWATHANI wathanĩĩte.
4 O na Hezekia nĩathire andũ kũu Jerusalemu marutage mĩhothi ĩrĩa athĩnjĩri Ngai na Alawii maagĩrĩirwo nĩkũhũthagĩra nĩguo mahotage gũtabarĩra watho wa MWATHANI na njĩra njega.
5 Na rĩĩrĩ, hĩndĩ ĩrĩa Watho ũcio wamenyithanirio, andũ a Isiraeli makĩreehe maruta ma magetha ma mbere ma ngano, ndibei, maguta ma mĩtamaiyũ, ũũkĩ, na indo cia mĩthemba yothe kuuma mĩgũndainĩ yao, o na makĩreehe na ũingĩ gĩcunjĩ kĩao gĩa ikũmi kĩa indo ciao ciothe iria maarĩ nacio.
6 Na rĩĩrĩ, andũ oothe arĩa maatũũraga matũũrainĩ ma Juda makĩreehe gĩcunjĩ kĩao gĩa ikũmi kĩa ng’ombe ciao o na ng’ondu, na makĩreehe iheeo nyingĩ, magĩciamũrĩra MWATHANI Ngai wao.
7 Indo icio ciambĩrĩirie kũreehwo mweri wa gatatũ, naguo mweri wa mũgwanja nĩciarĩĩkĩĩtie kũreehwo ciothe.
8 Na rĩĩrĩ, hĩndĩ ĩrĩa mũthamaki Hezekia na njaama ciake moonire ũrĩa indo icio ciaiganaga, makĩgooca MWATHANI o na makĩgaathĩrĩria andũ aake a Isiraeli.
9 Hĩndĩ ĩyo mũthamaki akĩhooya athĩnjĩri Ngai na Alawii ũhoro wa indo icio.
10 Naake Azaria, Mũthĩnjĩri Ngai Ũrĩa Mũnene, wa rũciaro rwa Zadoku akĩmũcookeria atĩrĩ, “Kuuma rĩrĩa andũ maambĩrĩirie kũreehe indo ciao gũũkũ Hekaarũinĩ, tũrĩaga na tũgatigia. Tũgĩĩte na indo icio ciothe tondũ MWATHANI nĩaraathimĩĩte andũ aake.”
11 Naake Hezekia agĩathana gũthondekwo thitoo kũu Hekaarũinĩ, nacio igĩthondekwo.
12 Nacio indo ciothe o na mĩhothi ya gĩcunjĩ gĩa ikũmi o na indo iria ciamũrĩĩtwo, ikĩreehwo ikĩiguo kuo. Naake Mũlawii wetagwo Konania agĩtuuo mũrori wa indo icio, naake Shimei mũrũ wa nyina agĩtuuo wa kũmũteithagĩrĩria.
13 Nao magĩthurĩrwo Alawii angĩ ikũmi marutage wĩra rungu rwao. Nao maarĩ Jehieli, Azazia, Nahathu, Asaheli, Jerimothu, Jozabadu, Elieli, Isimakia Mahathu, na Benania. Ũguo nĩguo mũthamaki Hezekia na Azaria Mũthĩnjĩri Ngai Ũrĩa Mũnene maathanire gwĩkwo.
14 Naake Mũlawii wetagwo Kore mũrũ wa Imuna, ũrĩa warangagĩra kĩhingo kĩa na mwena wa irathĩro wa Hekaarũ, nĩ we wamũkagĩra indo iria ciarutagĩrwo Ngai, na no we wacigayanagia.
15 Na rĩĩrĩ, matũũrainĩ marĩa mangĩ kũrĩa athĩnjĩri Ngai maatũũraga nĩkwarĩ na Alawii angĩ a kũmũteithagĩrĩria kũgayania indo icio. Nao maarĩ Edeni, Miniamini, Jeshua, Shemaia, Amaria, na Zekania. Maamũteithagĩrĩria kũgaĩra Alawii arĩa angĩ indo icio mamaiganainie kũringana na mawĩra maao,
16 no ti kũringana na mbarĩ ciao. O mũndũ mũrũme wothe wakinyĩĩtie mĩaka mĩrongo ĩtatũna agakĩria watoonyaga kũruta wĩra Hekaarũinĩ, aagayagĩrwo igai rĩake kũringana na wĩra ũrĩa aarutaga.
17 Athĩnjĩri Ngai maagayanĩĩtio mawĩra maao kũringana na mbarĩ, nao Alawii arĩa maakinyĩĩtie mĩaka mĩrongo ĩĩrĩ kana magakĩria, makagayanio na ikundi.
18 Andũ acio oothe maatarirwo hamwe na atumia aao, ciana ciao, o na andũ a mbarĩ ciao, tondũ maagĩrĩirwo nĩgũkoragwo mehaarĩirie hingo ciothe kũrutaga mawĩra marĩa maamũrĩirwo.
19 Naho ha ũhoro wa athĩnjĩri Ngai arĩa maatũũraga matũũrainĩ marĩa maagaĩrwo njiarwa cia Harũni, o na arĩa matũũraga ithakainĩ cia ũrĩithio wao, nĩgwathuuragwo athuuri arĩa maagayagĩra arũme oothe a mĩciĩ ya athĩnjĩri Ngai irio. Ningĩ no o maagayagĩra o na andũ a mbarĩ cia Alawii iria ciandĩkĩĩtwo mũtaratarainĩ.
20 Naake Hezekia agĩĩka maũndũ marĩa moonagwo marĩ meega, na marĩa maakenagia MWATHANI Ngai wake bũrũriinĩ wothe wa Juda.
21 Namo maũndũ marĩa eekire nĩ ũndũ wa Hekaarũ, na marĩa eekire ũhoroinĩ wa gũtĩĩa watho, aameekire erutĩire na ngoro yake yothe na eheyanĩĩte kũrĩ Ngai wake. Kwoguo akĩgaacĩra o kũgaacĩra.