Josia gũkũngũĩra thigũkũ Bathaka
1 Naake mũthamaki Josia agĩkũngũĩra thigũkũ ya Bathaka kũu Jerusalemu, nĩguo atĩithie MWATHANI. Magĩgĩthĩnja ndũrũme cia Bathaka mũthenya wa ikũmi na ĩna wa mweri wa mbere.
2 Naake akĩonia athĩnjĩri Ngai mawĩra marĩa maagĩrĩirwo nĩkũrutaga kũu Hekaarũinĩ na akĩmoomĩrĩria mamarutage na kinyi.
3 Nao Alawii arĩa maamũrĩirwo MWATHANI, arĩa maarutaga Aisiraeli maũndũ, akĩmataara akĩmeera ũũ, “Thiĩi mũige Ithandũkũ rĩa Kĩrĩĩkanĩro rĩrĩa rĩamũre Hekaarũinĩ ĩrĩa mũthamaki Solomoni, mũrũ wa Daudi, aakire. Rĩtikaanacooke gũtũũra rĩkuuagwo kuuma handũ hamwe gũthiĩ harĩa hangĩ. Rĩu tungatĩraai MWATHANI Ngai wanyu, o na andũ aake a Isiraeli.
4 Ikaraai kũu Hekaarũinĩ kũringana na mbarĩ na mawĩra marĩa mũthamaki Daudi, na mũũrũwe Solomoni maamũgaĩire mũrutage.
5 Na mũikarage mwĩhaarĩirie nĩ geetha amwe aanyu makahotaga gũteithia mũciĩ o mũciĩ ya andũ a Isiraeli.
6 Nĩ inyuĩ mũgũthĩnja ndũrũme na mbũri cia Bathaka. Rĩu mwĩtheriei mũthirwo nĩ thaahu, na mũhaarĩrie magongoona, nĩ geetha nao aariũ a ithe wanyu marũmĩrĩre ũrutani wa MWATHANI ũrĩa aaheanire ahũthĩrĩĩte.”
7 Naake mũthamaki Josia akĩheana kuuma ndũũruinĩ ciake ng’ondu, tũgondu, na tũũri ngiri mĩrongo ĩtatũ, (30,000), na ndeegwa ngiri ithatũ (3,000) irutwo igongoona rĩa Bathaka.
8 Nacio njaama cia mũthamaki Josia ikĩruta maruta maacio ma kũrutwo Bathaka nĩ andũ na athĩnjĩri Ngai. Naake Hilikia Mũthĩnjĩri Ngai Ũrĩa Mũnene, Zakaria, na Jehieli, arĩa maarĩ anene a Hekaarũ, makĩhe athĩnjĩri Ngai ndũrũme na mbũri ngiri igĩrĩ na magana matandatũ (2,600) na ndeegwa magana matatũ (300) cia kũrutwo igongoona rĩa Bathaka.
9 Nao atongoria a Alawii: Konania, Shemaia na Nethaneli mũrũ wa nyina na Hashabia, Jeieli, na Jozabadu makĩhe Alawii ndũrũme na tũũri ngiri ithaano (5,000) na ndeegwa magana mataano (500) nĩguo marute magongoona ma Bathaka.
10 Na rĩĩrĩ, igongoona rĩothe rĩa Bathaka rĩarĩĩkia kũhaarĩrio, athĩnjĩri Ngai na Alawii magĩikara o andũ handũ haao o ta ũrĩa mũthamaki aathanĩĩte.
11 Nacio ndũrũme na mbũri ciarĩĩkia kũng’eo, Alawii magĩcithĩnja, nao athĩnjĩri Ngai makĩoya thakame makĩmĩminjaminjĩria kĩgongoona.
12 Nao makĩgayania nyama icio cia magongoona ma njino kũringana na o mũciĩ nĩguo ĩrutwo magongoona o ta ũrĩa gwathanĩĩtwo Wathoinĩ wa Musa.
13 Nao Alawii makĩhĩĩhia nyama cia Bathaka na mwaki o ta ũrĩa gwathanĩĩtwo. Nacio nyama iria nyamũre magĩciruga na nyũngũ na iteng’ũ, na ngĩo cia igera, magĩcigayanĩria andũ o narua.
14 Marĩĩkia gwĩka ũguo wothe, nao Alawii magĩthondeka nyama ciao o na cia athĩnjĩri Ngai, njiarwa cia Harũni, nĩ gũkorwo athĩnjĩri Ngai maarĩ na mĩhang’o ya kũruta magongoona ma njino, o na maguta, o nginya ũtukũ.
15 Nao aini a nyĩmbo Alawii a mbarĩ ya Asafu maikaire o handũ haao o ta ũrĩa gwathanĩĩtwo nĩ mũthamaki Daudi, Asafu, Hemani, na Jeduthuni mũnabii wa mũthamaki. O nao arangĩri a mĩrango ya Hekaarũ matiigana gũtiganĩria mawĩra maao, nĩ gũkorwo Alawii acio aariũ a ithe wao nĩmaamathondekeire indo ciao cia Bathaka.
16 Ũguo nĩguo Bathaka yakũngũĩirwo na MWATHANI akĩrutĩrwo magongoona ma njino kĩgongoonainĩ mũthenya ũcio, o ta ũrĩa mũthamaki Josia aathanĩĩte.
17 Nao andũ a Isiraeli arĩa maarĩ ho, magĩkũngũĩra thigũkũ ĩyo ya Bathaka o na ya Mĩgate Ĩrĩa Ĩtarĩ Mĩĩkĩre Ndaawa ya Kũimbia handũ ha mĩthenya mũgwanja.
18 Na rĩĩrĩ, kuuma matukũinĩ ma mũnabii Samũeli, gũtiakoreetwo gũkũngũĩirwo Bathaka ĩngĩ ta ĩyo. O na ningĩ gũtiakoreetwo na mũthamaki ũngĩ mbere ĩyo kũu Isiraeli wakũngũĩire Bathaka ta ĩyo yakũngĩirwo nĩ mũthamaki Josia na athĩnjĩri Ngai, Alawii, na andũ a Juda, a Aisiraeli, o na atũũri a Jerusalemu.
19 Nayo thigũkũ ĩyo ya Bathaka yakũngũĩirwo mwaka wa ikũmi na ĩnaana wa ũthamaki wa Josia.
Mũthia wa wathani wa Josia
20 Na rĩĩrĩ, Josia aarĩkia kũruta wĩra ũcio wothe wa kũhaarĩria Hekaarũ, Neko mũthamaki wa Misiri, akiumagara arĩ na mbũtũ ya ita ciake nĩguo akahũũrane na itũũra rĩa Karikemishi hakuhĩ na rũũĩ rwa Farati. Naake Josia akiumagara nĩguo akahũũrane naake.
21 No rĩĩrĩ, Neko akĩrekeria Josia arekio makamũũrie atĩrĩ, “Twĩ na ũhoro ũrĩkũ nawe, wee mũthamaki wa Juda? Ũũmũũthĩ njũkĩĩte kũrũa na thũ ciakwa no ti nawe, na MWATHANI anjathĩĩte njĩke ũndũ ũcio narua. Tiga kũngirĩrĩria njĩke ũguo tondũ MWATHANI arĩ hamwe na niĩ. Ũngĩĩka ũguo MWATHANI nĩegũkũniina.”
22 No rĩĩrĩ, Josia nĩehaarĩirie kũrũa. Naake akĩrega gwathĩkĩra ciugo cia Ngai iria aarĩirio nĩ mũthamaki Neko. Kwoguo akĩĩgarũra nĩguo ndakaamenyeke, akiumagara akahũũrane na mũthamaki Neko gĩtuambainĩ kĩa Megido.
23 Na rĩĩrĩ, marĩ kũu mbaarainĩ, mũthamaki Josia akĩrathwo na mĩguĩ nĩ ita cia Misiri. Naake akĩĩra ndungata ciake atĩrĩ, “Njeheriai gũũkũ mbaarainĩ tondũ nĩndatiihio mũno.”
24 Nacio ndungata ciake ikĩmũruta ngaariinĩ yake ya mbarathi ikĩmũhaicia ĩngĩ yake yarĩ hau, ikĩmũtwara Jerusalemu. Naake agĩkuĩra kũu Jerusalemu, agĩthikwo mbĩĩrĩrainĩ cia athamaki. Nao andũ a Juda oothe na a Jerusalemu makĩmũrĩrĩra mũno.
25 Naake mũnabii Jeremia agĩtunga rwĩmbo rwa gũcakaĩra mũthamaki Josia. Naguo gũgĩtuĩka mũtugo atĩ rwĩmbo rũu rũtũire rũinagwo Isiraeli nĩ arũme na atumia hĩndĩ ciothe rĩrĩa megũcakaĩra mũthamaki Josia. Rwĩmbo rũu rũinagwo nyĩmboinĩ cia macakaya.
26 Na rĩĩrĩ, maũndũ marĩa moothe Josia eekire, kwĩrutĩra MWATHANI gwake o na gwathĩkĩra Watho,
27 o na maũndũ moothe marĩa eekire kuuma kĩambĩrĩria kinya kĩrĩĩkĩrĩro, moothe maandĩkĩĩtwo Ibukuinĩ rĩa Hisitoria ya Athamaki a Isiraeli na Juda.