Ũtugi wa MWATHANI harĩ andũ aake
1 Goocaai MWATHANI!
Cookeriai MWATHANI ngaatho tondũ nĩ mwega;
wendo wake nĩ wa nginya tene tene!
2 Nũũ ũngĩhota kũgana ciĩko cia hinya iria eekĩĩte,
kana amũgooce ta ũrĩa kwagĩrĩire?
3 Kũraathimwo-rĩ, nĩ arĩa marũmagĩrĩra kĩhooto,
o arĩa meekaga wega hingo ciothe.
4 Ndirikanaga, MWATHANI, rĩrĩa ũratuga andũ aaku;
honokagia rĩrĩa ũramahonokia,
5 nĩguo nyonage ũgaacĩru wa andũ aaku aamũre,
na ngenanagĩre na rũũrĩrĩ rwaku,
na ndĩrahage hamwe na arĩa marĩ aaku kĩũmbe.
6 Ithuĩ-rĩ, twĩhĩĩtie o ta ũrĩa maithe maitũ meehirie;
nĩtũhĩtĩĩtie na tũgeeka ũũru.
7 Rĩrĩa maithe maitũ maarĩ Misiri,
matiigana kũmenya ciĩko cia Ngai cia magegania;
nĩmaariganĩirwo nĩ maita marĩa anameenda,
makĩremera Ũrĩa Ũrĩ Igũrũ Mũno
marĩ rũteereinĩ rwa Iria Ituune.
8 No nĩamahonokirie, o ta ũrĩa eeranĩire,
nĩguo oonanie ũrĩa hinya wake wĩ mũnene.
9 Aathire Iria Ituune rĩũme, narĩo rĩkĩũma;
akĩringĩria andũ aake kũndũ kuomĩĩte biũ.
10 Na njĩra ĩyo akĩmahonokia kuuma harĩ arĩa maamathũire;
akĩmakũũra kuuma harĩ thũ ciao.
11 Thũ icio ciao ikĩhumbanĩrio nĩ maaĩ;
hatirĩ o na ĩmwe yatigarire.
12 Hĩndĩ ĩyo andũ aake magĩĩtĩkia ciĩranĩro ciake,
makĩmũinĩra makĩmũgoocaga.
13 No rĩĩrĩ, makĩriganĩrwo o narua nĩ ũrĩa eekĩĩte,
matiigana gweterera Ngai amataare.
14 Makĩnyiitwo nĩ thuti nene ya irio marĩ kũu werũinĩ,
na makĩgeria Ngai marĩ o kuo.
15 Naake MWATHANI akĩmahe kĩrĩa maamũũrĩĩtie,
agĩcooka akĩmarekeria mũrimũ mũũru.
16 Na rĩĩrĩ, maambĩĩte hema ciao o kũu werũinĩ,
andũ amwe nĩmaiguĩrĩire Musa ũiru,
o na makĩigua ũiru nĩ ũndũ wa Harũni
ndungata theru ya MWATHANI.
17 Hĩndĩ ĩyo thĩ ĩgĩkĩemũka, ĩkĩmeria Dathani,
na ĩgĩthikania Abiramu na mũciĩ wake.
18 Thuutha wa ũguo mwaki ũgĩtuthũkĩra arũmĩrĩri aao,
ũgĩcina andũ acio aaganu.
19 Rĩrĩa maarĩ Sinai, magĩthondeka mũhianano wa thahabu wa gateegwa,
makĩũthaathaiya.
20 Magĩgĩkũũrania Ngai
na mũhianano wa ndeegwa ĩrĩa ĩrĩaga nyeki.
21 Makĩriganĩrwo nĩ Ngai ũrĩa wamahonokirie,
o ũrĩa wekire ciĩko cia hinya Misiri,
22 o na makĩriganĩrwo nĩ maũndũ ma magegania
marĩa eekĩire bũrũriinĩ ũcio,
na ciĩko cia kũguoyohania iria eekĩire Iriainĩ Ituune.
23 Ngai nĩangĩaniinire andũ aake,
tiga aathaithirwo nĩ Musa,
ndungata yake ĩrĩa aathuurĩĩte,
ndakaae kũmaniina na maraakara.
24 Magĩcooka makĩnyarara bũrũri ũrĩa mwega
tondũ matiigana gwĩtĩkia ũrĩa Ngai aameerĩire.
25 Makĩng’oong’oora marĩ hemainĩ ciao,
na makĩaga gwathĩkĩra MWATHANI.
26 Tondũ ũcio akĩoya guoko na igũrũ akĩĩhĩta atĩ nĩegũtũma makuire kũu werũinĩ,
27 na ahurunje njiarwa ciao ndũũrĩrĩinĩ,
igakuĩre mabũrũriinĩ mageni.
28 Ningĩ Aisiraeli marĩ Peori
nĩmaatuĩkire arũmĩrĩri a ngai ĩrĩa yetagwo Baali,
na makĩrĩa magongoona marĩa maarutagĩrwo ngai ĩtaarĩ muoyo.
29 Ciĩko ciao nĩciatũmire MWATHANI araakare,
naake akĩmareehithĩria mũrimũ mũũru.
30 No rĩĩrĩ, Finehasi akĩrũũgama na igũrũ
akĩherithia arĩa maarĩ na mahĩtia,
naguo mũthiro ũgĩthira.
31 Ũndũ ũcio mwega eekire nĩũtũire ũririkanagwo nĩ andũ,
na ũgũtũũra ũririkanagwo nginya tene na tene.
32 Aisiraeli nĩmaaraakaririe MWATHANI marĩ ithimainĩ cia Meriba,
naake Musa agĩtoonya thĩĩnainĩ nĩ ũndũ wao,
33 tondũ nĩmaamũiguithirie ũũru mũno ngoro,
akĩaria arĩ na maraakara.
34 Matiigana kũniina ndũũrĩrĩ,
ta ũrĩa MWATHANI aamaathĩĩte meeke;
35 handũ ha gwĩka ũguo-rĩ, maatumire ndũgũ nacio,
na makĩĩruta mĩtugo yacio.
36 Magĩcooka makĩambĩrĩria gũthaathaiya mĩhianano ya ndũũrĩrĩ icio,
naguo ũndũ ũcio ũkĩmareehithĩria mũthiro.
37 Makĩruta aariũ na aarĩ aao magongoona kũrĩ ngoma,
38 magĩgĩita thakame ĩtaarĩ na mahĩtia,
ya aariũ na aarĩ aao,
o arĩa maarutaga marĩ magongoona kũrĩ mĩhianano ya Kanaani
naguo bũrũri ũgĩthaahio nĩ thakame ĩyo.
39 O nao eene makĩnyiitwo nĩ thaahu nĩ ũndũ wa ciĩko icio ciao,
na makĩaga gũtuĩka ehokeku harĩ Ngai.
40 Tondũ ũcio MWATHANI akĩraakarĩra andũ aake,
na akĩnyiitwo nĩ mang’ũrĩ nĩ ũndũ wao.
41 Akĩmaneana mookoinĩ ma ndũũrĩrĩ,
magĩgĩathwo nĩ thũ ciao.
42 Makĩhinyĩrĩrio nĩ thũ ciao,
na makĩigwo rungu rwa watho wacio.
43 MWATHANI nĩahonokirie andũ aake maita maingĩ,
no o makĩĩrutanĩria o kũmũremera,
na kwoguo magĩgĩthiĩ na mbere kũrikĩra meehiainĩ maao.
44 O na kũrĩ ũguo, MWATHANI nĩamaiguire rĩrĩa maakaire,
na akĩona mĩnyamaaro ĩrĩa maarĩ nayo.
45 Nĩ ũndũ wao-rĩ, akĩririkana kĩrĩĩkanĩro gĩake,
na akĩgarũra meciiria maake
nĩ ũndũ wa ũrĩa arĩ muuma andũ.
46 Agĩgĩtũma maiguĩrwo tha
nĩ arĩa oothe maamahinyagĩrĩria.
47 Tũhonokie, MWATHANI Ngai witũ,
na ũtũcookanĩrĩrie kuuma ndũũrĩrĩinĩ,
nĩguo tũgũcookagĩrie ngaatho
na tũkumagie rĩĩtwa rĩaku rĩtheru.
48 Goocaai MWATHANI, Ngai wa Isiraeli;
mũgooceei rĩu nginya tene na tene!
Andũ oothe ugaai atĩrĩ, “Ameni!”
Goocaai MWATHANI!