Aasiria kũmakia Jerusalemu
1 Mwakainĩ wa ikũmi na ĩna wa wathani wa mũthamaki Hezekia, Senakeribu mũthamaki wa Aasiria nĩatharĩkĩire matũũra moothe ma Juda marĩa maarĩ mairigĩre na thingo cia hinya akĩmanyiita.
2 Agĩcooka agĩtũma mũnjaama ũmwe wake ũrĩa warĩ mũnene kuuma Lakishi athiĩ Jerusalemu arĩ na thigari nyingĩ mũno, akaringĩrĩrie mũthamaki Hezekia eneane kũrĩ Aasiria. Mũnjaama ũcio aathiĩ eehandire arũũgamĩĩte o barabarainĩ ĩrĩa yatwaranĩĩte na mũtaro ũrĩa warutaga maaĩ kariainĩ ka mwena wa na rũgongo hakuhĩ na harĩa andũ maathambagĩria nguo.
3 Arĩ hau-rĩ, Eliakimu mũrũ wa Hilikia, ũrĩa warĩ mũnene wa nyũmba ya mũthamaki, na Shebina ũrĩa warĩ karani ka mũthamaki na Joa mũrũ wa Asabu, ũrĩa warĩ mũmenyereri wa rekondi ciothe, nĩmaathiire harĩ we.
4 Mũnjaama ũcio Mũasiria agĩkĩmeera atĩrĩ, “Thiĩi mwĩre mũthamaki Hezekia ũũ: Mũthamaki wa Aasiria arooria atĩrĩ ‘Nĩ kĩĩ kĩu wĩhokeete ũguo?
5 Ũgwĩciiria mĩgambo iiki no ĩĩtiirie wara na hinya wa thigari? Nũũ wĩhokeete agũteithĩrĩrie kũremera Aasiria?
6 No gũkorwo wĩhokeete Misiri. Misiri no ta karũthanju kagondoku mũndũ etirimĩĩtie nako; gatheecaga mũndũ ũcio guoko gagatũrĩkania. Ũguo nĩguo mũthamaki wa Misiri ahaana harĩ mũndũ o wothe ũmwĩhokeete.’ ”
7 Mũnjaama ũcio agĩthiĩ na mbere kuuga atĩrĩ, “Mwahota kũnjĩĩra atĩ mwĩhokeete MWATHANI Ngai wanyu. Githĩ Hezekia ndamomorire kũndũ gũtũũgĩru gwa gũthaathaĩria na akĩmomora igongoona cia MWATHANI? Githĩ ndeerire andũ a Juda na a Jerusalemu atĩ marĩthaathayagĩria o kĩgongoonainĩ kĩmwe?
8 Rĩu-rĩ, rĩĩtwainĩ rĩa mũthamaki wa Aasiria, ngwĩhĩta atĩrĩ, ‘No ndĩmũhe mbarathi cia mbaara ngiri igĩrĩ (2,000), mũngĩhota kuona thigari ciigana ũguo cia gũthiĩ icihaicĩĩte!’
9 Mũngĩkĩhota atĩa kũhũndũra o na mũtongoria ũrĩa mũniini wa thigari cia Aasiria, o rĩrĩa mwĩhokeete Amisiri mamũtũmĩre ngaari cia mbarathi o na thigari cia mbarathi?
10 Ningĩ-rĩ, mũgwĩciiria njũkĩĩte gũtharĩkĩra na kũhũũra bũrũri wanyu itarĩ na ũteithio wa MWATHANI? Nĩ MWATHANI we mwene wanjĩĩrire ndĩũtharĩkĩre na ndĩwanange.”
11 Eliakimu, Shebina, na Joa maigua ũguo makĩĩra mũnjaama ũcio atĩrĩ, “Twagũthaitha twarĩrie na Kĩaramaika. Ithuĩ nĩtũũĩ rũthiomi rũu na nĩtũkũigua. Tiga gũtwarĩria na Kĩhibirania andũ aarĩa maikaire rũthingo igũrũ makĩiguaga.”
12 No mũnjaama ũcio agĩcookia atĩrĩ, “Mũgwĩciiria mũnene wakwa andũmire njũke njĩĩre o inyuĩ inyuiki na mũthamaki wanyu maũndũ macio? Githĩ ndandũmire o na kũrĩ andũ acio maikaire rũthingo igũrũ arĩa makaarĩa mai maao na manyue mathugumo maao o ta ũrĩa inyuĩ mũgeeka?”
13 Agĩkĩrũũgama akĩĩhandahanda, akĩaria na rũthiomi rwa Kĩhibirania aanĩrĩire akiuga atĩrĩ, “Taiguai ũrĩa mũthamaki wa Aasiria ekuuga! Mũthamaki wa Aasiria aroiga atĩrĩ,
14 ‘Tigaai gwĩtĩkĩra mũthamaki Hezekia amũheenie; ndangĩhota kũmũhonokia.
15 Tigaai kũreka Hezekia amũringĩrĩrie mwĩhoke MWATHANI, atĩ nĩakũmũhonokia hatarĩ nganja, na atĩ itũũra rĩanyu rĩtikũneanwo mookoinĩ ma Aasiria.
16 Tigaai gũthikĩrĩria Hezekia! Mũthamaki wa Aasiria aramwatha muumĩre itũũrainĩ na mwĩneane. Inyuothe nĩmũgwĩtĩkĩrio o mũndũ arĩage thabibũ cia mĩthabibũ yake na ngũyũ cia mĩkũyũ yake. Nĩmũgwĩtĩkĩrio mũnyuage maaĩ kuuma ithimainĩ cianyu,
17 o nginya rĩrĩa ngooka ndĩmũtware mũgatũũre bũrũri ũngĩ ũhaana o ta ũyũ wanyu. Kũu nĩgũgaakorwo mĩgũnda ya mĩthabibũ na ya ngano, na nĩmũkaahotaga gũthondeka ndibei o na mĩgate.
18 Wĩmenyerereei Hezekia ndakaamũheenererie akĩmwĩra atĩ MWATHANI nĩekũmũhonokia. Nĩ ngai cia ndũũrĩrĩ ingĩ irĩkũ ciahonokirie bũrũri wacio kuuma harĩ mũthamaki wa Aasiria?
19 Ngai cia Hamathu na Aripadi rĩu irĩ ha? Ngai cia Sefarivaimu-rĩ, irĩ kũ? Nĩciahonokirie Samaria?
20 Atĩrĩĩrĩ, kũrĩ ngai o na ĩmwe ya mabũrũri macio yahonokirie bũrũri wacio kuuma mookoinĩ maakwa? Mũgwĩciiria atĩ MWATHANI no ahonokie Jerusalemu kuuma mookoinĩ maakwa?’ ”
21 Andũ acio no gũkira maakirire na matiamũtumũkire o ta ũrĩa mũthamaki Hezekia aameerĩĩte.
22 Thuutha ũcio Eliakimu, Shebina, na Joa magĩtembũranga nguo ciao nĩ kĩeha, magĩthiĩ magĩkinyĩria mũthamaki maũndũ marĩa mũnjaama ũcio wa Aasiria oigĩĩte.