Month: March 2020

Maũndũ marĩa meekĩkire Kadeshi

1 Na rĩĩrĩ, mweriinĩ wa mbere, mũingĩ wothe wa Isiraeli ũgĩkinya werũinĩ wa Zini, ũkĩamba hema Kadeshi, na wĩ kũu Miriamu agĩkua na agĩthikwo o kuo.

2 Kũu maambire hema gũtiarĩ maaĩ, na kwoguo andũ makĩũngana harĩ Musa na Harũni

3 makĩambĩrĩria gũteta makiugaga atĩrĩ, “Nĩ kaba tũngĩakuanĩire na Aisiraeli arĩa angĩ mbere ya Hema ya MWATHANI.

4 Mwatũreehire gũũkũ werũinĩ ũyũ tũkuĩre kuo na mahiũ maitũ?

5 Nĩkĩ gĩatũmire mũtũrute Misiri mũtũreehe kũndũ gũũkũ gwa thĩĩna? Gũũkũ ti kũndũ kũngĩkũra kĩndũ ta ngano, ngũyũ, thabibũ, kana makongomanga, o na gũtirĩ maaĩ ma kũnyua!”

6 Musa na Harũni magĩkĩehera harĩ andũ magĩthiĩ makĩrũũgama mũromoinĩ wa Hema, magĩcooka makĩinamĩrĩra makĩhuutithia moothiũ maao thĩ. Naguo riiri wa MWATHANI ũkĩmoimĩrĩra.

7 Naake MWATHANI akĩĩra Musa atĩrĩ,

8 “Oya mũthĩĩgi ũrĩa ũrĩ hau mbere ya Ithandũkũ rĩa Kĩrĩĩkanĩro, ũcooke mwĩ na Harũni mũcookanĩrĩrie andũ hamwe. Ũrĩ hau mbere ya andũ oothe wĩre ihiga riume maaĩ. Na njĩra ĩyo ũkĩrute maaĩ ihigainĩ, andũ manyue o hamwe na mahiũ maao.”

9 Naake Musa agĩgĩthiĩ, akĩoya mũthĩĩgi o ta ũguo aathĩĩtwo nĩ MWATHANI.

10 Musa na Harũni magĩcookanĩrĩria mũingĩ wothe hau hakuhĩ na ihiga, naake Musa akĩwĩra atĩrĩ, “Tathikĩrĩriai inyuĩ akararia aya! Atĩrĩĩrĩ, no mũhaka tũmũrutĩre maaĩ kuuma ihigainĩ rĩĩrĩ?”

11 Musa agĩcooka akĩoya mũthĩĩgi ũrĩa na igũrũ akĩgũtha ihiga naguo maita meerĩ, narĩo rĩkiuma maaĩ maingĩ, nao andũ na mahiũ moothe makĩnyua.

12 No rĩĩrĩ, MWATHANI akĩĩra Musa na Harũni atĩrĩ, “Tondũ mũtiinanjĩtĩkia nĩguo muonie andũ a Isiraeli atĩ ndĩ mũtheru, mũtikũmatongoria nginya bũrũriinĩ ũrĩa ndameerĩire.”

13 Ũndũ ũcio wekĩkĩire Meriba,kũrĩa andũ a Isiraeli maatetirie MWATHANI, naake akĩmoonia atĩ nĩ mũtheru.

Mũthamaki wa Edomu kũgiria Aisiraeli mahĩtũke

14 Na rĩĩrĩ, me Kadeshi Musa agĩtũma anjaama kũrĩ mũthamaki wa Edomu makamwĩre atĩrĩ, “Ĩno nĩ ndũmĩrĩri kuuma kũrĩ andũ aanyu a mũhĩrĩga wa Isiraeli. Atĩrĩĩrĩ, wee nĩũũĩ ũrĩa tũnyamaarĩkĩĩte,

15 na ũrĩa maithe maitũ maathiire Misiri, na tũgĩgĩtũũra kuo ihinda iraaya. Andũ a Misiri nĩmaatwĩkire maũndũ mooru o ta ũria meekire maithe maitũ.

16 Nĩtwagĩkaĩire MWATHANI atũteithie, naake agĩtũigua. Agĩgĩtũtũmĩra mũraika ũrĩa watũtongoririe, agĩtũruta Misiri. Rĩu twĩ gũũkũ Kadeshi, itũũra rĩrĩa rĩrĩ mũhakainĩ wa bũrũri waku.

17 Ndagũthaitha twĩtĩkĩrie tũtuĩkanĩrie bũrũri waku. Tũtigũkĩrĩra mĩgũndainĩ kana kũrĩa kwĩ mĩthabibũ, o na tũtikũnyua maaĩ ma ithima cianyu. Tũkũgerera barabara nenenginya tũkoima bũrũri waku.”

18 No andũ a Edomu makĩmũcookeria atĩrĩ, “Mũtigũtuĩkanĩria bũrũri witũ! Wona mwageria gwĩka ũguo, tũkũmũũkĩrĩra tũmũhũũre.”

19 Nao Aisiraeli makĩmeera atĩrĩ, “Ithuĩ tũkũgerera o ro barabara ĩrĩa nene tu. Ithuĩ kana mahiũ maitũ tũngĩnyua maaĩ maanyu, nĩtũkũmũrĩha. Kĩrĩa ithuĩ tũrenda no gũtuĩkania.”

20 Nao andũ a Edomu makĩmacookeria atĩrĩ, “Mũtigũtuĩkanĩria gũũkũ.” Makiumagara na ita rĩa andũ aingĩ na rĩ na hinya gũtharĩkĩra andũ a Isiraeli.

21 Tondũ andũ a Edomu nĩmaagiririe Aisiraeli matuĩkanĩrie bũrũri wao, Aisiraeli magĩkĩgerera njĩra ĩngĩ.

Harũni gũkua

22 Na rĩĩrĩ, mũingĩ wothe wa Isiraeli nĩwoimire Kadeshi, ũgĩthiĩ ũgĩkinya kĩrĩmainĩ kĩa Hori,

23 mũhakainĩ wa Edomu. Me kũu MWATHANI akĩarĩria Musa na Harũni akĩmeera atĩrĩ,

24 “Harũni ndegũtoonya bũrũri ũrĩa ndeerĩire Aisiraeli, nĩegũkua tondũ inyuerĩ nĩmwangararirie mwĩ Meriba.

25 Oya Harũni na mũũrũwe Eleazaru wambate nao kĩrĩma igũrũ kĩa Hori.

26 Mwĩ kũu kĩrĩmainĩ ũrute Harũni nguo ciake cia ũthĩnjĩri Ngai, ũciĩkĩre mũũrũwe Eleazaru. Harũni egũkuĩra kũu kĩrĩmainĩ.”

27 Musa agĩgĩĩka ũguo eerirwo nĩ MWATHANI; magĩkĩambata kĩrĩma kĩa Hori, andũ oothe mameroreire.

28 Musa akĩruta Harũni nguo ciake cia ũthĩnjĩri Ngai, agĩciĩkĩra Eleazaru. Harũni agĩgĩkuĩra kũu kĩrĩma igũrũ, naake Musa na Eleazaru makĩharũrũka.

29 Nao andũ oothe a Isiraeli maamenya atĩ Harũni nĩ mũkuũ, makĩmũcakaĩra matukũ mĩrongo ĩtatũ.

Aisiraeli kũhoota Akanaani

1 Na rĩĩrĩ, Mũkanaani warĩ Mũthamaki wa Aradi, watũũraga werũinĩ wĩ mwena wa na kĩanda, aigua atĩ Aisiraeli maagereire njĩra ya Atharimu, akĩmookĩrĩra agĩtaha amwe aao.

2 Nao Aisiraeli makĩĩhĩta makĩĩra MWATHANI atĩrĩ, “Watũhotithia kũhoota andũ a matũũra maya, tũkũmaananga biũo hamwe na andũ oothe a mo, tuonanie nĩtwakwamũrĩra.”

3 MWATHANI agĩkĩmaigua, akĩmahotithia kũhoota andũ a Kanaani. Aisiraeli magĩkĩmananga biũ o hamwe na matũũra maao. Nĩkĩo handũ hau haatuirwo Horoma.

Nyoka ya gĩcango

4 Andũ a Isiraeli magĩgĩkiuma kĩrĩmainĩ kĩa Hori magĩthiĩ na njĩra ĩrĩa yerekeire Iria Ituune, nĩguo mathiũrũrũke bũrũri wa Edomu. No rĩĩrĩ andũ nĩmaaremirwo nĩgũkirĩrĩria,

5 magĩkĩambĩrĩria gũtetia Ngai hamwe na Musa makiuga atĩrĩ, “Nĩ kĩĩ gĩatũmire mũtũrute bũrũri wa Misiri, mũtũreehe tũkuĩre gũũkũ werũinĩ kũndũ gũtarĩ irio kana maaĩ? Tũtingĩhota kũũmĩrĩria kũrĩa rĩngĩ irio ici itarĩ kĩene.”

6 Na rĩĩrĩ, MWATHANI agĩkĩreehithĩria andũ acio nyoka i na thumu na andũ aingĩ a Isiraeli makĩrũmwo nĩcio magĩkua.

7 Andũ magĩgĩũka kũrĩ Musa makĩmwĩra atĩrĩ, “Nĩtũreehirie rĩrĩa tũratetirie MWATHANI o hamwe nawe. Gĩthaithe MWATHANI eeherie nyoka ici. Kwoguo Musa akĩmathaithanĩrĩra.”

8 Naake MWATHANI akĩĩra Musa athondeke nyoka ĩkũhenia amĩĩkĩre gĩtugĩ igũrũ, nĩ geetha mũndũ o wothe warũmwo nĩ nyoka, amĩcũũthĩrĩria akahona.

9 Musa agĩgĩthondeka nyoka ya gĩcango, akĩmĩĩkĩra gĩtugĩ igũrũ, naake mũndũ o wothe warũmwo nĩ nyoka, acũũthĩrĩria nyoka ĩyo ya gĩcango akahona.

Aisiraeli kuuma kĩrĩmainĩ kĩa Hori na gũthiĩ gĩtuambainĩ kĩa Amoabi

10 Na rĩĩrĩ, andũ a Isiraeli nĩmaathiire na mbere, makinya Obothu magĩaka kambĩ.

11 Moima kũu Obothu magĩthiĩ na mbere, makinya maganjo ma Abarimu, marĩa marĩ werũinĩ ũrĩa wĩ mwena wa irathĩro wa bũrũri wa Amoabi, magĩaka kambĩ kuo.

12 Moima kũu magĩthiĩ nginya gĩtuambainĩ gĩa Zeredi magĩaka kambĩ kuo.

13 Kuuma kũu magĩthiĩ magĩaka kambĩ mwena wa na rũgongo wa rũũĩ rwa Arinoni, rũrĩa rũrĩ werũinĩ ũrĩa ũthiĩte nginya mũhakainĩ wa Aamori. (Rũũĩ rwa Arinoni nĩruo rwarĩ mũhaka wa Amoabi na Aamori.)

14 Nĩkĩo kwandĩkĩĩtwo Ibukuinĩ rĩa Mbaara cia MWATHANI atĩrĩ, “… itũũra rĩa Wahebu thĩinĩ wa Sufa, na ituamba; rũũĩ rwa Arinoni,

15 na kĩharũrũka kĩa ituamba iria ithiĩte kuuma itũũra rĩa Ari, nginya mũhakainĩ wa Amoabi.”

16 Moima kũu magĩthiĩ nginya kũndũ gwetagwo Ithima, kũrĩa MWATHANI eerire Musa atĩrĩ, “Cookanĩrĩria andũ hamwe ndĩmahe maaĩ.”

17 Hĩndĩ ĩyo Aisiraeli makĩina rwĩmbo rũũrũ:

“Wee gĩthima gĩĩkĩ therũka;

na nĩtũkũmakũngũĩra na rwĩmbo.

18 Gĩthima kĩrĩa kĩenjirwo nĩ anene

o hamwe na atongoria a andũ,

magĩgĩthikũria na mĩthĩĩgi yao

na thanju ciao.”

Magĩgĩthiĩ na mbere makiuma kũu werũinĩ magĩkinya Matana;

19 moima kũu magĩthiĩ nginya Nahalieli moima Nahalieli magĩthiĩ Bamothi,

20 na moima Bamothi magĩthiĩ gĩtuamba kĩrĩa kĩrĩ bũrũri wa Amoabi mũhuro wa kĩrĩma kĩa Pisiga, kĩrĩa kĩroreete werũinĩ.

Aisiraeli kũhoota mũthamaki Sihoni na mũthamaki Ogu

21 Na rĩĩrĩ, andũ a Isiraeli magĩgĩtũma anjaama kũrĩ mũthamaki Sihoni wa Aamori makamwĩre atĩrĩ;

22 “Twĩtĩkĩrie tũtuĩkanĩrie bũrũriinĩ waku; tũtikũgerera mĩgũndainĩ kana kũrĩa kwĩ mĩthabibũ, o na tũtikũnyua maaĩ ithimainĩ cianyu tũkũgerera o barabarainĩ ĩrĩa neneo nginya tũkoima bũrũriinĩ waku.”

23 No mũthamaki Sihoni akĩgiria andũ a Isiraeli kũhĩtũkĩra bũrũriinĩ wake. Agĩgĩcookanĩrĩria thigari ciake ciothe agĩcitwara Jahazu werũinĩ, agĩũkĩrĩra Aisiraeli.

24 No rĩĩrĩ, Aisiraeli makĩũragĩra Aamori aingĩ mbaarainĩ ĩyo, na makĩmatuunya bũrũri wao kuuma rũũĩ rwa Arinoni mwena wa na rũgongo nginya rũũĩ rwa Jaboku, ũguo nĩkuuga nginya kwa Aamoni, amu mũhaka wa Aamoni warĩ mũrangĩre na hinya mũno.

25 Kwoguo andũ a Isiraeli magĩkĩĩnyiitĩra matũũra moothe ma Aamori, o nginya itũũra rĩa Heshiboni na matũũra marĩa marĩthiũrũkiĩirie, magĩtũũra kuo.

26 Heshiboni nĩrĩo rĩarĩ itũũra rĩrĩa inene rĩa mũthamaki Sihoni wa Aamori, ũrĩa warũĩte na mũthamaki wa mbere wa Moabi akĩmũtuunya bũrũri wake wothe o nginya rũũĩinĩ rwa Arinoni.

27 Kwoguo nĩkĩo aini mainaga atĩrĩ,

“Ũkaai Heshiboni, itũũra inene rĩa mũthamaki Sihoni!

Itũũra rĩu rĩa Sihoni nĩrĩakwo rĩngĩ na rĩĩkĩrwo hinya.

28 Amu thigari cia Sihoni nĩcioimire itũũra rĩa Heshiboni ihaana ta mwaki,

ikĩananga Ari itũũra rĩa Moabi

na ikĩharaganiairĩma cia Arinoni ya na rũgongo.

29 Kaĩ inyuĩ Amoabi mwĩ thĩĩna-ĩ!

Inyuĩ arĩa mũthaathayagia Kemoshu nĩmũniinĩĩtwo!

Ngai ĩyo yanyu nĩtũmĩĩte arũme moorĩre kwene,

Nao atumia matahwo nĩ Sihoni, mũthamaki wa Aamori.

30 Njiarwa ciao nĩiniinĩĩtwo,

kuuma itũũra rĩa Heshiboni nginya Diboni,

kuuma itũũra rĩa Nashimu nginya Nofa gũkuhĩ na Medeba.”

31 Kwoguo Aisiraeli magĩtũũra bũrũri wa Aamori.

32 Naake Musa agĩtũma andũ magathigaane itũũra rĩa Jazeri. Aisiraeli magĩthiĩ makĩrĩnyiita o hamwe na matũũra marĩa marĩthiũrũkĩirie, na makĩingata Aamori arĩa maatũũraga kuo.

33 Na rĩĩrĩ, Aisiraeli makĩhũndũka magĩthiĩ na barabara ya gũthiĩ Bashani, naake mũthamaki Ogu wa Bashani akiumagara na mbũtũ ciake akamatharĩkĩre me Edirei.

34 No MWATHANI akĩĩra Musa atĩrĩ, “Ndũkaae kũmwĩtigĩra, nĩngũkũhotithia kũmũhoota, o hamwe na andũ aake oothe, na bũrũri wake. Ũkũmwĩka o ta ũrĩa wekire Sihoni mũthamaki wa Aamori, ũrĩa wathanaga Heshiboni.”

35 Kwoguo Aisiraeli makĩũraga Ogu, aariũ aake, na andũ aake oothe; gũtirĩ mũndũ maatigaririe, magĩcooka magĩtũũra bũrũri ũcio wake.

Mũthamaki wa Moabi gũtũmanĩra Balaamu

1 Andũ a Isiraeli magĩthiĩ na mbere, na maakinya gĩtuambainĩ kĩa Moabi, mwena wa irathĩro wa rũũĩ rwa Jorodani, mũrĩmo ũũrĩa ũngĩ wa Jeriko, magĩaka kambĩ kuo.

2 Na rĩĩrĩ, Balaki mũrũ wa Ziporu, mũthamaki wa Amoabi, aigua ũrĩa Aisiraeli meekĩĩte Aamori, na ũrĩa Aisiraeli maarĩ aingĩ,

3 we na andũ aake oothe magĩĩtigĩra.

4 Amoabi makĩĩra atongoria a Amidiani atĩrĩ, “Mũingĩ ũyũ nĩũkũniina indo ciothe iria itũthiũrũrũkĩirie, o ta ũrĩa ndeegwa ĩniinaga nyeki mĩgũndainĩ.” Kwoguo mũthamaki Balaki mũrũ wa Ziporu

5 agĩtũma anjaama kũrĩ Balaamu mũrũ wa Beori, ũrĩa hĩndĩ ĩyo warĩ Pethoru, gũkuhĩ na rũũĩ rwa Farati bũrũriinĩ wa Amawi, akeerwo atĩrĩ, “Ngwenda gũkũmenyithia atĩ harĩ rũũrĩrĩ rũgima ruumĩĩte bũrũri wa Misiri; nĩ andũ aingĩ mũno, na marenda gũtũtũũnya bũrũri witũ.

6 Ũka ũnumĩre andũ aya amu marĩ na hinya kũngĩra. Ũngĩĩka ũguo, hiihi ndahota kũmahoota na ndĩkĩmarutũrũre kuuma bũrũriinĩ. Niĩ nĩnjũũĩ atĩ mũndũ ũrĩa waraathima, nĩaraathimagwo, na ũrĩa waruma, nĩanyiitagwo nĩ kĩrumi.”

7 Kwoguo atongoria a Amoabi na a Amidiani magĩkuua mbeeca cia kũmũhe nĩguo arumane, magĩthiĩ kwĩ Balaamu makĩmũhe ndũmĩrĩri ya Balaki.

8 Balaamu akĩmeera atĩrĩ, “Raaraai gũũkũ, na rũũciũ nĩngaamwĩra ũrĩa MWATHANI ekũnjĩĩra.” Nao anene acio a Amoabi magĩkĩraarania na Balaamu.

9 Na rĩĩrĩ, ũtukũ ũcio Ngai akĩũria Balaamu atĩrĩ, “Andũ aya maraarĩrĩire gwaku nĩ a?”

10 Naake Balaamu akĩmũcookeria atĩrĩ, “Balaki mũrũ wa Ziporu, mũthamaki wa Amoabi, nĩwe ũmatũmĩĩte mooke maanjĩĩre

11 atĩ harĩ andũ mookĩĩte kuuma bũrũri wa Misiri, na nĩ aingĩ mũno. Arenda ngamarume nĩguo amahũũre amaingate kũu.”

12 Naake Ngai akĩĩra Balaamu atĩrĩ, “Ndũgaathiĩ nao; ndũkaarume andũ a Isiraeli amu nĩaraathime.”

13 Kwarooka gũkĩa Balaamu agĩthiĩ kũrĩ anene acio maatũmĩĩtwo nĩ Balaki akĩmeera atĩrĩ, “Cookaai bũrũriinĩ wanyu amu MWATHANI nĩangirĩĩtie tũthiĩ na inyuĩ.”

14 Nao magĩgĩcooka kwao makĩĩra Balaki atĩ Balaamu nĩarega gũũka nao.

15 O rĩngĩ Balaki agĩtũma atongoria aingĩ makĩria, na maheetwo gĩtĩĩo gũkĩra a mbere.

16 Magĩgĩthiĩ kũrĩ Balaamu makĩmwĩra atĩrĩ, “ Balaki arakwĩra ũũ: Ndagũthaitha hatikaagĩe ũndũ o na ũrĩkũ wa gũkũgirĩrĩria gũũka kũrĩ niĩ!

17 Nĩngũkũhe kĩheeo kĩnene, na njĩke ũndũ o wothe ũrĩa ũkũnjĩĩra. Ndagũthaitha ũka ũnumĩre andũ aya!”

18 No Balaamu agĩcookia atĩrĩ, “O na Balaki angĩĩhe mũciĩ wake ũiyũrĩĩte betha na thahabu, ndingĩregana na uuge wa MWATHANI Ngai wakwa, ndingĩwongerera kana ndĩũnyiihanyiihie.

19 No rĩĩrĩ, ndamũthaitha raarĩrĩraai gũũkũ o na inyuĩ, nĩguo menye kana harĩ ũndũ ũngĩ MWATHANI ekũnjĩĩra.”

20 Naake Ngai akĩĩra Balaamu ũtukũ atĩrĩ, “Angĩkorwo andũ aya nĩ we maiyĩrĩĩte, ũkĩra ũthiĩ nao, no rĩĩrĩ, wĩke o ro ũrĩa ngũkwĩra.”

21 Kwarooka gũkĩa, Balaamu akĩhaarĩria ndigiri yake, agĩthiĩ na atongoria a Amoabi.

Balaamu na ndigiri yake

22 No rĩĩrĩ, Ngai akĩraakara nĩ ũndũ wa Balaamu gũthiĩ. Na rĩĩrĩ, rĩrĩa aathiaga ahaicĩĩte ndigiri atwaranĩĩte na ndungata ciake igĩrĩ, mũraika wa MWATHANI akĩrũũgama njĩrainĩ amũrigĩrĩrie gũthiĩ.

23 Rĩrĩa ndigiri yonire mũraika wa MWATHANI arũũgamĩĩte njĩrainĩ anyiitĩĩte rũhiũ rwa njora, ĩkiuma njĩrainĩ ĩgĩtoonya mũgũnda. Naake Balaamu akĩhũũra ndigiri akĩmĩcookia njĩrainĩ.

24 Ningĩ mũraika akĩrũũgama harĩa njĩra yacekeheire gatagatĩinĩ ka mĩgũnda ĩĩrĩ ya mĩthabibũ, na o mũgũnda warĩ na rũthingo rwa mahiga.

25 Rĩrĩa ndigiri yonire mũraika ĩkĩĩgiritania na rũthingo, ĩkĩhinyanĩrĩria kũgũrũ kwa Balaamu na rũthingo. Naake Balaamu akĩmĩgũtha rĩngĩ.

26 Ningĩ mũraika wa MWATHANI agĩthiĩ mbere, akĩrũũgama handũ haceke hataarĩ handũ hangĩhĩtũkĩrwo.

27 Hĩndĩ ĩyo, ndigiri yona mũraika wa MWATHANI, ĩgĩkoma. Balaamu agĩkĩraakara, akĩmĩgũtha na rũthanju rwake.

28 Naake MWATHANI akĩhe ndigiri ũhoti wa kwaria, nayo ĩkĩũria Balaamu atĩrĩ, “Nĩ atĩa ngwĩkĩĩte? Wangũtha maita macio matatũ nĩkĩ?”

29 Naake Balaamu akĩmĩcookeria atĩrĩ, “Nĩ tondũ nĩũnduĩte kĩrimũ! Korwo nyuma na rũhiũ rwa njora, no gũkũũraga ingĩakũũraga.”

30 Nayo ndigiri ĩkĩmũcookeria atĩrĩ, “Githĩ to niĩ ndigiri ĩrĩa ĩtũire ĩgũkuuaga ũtũũro waku wothe? Ndĩndagwĩka ũũ?”

Naake Balaamu agĩcookia atĩrĩ, “Aaca.”

31 Hĩndĩ ĩyo MWATHANI agĩkĩhingũra Balaamu maitho, akĩona mũraika arũũgamĩĩte njĩrainĩ anyiitĩĩte rũhiũ rwake rwa njora; Balaamu agĩgĩkoma na nda.

32 Naake mũraika wa MWATHANI akĩmũũria atĩrĩ, “Wagũtha ndigiri yaku maita macio matatũ nĩkĩ? Njũkĩĩte gũkũrigĩrĩria ndũgaathiĩ, amu ndwagĩrĩirwo nĩgũthiĩ rũgendo rũũrũ.

33 Ndigiri yaku nĩĩnyonire, na yanjeherera maita macio matatũ. Korwo ndĩnanjeherera, nĩingĩkũũragĩĩte ngatiga ndigiri ĩ muoyo.”

34 Naake Balaamu agĩcookeria mũraika wa MWATHANI atĩrĩ, “Nĩnjĩhĩĩtie nĩ ũndũ ndikũũĩ atĩ ũrũũgamĩĩte njĩrainĩ ũndigĩrĩrie ndigaathiĩ; rĩu-rĩ, angĩkorwo nĩũkuona arĩ mahĩtia niĩ thiĩ, nĩngũcooka mũciĩ.”

35 Naake mũraika wa MWATHANI akĩmwĩra atĩrĩ, “Thiĩ na andũ aya, no ũkwaria o ũhoro ũrĩa ngũkwĩra wiki.” Kwoguo Balaamu agĩgĩthiĩ nao.

Balaki kwamũkĩra Balaamu

36 Na rĩĩrĩ, rĩrĩa Balaki aiguire atĩ Balaamu nĩarooka, agĩthiĩ kũmũtũnga itũũrainĩ rĩa Ari rĩrĩa rĩrĩ hakuhĩ na rũũĩ rwa Arinoni mũhakainĩ wa Moabi.

37 Balaki akĩmũũria atĩrĩ, “Ndagũtũmanĩra rĩa mbere waregire gũũka nĩkĩ? Weciiragia atĩ ndingĩhota gũkũhe iheeo cia kũigana?”

38 Naake Balaamu akĩmũcookeria atĩrĩ, “Githĩ ndiagĩũka? No ndirĩ na hinya o na haniini wa kuuga ũndũ. Ũhoro ũrĩa Ngai ekũnjĩĩra njuge, noguo ngwaria.”

39 Balaamu agĩgĩthiĩ na Balaki itũũrainĩ rĩa Huzothu,

40 kũrĩa Balaki aathĩnjire ndeegwa, mbũri na ng’ondu akĩhe Balaamu na atongoria arĩa maarĩ naake nyama imwe.

Ũrathi wa Balaamu wa mbere

41 Kwarooka gũkĩa, Balaki akĩambatia Balaamu nginya Bamothi Baali, kũrĩa Balaamu angĩahotire kuona andũ amwe a Isiraeli.

1 Balaamu agĩkĩĩra Balaki atĩrĩ, “Njakĩra igongoona mũgwanja haaha, na ũndeehere ndeegwa mũgwanja na ndũrũme mũgwanja.”

2 Naake Balaki agĩgĩĩka o ũguo eerirwo, na o kĩgongoonainĩ Balaki na Balaamu makĩruta igongoona rĩa ndeegwa ĩmwe na ndũrũme ĩmwe.

3 Hĩndĩ ĩyo Balaamu akĩĩra Balaki atĩrĩ, “Rũũgama haaha hakuhĩ na igongoona rĩaku rĩa njino, na niĩ thiĩ ngarore hiihi kana MWATHANI nĩekũndũnga, na ũrĩa wothe ekũmenyithia nĩngũkwĩra.” Agĩgĩthiĩ arĩ wiki kĩrĩma igũrũ,

4 naake Ngai akĩmũtũnga. Balaamu akĩmwĩra atĩrĩ, “Nĩnjakĩĩte igongoona mũgwanja, na o kĩgongoonainĩ ngaruta igongoona rĩa ndeegwa ĩmwe na ndũrũme ĩmwe.”

5 MWATHANI akĩĩra Balaamu ũrĩa egũthiĩ kuuga, agĩkĩmwĩra acooke kũrĩ Balaki akamũhe ndũmĩrĩri yake.

6 Agĩgĩcooka, agĩkora Balaki arũũgamĩĩte hakuhĩ na igongoona rĩake rĩa njino e hamwe na atongoria oothe a Moabi.

7 Balaamu agĩkĩratha atĩrĩ:

“Balaki mũthamaki wa Amoabi, nĩandeehithĩĩtie kuuma Siria,

irĩmainĩ cia mwena wa irathĩro.

Anjĩĩrĩĩte atĩrĩ, ‘Ũka ũnumĩre andũ a Jakubu,

ũka wĩhĩre Aisiraeli.’

8 Mũndũ ũtarumĩĩtwo nĩ Ngai-rĩ,

niĩ ingĩkĩmũruma atĩa?

Mũndũ ũteehĩirwo nĩ MWATHANI, niĩ ingĩmwĩhĩra atĩa?

9 Nĩndĩramoona ndĩ ndwaro cia mahiga igũrũ

Nĩndĩramacũũthĩrĩria ndĩ irĩma igũrũ.

Acio nĩ rũũrĩrĩ rwĩtindĩĩtie.

Nĩ rũũrĩrĩ rũũĩ atĩ nĩrũraathime gũkĩra ndũũrĩrĩ iria ingĩ.

10 Andũ a rũciaro rwa Isiraeli nĩ aingĩ o ta rũkũngũ.

Nĩ aingĩ mũno matingĩtarĩka.

Nĩndekwo ngue ta ũmwe wa andũ aya a Ngai.

Ndekwo ngue na thaayũ ta mũndũ mũthingu.”

11 Balaki agĩkĩĩra Balaamu atĩrĩ, “Nĩ atĩa ũguo wanjĩka? Ndĩrakũreehire gũũkũ ũnumĩre thũ ciakwa, no ũrĩa wee weka nĩgũciraathima waciraathima.”

12 Naake akĩmũcookeria atĩrĩ, “Niĩ no njugire o ũrĩa MWATHANI anjĩĩrĩĩte njuge.”

Ũrathi wa keerĩ wa Balaamu

13 Balaki agĩcooka akĩĩra Balaamu atĩrĩ, “Ũka tũthiĩ nawe handũ hangĩ harĩa ũngĩonera Aisiraeli amwe ũkĩmarumĩre ho.”

14 Agĩkĩmũtwara mũgũndainĩ wa Zofimu kĩrĩma igũrũ kĩa Pisiga. O na kũu agĩaka igongoona mũgwanja, na o kĩgongoonainĩ akĩruta igongoona rĩa ndeegwa ĩmwe na ndũrũme ĩmwe.

15 Naake Balaamu akĩĩra Balaki atĩrĩ, “Rũũgama haaha hakuhĩ na igongoona rĩaku rĩa njino, na niĩ thiĩ ngatũnge MWATHANI haarĩa.”

16 MWATHANI agĩgĩtũnga Balaamu, akĩmwĩra ũrĩa egũthiĩ kuuga, agĩkĩmwĩra acooke harĩ Balaki akamũhe ndũmĩrĩri yake.

17 Agĩgĩcooka harĩ Balaki, akĩmũkora o arũũgamĩĩte igongoonainĩ rĩake rĩa njino e hamwe na atongoria a Amoabi. Balaki akĩmũũria ũrĩa MWATHANI oiga.

18 Naake Balaamu akĩratha atĩrĩ:

“Balaki mũũru wa Ziporu, ũka ũigue;

thikĩrĩria ũrĩa nguuga.

19 Ngai-rĩ, ti mũndũ nĩguo aheenanie,

ti mũndũ atĩ nĩguo ericũkwo.

Ũrĩa eeranĩra nĩahingagia,

ũrĩa oiga nĩwĩkagwo.

20 Niĩ-rĩ, njathĩĩtwo ndaathimane,

na Ngai araathimana, niĩ ndingĩhota kũgarũra.

21 Ngai ndarĩ ũũru ooneete harĩ Jakubu;

kana akoona thĩĩna harĩ Isiraeli.

MWATHANI Ngai wao arĩ hamwe nao,

ũcio nĩ we moimbũraga atĩ nĩ mũthamaki wao.

22 Ngai nĩamarutĩĩte Misiri;

amarũagĩrĩra o ta ndeegwa ya gĩthaka.

23 Amu gũtirĩ ũhoro wa mĩthaiga kana wa ũragũri

ũngĩhũthĩrwo gũthũũkia andũ a Isiraeli.

Andũ mekuuga ũhoro wa Aisiraeli atĩrĩ,

‘Tarora ũrĩa Ngai eekĩĩte!’

24 Rũũrĩrĩ rwa Isiraeli rũtariĩ ta mũrũũthi;

ndũhuurũkaga ũtarĩ ũranyiita na ũkarĩa,

na ũkanyua thakame ya kĩrĩa woraga.”

25 Balaki agĩkĩĩra Balaamu atĩrĩ, “Warega kũruma andũ aya a Isiraeli, o na kũmaraathima ndũkaamaraathime!”

26 No Balaamu akĩĩra Balaki atĩrĩ, “Githĩ ndiakwĩra atĩ no mũhaka njĩke ũrĩa wothe MWATHANI anjĩĩrire?”

Ũrathi wa gatatũ wa Balaamu

27 Balaki agĩkĩĩra Balaamu atĩrĩ, “Ũka ngũtware handũ hangĩ, hiihi Ngai nĩegũgwĩtĩkĩria ũrumĩre Aisiraeli ho.”

28 Agĩkĩoya Balaamu akĩmũtwara kĩrĩma igũrũ kĩa Peori kĩrĩa kĩng’etheire werũ.

29 Balaamu akĩmwĩra atĩrĩ, “Njakĩra igongoona mũgwanja haaha na ũndeehere ndeegwa mũgwanja na ndũrũme mũgwanja.”

30 Balaki agĩgĩĩka ũrĩa eerirwo nĩ Balaamu, na agĩkĩruta o kĩgongoonainĩ ndeegwa ĩmwe na ndũrũme ĩmwe.

1 Na rĩĩrĩ, Balaamu nĩamenyeete atĩ MWATHANI eendaga araathime andũ a Isiraeli na kwoguo ndagĩthiire gũtuĩria ũhoro ta mahinda macio mangĩ ma mbere. Agĩkĩhũgũka na werũinĩ

2 agĩcũũthĩrĩria akĩona andũ a Isiraeli maambĩĩte hema kũringana na mĩhĩrĩga yao. Na rĩĩrĩ, akĩiyũrwo nĩ roho wa Ngai,

3 akĩambĩrĩria kũratha ta ũũ:

“Ndũmĩrĩri ya Balaamu mũrũ wa Beori,

ũhoro wa mũndũ ũroona wega,

4 ũraigua ũrĩa Ngai aroiga.

Ngũũrĩĩte maitho, nĩndĩroona kĩoneki,

kĩoneki kĩrĩa kiumĩĩte kũrĩ Mwene Hinya Wothe.

5 Kaĩ hema cia Aisiraeli nĩ thaka-ĩ!

6 Ihaana ta ituamba ciaraganĩĩte kũndũ kũraaya,

ta mĩgũnda ĩrĩ ndeereinĩ cia rũũĩ,

ta mĩtĩ ya thubiri ĩhandĩĩtwo nĩ MWATHANI,

kana ta mĩtĩ ya mĩtarakwa ĩrĩ hũgũrũrũinĩ cia rũũĩ.

7 Marĩkoragwo na mbura nyingĩ,

mahandage irio ciao mĩgũnda ĩrĩ na maaĩ ma kũigana.

Mũthamaki wao egũkorwo arĩ mũnene gũkĩra Agagi;

ũthamaki wake ũgũtamba kũndũ kũnene mũno.

8 Ngai nĩ we wamarutire Misiri,

amarũagĩrĩra o ta ndeegwa ya gĩthaka,

akaniina thũ ciao,

akamemenda mahĩndĩ maacio,

na agaciratha na mĩguĩ yake.

9 Rũũrĩrĩ rũu rũhaana ta mũrũũthi;

Rĩrĩa ũkomeete gũtirĩ mũndũ ũngĩthengerera kũũkĩria.

Ũrĩa wothe ũraathimaga Aisiraeli nĩarĩraathimagwo,

na ũrĩa wothe ũrumaga Aisiraeli nĩarĩrumagwo.”

10 Balaki akĩraakario mũno nĩ Balaamu, agĩkũnja ngundi akĩĩra Balaamu atĩrĩ, “Ndĩragwĩtire ũũke ũrume thũ ciakwa, no handũ ha ũguo ũciraathimĩĩte maita matatũ!

11 Rĩu inũka! Nĩndakwĩrĩire kĩheeo, no MWATHANI nĩatũma ngũime kĩheeo kĩu.”

12 Naake Balaamu agĩcookeria Balaki atĩrĩ, “Ndeerire anjaama arĩa wandũmĩire atĩ

13 o na ũngĩhe betha na thahabu ciothe iria irĩ mũciĩ gwaku ndingĩregana na uuge wa MWATHANI na ũndũ wa gwĩka wendi wakwa niĩ mwene. Niĩ ndĩriugaga o ũrĩa MWATHANI anjĩĩra njuge.”

Ũrathi wa Balaamu wa mũthia

14 Na rĩĩrĩ, Balaamu agĩkĩĩra Balaki atĩrĩ, “Rĩu nĩngũcooka kũrĩ andũ aitũ, no itaanathiĩ nĩngũkũmenyithia ũrĩa andũ a Isiraeli mageeka andũ aanyu.”

15 Agĩkĩratha atĩrĩ,

“Ndũmĩrĩri ya Balaamu mũrũ wa Beori,

ũhoro wa mũndũ ũrona wega,

16 ũraigua ũrĩa Ngai aroiga,

Na ũramũkĩra ũũgĩ ũrĩa uumaga

kũrĩ Ũrĩa Ũrĩ Igũrũ Mũno.

Ngũũrĩĩte maitho nĩndĩroona kĩoneki

kĩoneki kĩrĩa kiumĩĩte kũrĩ Mwene Hinya Wothe.

17 Nĩndĩroona matukũ marĩa magooka, na nĩndĩroona rũũrĩrĩ rwa Aisiraeli.

Mũthamaki ũtariĩ ta njata ĩkengeete nĩakoima rũciaroinĩ rũu.

Mũthĩĩgi wa ũnene nĩũkoima nyũmba ya Isiraeli,

nĩakaahoota atongoria a Amoabi

na ahũũre andũ oothe a mũhĩrĩga wa Sethu.

18 Nĩakaahoota thũ ciake iria irĩ Edomu

naguo bũrũri wao ũtuĩke wake,

o Aisiraeli magĩthiaga na mbere na ũhootani.

19 Rũũrĩrĩ rwa Isiraeli nĩrũkaamarangĩrĩria,

na rũniinũkie andũ arĩa magaakorwo matigarĩĩte.”

20 Ningĩ o kĩonekiinĩ gĩake Balaamu akĩona Aamaleki na akĩratha atĩrĩ,

“Aamaleki nĩ o andũ a rũũrĩrĩ rũrĩa rwarĩ hinya mũno,

no mũthiainĩ nĩrũgaathira nginya tene na tene.”

21 Kĩonekiinĩ gĩake nĩonire Akeni, agĩkĩratha atĩrĩ,

“Gĩikaro kĩrĩa ũikarĩĩte nĩkĩgitĩre,

gĩtirĩ ũgwatiinĩ;

kĩhaana o ta gĩtara kĩa nyoni kĩ handũ igũrũ rwaroinĩ rwa ihiga,

22 no inyuĩ Akeni nĩmũkaaniinwo

hĩndĩ ĩrĩa Aasiria makaamũtaha.”

23 Ningĩ Balaamu akĩratha atĩrĩ,

“Andũ aya macookanĩrĩire mwena wa na rũgongo nĩ a?

24 Andũ a gũtharĩkĩra nĩmagooka kuuma Kuporo,

nĩmakaahoota Aasiria na Eberi,

no o nao nĩmagaathira biũ.”

25 Balaamu agĩcooka akĩĩhaarĩria akĩinũka, naake Balaki agĩĩthiĩra.

Andũ a Isiraeli me Peori

1 Na rĩĩrĩ, Aisiraeli maaka kambĩ yao gĩtuambainĩ kĩa Mĩgaa, arũme a Isiraeli nĩmaambĩrĩirie gũkoma na atumia Amoabi arĩa maarĩ kũu.

2 Atumia acio nĩmaameetĩire ndĩa magongoonainĩ kũrĩa ngai ya Amoabi yathaathayagĩrio. Aisiraeli magĩgĩthiĩ makĩrĩa, na magĩthaathaiya ngai ĩyo yetagwo

3 Baali ya Peori. MWATHANI akĩraakario nĩ Aisiraeli,

4 agĩkĩĩra Musa atĩrĩ, “Oya atongoria oothe a andũ a Isiraeli ũmoorage mũthenya barigici mbere ya MWATHANI, na nĩngũgĩtiga kũraakarĩra Aisiraeli.”

5 Musa agĩkĩĩra atongoria a Aisiraeli atĩrĩ, “O mũndũ mũhĩrĩgainĩ wake nĩorage mũndũ o wothe ũrĩa ũtuĩkĩĩte wa gũthaathaiya Baali ya Peori.”

6 Na rĩĩrĩ, Mũisiraeli ũmwe nĩatwarire mũndũ wa nja Mũmidiani hemainĩ yake, Musa hamwe na andũ oothe mamwĩroreire, hĩndĩ ĩrĩa maacakayagĩra mũromoinĩ wa Hema ya gũtũnganwo.

7 Rĩrĩa Finehasi mũrũ wa Eleazaru na mũcũkũrũ wa Harũni ũrĩa mũthĩnjĩri Ngai oonire ũguo, agĩũkĩra agĩtiga andũ oothe. Akĩoya itimũ,

8 akĩrũmĩrĩra mũndũ ũcio na mũndũ wa nja ũcio nginya hemainĩ, akĩmatheeca narĩo eerĩ. Naguo mũthiro ũrĩa waniinaga Aisiraeli ũkĩniinwo.

9 No rĩĩrĩ, mũthiro nĩwakoreetwo ũũragĩĩte andũ ngiri mĩrongo ĩĩrĩ na inya (24,000).

10 Naake MWATHANI akĩĩra Musa atĩrĩ,

11 “Finehasi nĩatũmĩĩte ndige kũraakarĩra andũ a Isiraeli nĩ ũndũ wa ũguo eekire. Nĩaregire kũũmĩrĩria gũthaathaiyo kwa ngai ĩngĩ tiga niĩ, na nĩkĩo nyiitire maraakara maakwa ndaaga kũmaniina.

12 Kĩmwĩre nĩndarĩĩkanĩra naake kĩrĩĩkanĩro gĩa thaayũ.

13 We o hamwe na njiarwa ciake megũtũũra marĩ athĩnjĩri Ngai nginya tene, amu nĩaregire kũũmĩrĩria kuona ngĩigananio na ngai ingĩ, na agĩtũma andũ a Isiraeli mooherwo meehia maao.”

14 Mũisiraeli ũrĩa woragirwo na mũndũ wa nja Mũmidiani eetagwo Zimiri mũrũ wa Salu, na arĩ mũtongoria wa nyũmba ĩmwe ya mũhĩrĩga wa Simeoni.

15 Naake mũndũ wa nja Mũmidiani ũrĩa woragirwo eetagwo Kozibi mwarĩ wa Zuru, ithe aarĩ mũtongoria wa mbarĩ ĩmwe ya Midiani.

16 Naake MWATHANI akĩĩra Musa atĩrĩ,

17 “Tharĩkĩra Amidiani ũmaniine

18 nĩ ũndũ wa ũũru ũrĩa maamwĩkire rĩrĩa maamũheenirie mũrĩ Peori, o na nĩ ũndũ wa Kozibi, ũrĩa woragĩirwo Peori hĩndĩ ya mũthiro.”

Gũtarwo gwa keerĩ

1 Na rĩĩrĩ, thuutha wa mũthiro, MWATHANI akĩĩra Musa na Eleazaru mũrũ wa Harũni mũthĩnjĩri Ngai atĩrĩ,

2 “Taraai mũingĩ wothe wa Isiraeli kũringana na nyũmba cia maithe. Taraai arũme oothe arĩa marĩ na mĩaka kuuma mĩrongo ĩĩrĩ gũthiĩ na igũrũ, arĩa mangĩhota gũthiĩ mbaara.”

3-4 Nao Musa na Eleazaru magĩathĩkĩra uuge wa MWATHANI, magĩgĩĩta andũ oothe a mĩaka ĩyo hamwe. Makĩmacookanĩrĩria werũinĩ wa Moabi, mũrĩmo ũũrĩa ũngĩ wa rũũĩ rwa Jorodani kũng’ethanĩra na Jeriko.

Aya nĩ o andũ a Isiraeli arĩa moimire Misiri:

5 Mũhĩrĩga wa Reubeni (Reubeni nĩ we warĩ mũrũ wa Jakubu ũrĩa irigithaathi): mbarĩ ya Hanoku na mbarĩ ya Palu,

6 na mbarĩ ya Hezironi, na mbarĩ ya Karimi.

7 Acio nĩ o maarĩ a mũhĩrĩga wa Reubeni, na oothe maarĩ andũ ngiri mĩrongo ĩna na ithatũ, na magana mũgwanja na mĩrongo ĩtatũ. (43,730).

8 Njiarwa cia Palu ciarĩ Eliabu

9 na aariũ aake Nemueli, Dathani, na Abiramu. (Dathani na Abiramu nĩ o maathuurĩĩtwo nĩ mũingĩ. Nĩ o maakararirie Musa na Harũni na makĩnyiitanĩra na Kora na arũmĩrĩri aake kũremera MWATHANI.

10 Thĩ yathamirie kanua kaayo ĩkĩmameranĩria hamwe na Kora na arũmĩrĩri aake, nao arũme magana meerĩ na mĩrongo ĩtaano makĩniinwo nĩ mwaki, magĩtuĩka kĩmenyithia gĩa gũkaania andũ arĩa angĩ.

11 No rĩĩrĩ, aariũ a Kora matioragirwo.)

12 Mũhĩrĩga wa Simeoni: mbarĩ ya Nemueli, Jamini, Jakini

13 Zera, na ya Shaulu.

14 Andũ oothe a mbarĩ cia mũhĩrĩga wa Simeoni maarĩ ngiri mĩrongo ĩĩrĩ na igĩrĩ na magana meerĩ. (22,200)

15 Mũhĩrĩga wa Gadi: mbarĩ ya Zefoni, Hagi, Shuni,

16 Ozini, Eri,

17 Arodi, na ya Areli.

18 Andũ oothe a mbarĩ cia mũhĩrĩga wa Gadi maarĩ ngiri mĩrongo ĩna na magana mataano. (40,500)

19-21 Andũ a mũhĩrĩga wa Juda: mbarĩ ya Shela, Perezu, Zera, Hezironi, na ya Hamuli. (Aariũ eerĩ a Juda nĩ o Eri na Onani maakuĩrĩire bũrũriinĩ wa Kanaani.)

22 Andũ oothe a mbarĩ cia mũhĩrĩga wa Juda maarĩ ngiri mĩrongo mũgwanja na ithathatũ na magana mataano. (76,500)

23 Andũ a mũhĩrĩga wa Isakaru: mbarĩ ya Tola, Puva,

24 Jashubu, na ya Shimuroni.

25 Andũ oothe a mũhĩrĩga wa Isakaru maarĩ ngiri mĩrongo ĩtandatũ na inya na magana matatũ. (64,300)

26 Andũ a mũhĩrĩga wa Zebuluni: mbarĩ ya Seredi, Eloni, na ya Jahaleeli.

27 Andũ oothe a mbarĩ cia mũhĩrĩga wa Zebuluni maarĩ ngiri mĩrongo ĩtandatũ na magana mataano. (60,500)

28 Andũ a mĩhĩrĩga ya Josefu maarĩ a kuuma harĩ aariũ aake eerĩ Manase na Efiraimu.

29 Andũ a mũhĩrĩga wa Manase: mũũriũ wa Manase wetagwo Makiru ũrĩa warĩ ithe wa Gileadi. Nacio nyũmba cia Gileadi irũmanĩrĩire ta ũũ:

30 nyũmba ya Ezeri, Heleku,

31 Asirieli, Shekemu,

32 Shemida, na ya Heferi.

33 Na rĩĩrĩ, Zelofehadi mũrũ wa Heferi ndagĩire na mũũriũ tiga o airĩĩtu. Airĩĩtu acio meetagwo Mahala, Noa, Hogila, Milika, na Tiriza.

34 Andũ oothe a mbarĩ cia mũhĩrĩga wa Manase maarĩ ngiri mĩrongo ĩtaano na igĩrĩ na magana mũgwanja. (52,700)

35 Andũ a mũhĩrĩga wa Efiraimu: mbarĩ ya Shuthela, Bekeri, na ya Tahani.

36 Na rĩĩrĩ, nyũmba ya Erani yoimĩĩte harĩ mbarĩ ya Shuthela.

37 Andũ oothe a mbarĩ cia mũhĩrĩga wa Efiraimu maarĩ ngiri mĩrongo ĩtatũ na igĩrĩ na magana mataano. (32,500)

Andũ a mĩhĩrĩga ĩyo yerĩ nĩ o moimĩĩte harĩ Josefu.

38 Andũ a mũhĩrĩga wa Benjamini: mbarĩ ya Bela, Ashibeli, Ahiramu,

39 Shefufamu, na ya Hufamu.

40 Na rĩĩrĩ, nyũmba ya Aridi na ya Naamani cioimĩĩte harĩ mbarĩ ya Bela.

41 Andũ oothe a mbarĩ cia mũhĩrĩga wa Benjamini maarĩ ngiri mĩrongo ĩna na ithaano, na magana matandatũ. (45,600)

42 Andũ a mũhĩrĩga wa Dani: mbarĩ ya Shuhamu,

43 ĩrĩa yarĩ na andũ ngiri mĩrongo ĩtandatũ na inya, na magana mana. (64,400)

44 Andũ a mũhĩrĩga wa Asheri: mbarĩ ya Imuna, Ishivi na ya Beria.

45 Na rĩĩrĩ, andũ a nyũmba ya Heberi na ya Malikieli moimĩĩte harĩ mbarĩ ya Beria.

46 Asheri nĩarĩ na mwarĩ wetagwo Sera.

47 Andũ oothe a mbarĩ cia mũhĩrĩga wa Asheri maarĩ ngiri mĩrongo ĩtaano na ithatũ na magana mana. (53,400)

48 Andũ a mũhĩrĩga wa Nafutali: mbarĩ ya Jahazeeli, Guni,

49 Jezeri, na ya Shilemu.

50 Andũ oothe a mbarĩ cia mũhĩrĩga wa Nafutali maarĩ ngiri mĩrongo ĩna na ithaano na magana mana. (45,400)

51 Mũigana wa arũme arĩa maatarirwo a Isiraeli warĩ ngiri magana matandatũ na ĩmwe, na magana mũgwanja ma mĩrongo ĩtatũ (601,730)

52 Naake MWATHANI agĩkĩĩra Musa atĩrĩ,

53 “Acio nĩ o makaagaĩrwo bũrũri, maũgae kũringana na mũigana wao.

54 Mũhĩrĩga ũrĩa wĩ na andũ aingĩ ũkaaũhe igai inene, na ũrĩa ũrĩ na andũ anyiinyi ũũhe igai inyiinyi; o mũhĩrĩga ũkaaheeo igai kũringana na mũigana wa andũ aaguo.

55 No rĩĩrĩ, bũrũri ũcio ũkaagaywo na ũndũ wa gũcuuka mĩtĩ, nao makaagaya kũringana na marĩĩtwa ma mĩhĩrĩga ya maithe maao.

56 Andũ arĩa aingĩ na arĩa aniini makaagaĩrwo igai rĩao na ũndũ wa gũcuuka mĩtĩ.”

57 Naguo mũhĩrĩga wa Lawi warĩ wa mbarĩ ya Gerishoni, Kohathu na ya Merari.

58 Njiarwa ciao ciahĩmbĩirie nyũmba ya Libini, Heburoni, Mahali, Mushi, na ya Kora. Kohathu nĩ we warĩ ithe wa Amuramu.

59 Amuramu aahikirie mwarĩ wa Lawi wetagwo Jokebedi, ũrĩa waciarĩirwo Misiri. Naake nĩaciarĩire Amuramu aariũ eerĩ Harũni na Musa, na mũirĩĩtu wetagwo Miriamu.

60 Naake Harũni aarĩ ithe wa Nadabu, Abihu, Eleazaru, na Ithamaru.

61 No rĩĩrĩ, Nadabu na Abihu maakuire rĩrĩa maarutĩire MWATHANI mwaki ũtaarĩ mũtheru.

62 Arũme Alawii arĩa maarĩ na ũkũrũ wa mweri ũmwe gũthiĩ na igũrũ maarĩ ngiri mĩrongo ĩĩrĩ na ithatũ (23,000). Acio matiatarirwo hamwe na Aisiraeli acio angĩ amu matiaheirwo igai thĩinĩ wa Isiraeli.

63 Acio nĩ o andũ arĩa maatarirwo nĩ Musa na Eleazaru ũrĩa mũthĩnjĩri Ngai, na maamatarĩire werũinĩ wa Moabi mũrĩmo ũũrĩa ũngĩ wa rũũĩ rwa Jorodani kũng’ethera Jeriko.

64 Andũ arĩa maatarĩirwo werũinĩ wa Sinai nĩ Musa na Harũni mũthĩnjĩri Ngai, gũtirĩ o na ũmwe wao watigarĩĩte.

65 Amu MWATHANI nĩoigĩĩte ũhoro wao atĩrĩ, “Magaakuĩra werũinĩ.” Gũtirĩ o na ũmwe wao watigarĩĩte tiga o Kalebu mũrũ wa Jefune, na Joshua mũrũ wa Nuni.

Aarĩ a Zelofehadi

1 Na rĩĩrĩ, aarĩ a Zelofehadi mũrũ wa Heferi, ũrĩa warĩ mũrũ wa Gileadi, mũrũ wa Makiru wa Manase mũrũ wa Josefu nĩmaathiire harĩ Musa. Airĩĩtu acio meetagwo Mahala, Noa, Hogila, Milika, na Tiriza.

2 Magĩkĩrũũgama mbere ya Musa na Eleazaru mũthĩnjĩri Ngai, o na mbere ya atongoria na ya andũ oothe, hau mũromoinĩ wa Hema ya gũtũnganwo makiuga atĩrĩ,

3 “Ithe witũ aakuĩrĩire werũinĩ na ndarĩ na mũũriũ. Ndarĩ ũmwe wa arũmĩrĩri a Kora arĩa maacookanĩrĩire hamwe magĩũkĩrĩra MWATHANI. Aakuire nĩ ũndũ wa meehia maake.

4 Rĩĩtwa rĩa ithe witũ rĩgũkĩeherio harĩ andũ a nyũmba yao tondũ ndarĩ na aariũ? Nĩtũheeo igai kuuma harĩ andũ a nyũmba ya ithe witũ.”

5 Musa nĩatwarĩire MWATHANI mateta maao.

6 Naake MWATHANI akĩmwĩra atĩrĩ,

7 “Aarĩ a Zelofehadi matirĩ na mahĩtia; magaĩre igai kuuma kũrĩ andũ a nyũmba ya ithe.” Manengere igai rĩa ithe.

8 Na wĩre andũ a Isiraeli atĩrĩ, “Mũndũ angĩkua atarĩ mũũriũ, arĩgayagwo nĩ mwarĩ.

9 Angĩkorwo atarĩ na mwarĩ, arĩgayagwo nĩ aariũ a nyina.

10 Angĩkorwo atarĩ aariũ a nyina arĩgayagwo nĩ aariũ a nyina na ithe.

11 Angĩkorwo ithe ndarĩ na aariũ a nyina, igai rĩrĩnengeragwo mũndũ wao ũrĩa makuhanĩrĩirie mũno rĩtuĩke rĩake. Ũndũ ũcio nĩũtuĩke watho wa kũrũmĩrĩrwo nĩ Aisiraeli, o ta ũguo niĩ MWATHANI ngwathĩĩte.”

Joshua gũthũũrwo acooke handũ ha Musa

12 MWATHANI akĩĩra Musa atĩrĩ, “Ambata kĩrĩmainĩ gĩĩkĩ kĩa Abarimu wone bũrũri ũrĩa heete andũ a Isiraeli.

13 Wawona-rĩ, nĩũgũkua o ta mũrũ wa maitũguo Harũni,

14 amu nĩmwaregire gwĩka ũrĩa ndamwĩrire mwĩ werũinĩ wa Zini. Rĩrĩa mũingĩ wothe wanjũkĩrĩire mwĩ Meriba nĩmwaregire kũmenyithania hinya wakwa mũtheru harĩ mũingĩ ũcio.” (Meriba nĩ gĩthima gĩ Kadeshi werũinĩ wa Zini.)

15 Musa agĩkĩhooya atĩrĩ,

16 “MWATHANI Ngai, o wee kĩhumo kĩa mĩoyo, ndakũhooya thuura mũndũ ũrĩa ũngĩhota gũtuĩka mũrori wa andũ aya,

17 na ũngĩhota kũmatongoragia magĩthiĩ mbaarainĩ, nĩ geetha andũ aaku matigaakorwo matariĩ ta ng’ondu itarĩ na mũrĩithi.”

18 Naake MWATHANI akĩĩra Musa atĩrĩ, “Oya Joshua mũrũ wa Nuni, mũndũ wĩ na ũhoti, ũmũigĩrĩre mooko.

19 Mũrũũgamie mbere ya Eleazaru mũthĩnjĩri Ngai, o na mbere ya andũ oothe, ũmũtue mũtongoria wao makĩonaga.

20 Mũhe ũhoti ũmwe waku nĩ geetha mũingĩ wothe wa Isiraeli ũmwathĩkĩre.

21 Nĩarĩteithagĩrĩrio nĩ Eleazaru mũthĩnjĩri Ngai, ũrĩa ũrĩmenyaga wendi wakwa na ũndũ wa Urimu na Thumimu.Eleazaru nĩarĩtaaraga Joshua na mũingĩ wothe maũndũinĩ moothe.”

22 Musa agĩgĩĩka o ta ũrĩa aathĩĩtwo nĩ MWATHANI. Agĩkĩoya Joshua akĩmũrũũgamia mbere ya Eleazaru mũthĩnjĩri Ngai, o na mbere ya andũ oothe,

23 akĩmũigĩrĩra mooko akĩmũtua mũtongoria wao ta ũrĩa aathĩĩtwo nĩ MWATHANI.

Magongoona ma kũrutagwo hingo ciothe

1 MWATHANI akĩĩra Musa atĩrĩ,

2 “Atha andũ a Isiraeli ũmeere atĩrĩ, ‘Menyagĩrĩraai ũhoro wa kũrutagĩra MWATHANI magongoona maake ma irio, marĩa marĩ mũtararĩko ũrĩa ũmũkenagia, mahindainĩ marĩa maagĩrĩire.’

3 Magongoona ma njino marĩa marĩrutagĩra MWATHANI nĩ maya: o mũthenya tũtũrũme twĩrĩ twa mwaka ũmwe tũtarĩ na kaũũgũ.

4 Mũrĩrutaga gatũrũme kamwe rũũciinĩ, nako kau kangĩ hwaĩinĩ.

5 Mũrĩrutanagĩria o gatũrũme na igongoona rĩa mũtu kiro ĩmwe ũtukanĩĩtio na rita ĩmwe ya maguta ma mĩtamaiyũ marĩa meega mũno.

6 Rĩũ nĩrĩo igongoona rĩa njino rĩa kũrutagwo o mũthenya, rĩrĩa rĩarutĩirwo riita rĩa mbere kĩrĩmainĩ gĩa Sinai rĩrĩ igongoona rĩa njino rĩ na mũtararĩko ũrĩa ũkenagia MWATHANI.

7 O na ningĩ nĩmũrĩrutanagĩria gatũrũme ka mbere na igongoona rĩa ndibei rita ĩmwe, ĩrĩa ĩrĩitagwo kĩgongoonainĩ.

8 Naguo hwaĩinĩ mũkaruta gatũrũme kau kangĩ o ta ũrĩa mwĩkire rũũciinĩ, na mũgakarutanĩria na igongoona rĩa ndibei rita ĩmwe. O narĩo nĩ igongoona rĩa njino rĩ na mũtararĩko ũrĩa ukenagia MWATHANI.”

Igongoona rĩa mũthenya wa Thabatũ

9 “Mũthenya wa Thabatũ mũrĩrutaga igongoona rĩa tũtũrũme twĩrĩ twĩ na ũkũrũ wa mwaka ũmwe tũtarĩ na kaũũgũ, na mũtu wa ngano mũhinyu kiro igĩrĩ ũtukanĩĩtio na maguta ma mĩtamaiyũ ũrĩ igongoona rĩa irio cia mũgũnda, na ndibei.

10 Igongoona rĩĩrĩ rĩa njino rĩrĩrutagwo o mũthenya wa Thabatũ hamwe na igongoona rĩrĩa rĩrutagwo mũthenya o mũthenya hamwe na igongoona rĩa ndibei.

Igongoona rĩa mũthenya wa mbere wa mweri

11 “Mũthenya wa mbere wa o mweri-rĩ, nĩmũrĩrutagĩra MWATHANI igongoona rĩa njino, na rĩrĩkoragwo rĩrĩ rĩa indo ici: tũteegwa twĩrĩ, ndũrũme ĩmwe, na tũtũrũme mũgwanja twa mwaka ũmwe, ciothe itarĩ na kaũũgũ.

12 Narĩo igongoona rĩa mũtu mũrĩrutaga mũtu mũhinyu ũtukanĩĩtio na maguta ma mĩtamaiyũ mũkaũruta ta ũũ: gateegwa mũgakarutanĩria na kiro ithatũ cia mũtu, na ndũrũme kiro igĩrĩ cia mũtu,

13 na o gatũrũme kiro ĩmwe ya mũtu. Rĩũ nĩ igongoona rĩa njino; mũtararĩko warĩo nĩũkenagia MWATHANI.

14 Narĩo igongoona rĩa ndibei nĩ rita igĩrĩ cia ndibei hamwe na o gateegwa, rita ĩmwe na nuthu ya ndibei hamwe na ndũrũme, na rita ĩmwe ya ndibei hamwe na o gatũrũme. Rĩu nĩrĩo igongoona rĩa njino rĩrĩa rĩrĩrutagwo mũthenya wa mbere wa o mweri mwaka wothe.

15 Hamwe na igongoona rĩu rĩa njino rĩa o mũthenya na igongoona rĩarĩo rĩa ndibei nĩmũrĩrutaga thenge ĩmwe ĩrĩ igongoona rĩa meehia.

Magongoona ma hĩndĩ ya Thigũkũ ya Mĩgate Ĩtarĩ Mĩĩkĩre Ndaawa ya Kũimbia

16 “Atĩrĩĩrĩ, thigũkũ ya Bathaka, ĩrĩa ĩkũngũyagĩrwo nĩ ũndũ wa kũhe MWATHANI gĩtĩĩo, ĩrĩambagĩrĩria mũthenya wa ikũmi na ĩna wa mweri wa mbere.

17 Mũthenya wa ikũmi na ĩtaano wa mweri ũcio, nĩguo thigũkũ ĩrĩambagĩrĩria, na ĩrĩniinaga mĩthenya mũgwanja. Mĩthenya ĩyo kũrĩrĩagwo mĩgate ĩtarĩ mĩĩkĩre ndaawa ya kũimbia.

18 Mũthenya wa mbere wa thigũkũ ĩyo nĩguo mũrĩũnganaga gũthaathaiya, na gũtirĩ wĩra mũrĩrutaga.

19 Mũrĩrutaga igongoona rĩa njino rĩrĩ igongoona rĩa irio rĩrutĩirwo MWATHANI rĩa indo ici: tũteegwa twĩrĩ, ndũrũme ĩmwe, na tũtũrũme mũgwanja twa mwaka ũmwe, na ciothe ikoragwo itarĩ na kaũũgũ.

20 Ningĩ igongoona rĩa mũtu ũtukanĩĩtio na maguta ma mĩtamaiyũ mũkaũruta ta ũũ: nĩmũrĩrutanagĩria indo icio na o gateegwa mũtu kiro ithatũ, ndũrũme mũtu kiro igĩrĩ,

21 na o gatũrũme mũtu kiro ĩmwe.

22 Hamwe na indo icio nĩmũrĩrutaga thenge ĩmwe ĩ ya igongoona rĩa kũhoroheria meehia.

23 Indo icio irĩrutanagĩrio hamwe na igongoona rĩa njino rĩa o rũũciinĩ.

24 Ũguo nĩguo mũrĩrutagĩra MWATHANI igongoona rĩa irio mĩthenya mũgwanja. Mũtararĩko warĩo nĩũkenagia MWATHANI. Mũrĩrĩrutanagĩria na igongoona rĩa njino rĩa o mũthenya hamwe na igongoona rĩa ndibei.

25 Mũthenya wa mũgwanja mũrĩũnganaga gũthaathaiya, na mũtirĩrutaga wĩra.

Magongoona ma Thigũkũ ya Magetha

26 “Mũthenya wa mbere wa Thigũkũ ya Magetha, rĩrĩa mũrarutĩra MWATHANI igongoona rĩa irio cia mũgethano, mũrĩũnganaga gũthaathaiya, na gũtirĩrutagwo wĩra.

27 Nĩmũrĩrutaga igongoona rĩa njino, rĩrĩ mũtararĩko ũrĩa ũkenagia MWATHANI rĩa indo ici: tũteegwa twĩrĩ, ndũrũme ĩmwe, na tũtũrũme mũgwanja twa mwaka ũmwe, na ciothe ikoragwo itarĩ na kaũũgũ.

28 Ningĩ nĩmũrĩrutanagĩria indo icio na igongoona rĩa mũtu ũtukanĩĩtio na maguta ma mĩtamaiyũ, mũkaũruta ta ũũ: o gateegwa, kiro ithatũ, ndũrũme mũtu kiro igĩrĩ,

29 na o gatũrũme mũtu kiro ĩmwe.

30 O na ningĩ nĩmũrĩrutaga thenge ya igongoona rĩa kuhoroheria meehia.

31 Mũrĩrutanagĩria indo icio na igongoona rĩa ndibei hamwe na igongoona rĩa o mũthenya rĩa njino na rĩa irio.

Magongoona ma thigũkũ ya Mwaka Mwerũ

1 “Mũthenya wa mbere wa mweri wa mũgwanja nĩmũrĩũnganaga gũthaathaiya, na gũtirĩ wĩra ũrĩrutagwo. Mũthenya ũcio tũrumbeeta nĩtũrĩhuuhagwo.

2 Nĩmũrĩrutaga igongoona rĩa njino rĩrĩ mũtararĩko ũrĩa ũkenagia MWATHANI rĩa indo ici: gateegwa kamwe, ndũrũme, na tũtũrũme mũgwanja twa mwaka ũmwe, ciothe irĩkoragwo itarĩ na kaũũgũ.

3 Ningĩ nĩmũrĩrutanagĩria indo icio na igongoona rĩa mũtu ũtukanĩĩtio na maguta ma mĩtamaiyũ, mũkaũruta ta ũũ: o gateegwa mũtu kiro ithatũ, ndũrũme mũtu kiro igĩrĩ,

4 na o gatũrũme mũtu kiro ĩmwe.

5 Hamwe na indo icio nĩmũrĩrutaga thenge ĩmwe ĩ ya igongoona rĩa kuhoroheria meehia.

6 Mũrĩrutanagĩria indo icio na igongoona rĩa njino rĩa mũthenya wa mbere wa o mweri na igongoona rĩarĩo rĩa mũtu, o hamwe na igongoona rĩa njino rĩa o mũthenya na igongoona rĩarĩo rĩa mũtu na rĩa ndibei. Magongoona macio ma irio nĩ mũtararĩko ũrĩa ũkenagia MWATHANI.

Magongoona ma Mũthenya wa Kũhoroherio Meehia

7 “Mũthenya wa ikũmi wa mweri wa mũgwanja nĩmũrĩũnganaga gũthaathaiya; nĩmũrĩhingaga kũrĩa na kũnyua na mũtirĩrutaga wĩra.

8 Nĩmũrĩrutaga igongoona rĩa njino rĩa mũtararĩko ũrĩa ũkenagia MWATHANI rĩa indo ici: gateegwa kamwe, ndũrũme ĩmwe na tũtũrũme mũgwanja twa mwaka ũmwe, na ciothe ikoragwo itarĩ na kaũũgũ.

9 Ningĩ nĩmũrĩrutanagĩria indo icio na igongoona rĩa mũtu mũhinyu ũtukanĩĩtio na maguta ma mĩtamaiyũ, mũkaũruta ta ũũ: gateegwa mũtu kiro ithatũ, ndũrũme mũtu kiro igĩrĩ,

10 na o gatũrũme mũtu kiro ĩmwe.

11 O na ningĩ nĩmũrĩrutaga thenge ĩmwe ĩrĩ ya igongoona rĩa meehia. Mũrĩmĩrutanagĩria na thenge ĩrĩa ĩrutagwo ya igongoona rĩa kũhoroheria meehia, na igongoona rĩa njino rĩa o mũthenya hamwe na igongoona rĩarĩo rĩa mũtu na rĩa ndibei.

Magongoona ma Thigũkũ ya Ithũnũ

12 “Mũthenya wa ikũmi na ĩtaano wa mweri wa mũgwanja nĩmũrĩũnganaga gũthaathaiya. Thigũkũ ĩno mũrĩmĩkũngũagĩra mĩthenya mũgwanja nĩ ũndũ wa gũtĩĩa MWATHANI, na mũtirĩrutaga wĩra.

13 Mũthenya wa mbere mũrĩrutaga igongoona rĩa njino rĩ na mũtararĩko ũrĩa ũkenagia MWATHANI rĩa indo ici: tũteegwa ikũmi na tũtatũ, ndũrũme igĩrĩ na tũtũrũme ikũmi na tũna twa mwaka ũmwe, na ciothe ikoragwo itarĩ kaũũgũ.

14 Ningĩ nĩmũrĩrutanagĩria indo icio na igongoona rĩa mũtu mũhinyu ũtukanĩĩtio na maguta ma mĩtamaiyũ, mũkaũruta ta ũũ: gateegwa mũtu kiro ithatũ, o ndũrũme mũtu kiro igĩrĩ,

15 na o gatũrũme mũtu kiro ĩmwe.

16 O na nĩmũrĩrutaga thenge ĩmwe ya igongoona rĩa meehia. Mũrĩmĩrutanagĩria na igongoona rĩa njino rĩa o mũthenya hamwe na igongoona rĩarĩo rĩa mũtu na rĩa ndibei.

17 “Mũthenya wa keerĩ mũkaruta tũteegwa ikũmi na twĩrĩ, ndũrũme igĩrĩ, na tũtũrũme ikũmi na tũna twa mwaka ũmwe, na ciothe ikoragwo itarĩ na kaũũgũ.

18-19 Hamwe nacio nĩmũrĩrutaga magongoona marĩa mangĩ moothe maagĩrĩire kũrutwo, mũthenya wa mbere.

20 “Mũthenya wa ĩtatũ mũkaruta tũteegwa ikũmi na kamwe, ndũrũme igĩrĩ, na tũtũrũme ikũmi na tũna twa mwaka ũmwe, na ciothe ikoragwo itarĩ na kaũũgũ.

21-22 Hamwe nacio nĩmũrĩrutaga magongoona marĩa mangĩ moothe maagĩrĩire kũrutwo mũthenya wa mbere.

23 “Mũthenya wa ĩna mũkaruta tũteegwa ikũmi, ndũrũme igĩrĩ, na tũtũrũme ikũmi na tũna twa mwaka ũmwe, na ciothe ikoragwo itarĩ na kaũũgũ.

24-25 Hamwe nacio nĩmũrĩrutaga magongoona marĩa mangĩ moothe maagĩrĩire kũrutwo mũthenya wa mbere.

26 “Mũthenya wa gataano mũkaruta tũteegwa kenda, ndũrũme igĩrĩ, na tũtũrũme ikũmi na tũna twa mwaka ũmwe, na ciothe ikoragwo itarĩ na kaũũgũ.

27-28 Hamwe nacio nĩmũrĩrutaga magongoona marĩa mangĩ moothe maagĩrĩire kũrutwo mũthenya wa mbere.

29 “Mũthenya wa gatandatũ mũkaruta tũteegwa tũnaana, ndũrũme igĩrĩ, na tũtũrũme ikũmi na tũna twa mwaka ũmwe, na ciothe ikoragwo itarĩ na kaũũgũ.

30-31 Hamwe nacio nĩmũrĩrutaga magongoona marĩa mangĩ moothe maagĩrĩire kũrutwo mũthenya wa mbere.

32 “Mũthenya wa mũgwanja mũkaruta tũteegwa mũgwanja, ndũrũme igĩrĩ, na tũtũrũme ikũmi na tũna twa mwaka ũmwe, na ciothe ikoragwo itarĩ na kaũũgũ.

33-34 Hamwe nacio nĩmũrĩrutaga magongoona marĩa mangĩ moothe maagĩrĩire kũrutwo mũthenya wa mbere.

35 “Mũthenya wa kanaana mũrĩũnganaga gũthaathaiya, na mũtirĩrutaga wĩra.

36 Nĩmũrĩrutaga igongoona rĩa njino rĩa mũtararĩko ũrĩa ũkenagia MWATHANI rĩa: gateegwa kamwe, ndũrũme ĩmwe, na tũtũrũme mũgwanja twa mwaka ũmwe, ciothe ikoragwo itarĩ na kaũũgũ.

37-38 Hamwe nacio nĩmũrĩrutaga magongoona marĩa mangĩ moothe maagĩrĩire kũrutwo mũthenya wa mbere.

39 “Macio nĩ mo magongoona ma njino, ma mũtu, ma ndibei, na ma thaayũ marĩa mũrĩrutagĩra MWATHANI thigũkũinĩ iria ciamũrĩĩtwo. Magongoona macio mũrĩmarutanagĩria na magongoona ma kũhingia mwĩhĩtwa kana ma kwĩyendera marĩa mũrutaga.”

40 Musa agĩkĩĩra andũ a Isiraeli maũndũ moothe o ta ũrĩa aathĩĩtwo nĩ MWATHANI.