Month: March 2020

Gũtaarĩria

Ibuku rĩĩrĩ rĩa Ndari rĩheanĩĩte rũgano rwa Aisiraeli kuuma rĩrĩa moimire kĩrĩmainĩ gĩa Sinai kinya makinyire mwena wa irathĩro wa bũrũri ũrĩa Ngai oigĩĩte nĩakaamahe. Rĩu nĩ itĩĩna ta rĩa mĩaka mĩrongo ĩna.

Ibuku rĩĩrĩ rĩrutĩĩte rĩĩtwa rĩarĩo harĩ ũndũ wa bata ũheanĩĩtwo thĩinĩ warĩo. Ũndũ ũcio nĩgũtara andũ. Musa nĩatarire andũ a Aisiraeli marĩ kĩrĩmainĩ gĩa Sinai mataanambĩrĩria rũgendo. Ningĩ nĩamatarire marĩ bũrũriinĩ wa Amoabi, mwena wa irathĩro wa rũũĩ rwa Jorodani. Gũtarana kũu gwa keerĩ gwekirwo ta thuutha wa rũciaro rũmwe kũhĩtũka.

Kuuma rĩrĩa Aisiraeli maatarirwo riita rĩa mbere, magĩgaacooka gũtarwo riita rĩa keerĩ nĩmaakoreetwo mathiĩte magakinya Kadeshi Barinea mũhakainĩ wa na kĩanda wa bũrũri wa Kanaani. No rĩĩrĩ, matiahotire kũingĩra bũrũri wa kĩĩranĩro kuuma mwena ũcio.

Nĩmaikarire kũu Kadeshi Barinea mĩaka mĩingĩ, magĩcooka magĩthiĩ mwena wa na irathĩro wa rũũĩ rwa Jorodani. Mũhĩrĩga wa Reubeni, Gadi, na nuthu ya mũhĩrĩga wa Manase ĩgĩtuĩka ya gũtũũra mwena ũcio. Nayo mĩhĩrĩga ĩyo ĩngĩ ĩkĩĩhaarĩria kũringa rũũĩ ĩtoonye bũrũri wa Kanaani.

Ibuku rĩa Ndari rĩheanĩĩte ũhoro wa andũ maakoragwo kaingĩ makuĩte ngoro, meetigagĩra moona thĩĩna, maaremagĩra Ngai, o na makaremera Musa mũndũ ũrĩa Ngai aamathuurĩire amatongorie. Rĩheanĩĩte ũhoro wa ũrĩa Ngai aamenyagĩrĩra andũ aake ategũtigithĩria, o na gũtuĩka maarĩ andũ ahũthũ na aregenyũki. O na nĩrĩheanĩĩte ũhoro wa ũrĩa Musa eeheanĩĩte na ngoro yothe gũtungatĩra Ngai na Aisiraeli, o na gũtuĩka rĩmwe na rĩmwe nĩaremagwo nĩgũkirĩrĩria.

Maũndũ marĩa marĩ ibukuinĩ rĩĩrĩ

Aisiraeli kwĩhaarĩria kuuma kĩrĩmainĩ gĩa Sinai 1.1–9.23

(a) Andũ gũtarwo riita rĩa mbere 1.1–4.49

(b) Mawatho mwanya mwanya 5.1–8.26

(c) Bathaka ya keerĩ 9.1-23

Aisiraeli kuuma kĩrĩmainĩ gĩa Sinai na gũkinya Moabi 10.1–21.35

Maũndũ marĩa meekĩkire bũrũriinĩ wa Moabi 22.1–32.42

Rũgendo rwa kuuma Misiri kinya Moabi na njĩra nguhĩ 33.1-49

Mataaro mbere ya kũringa rũũĩ rwa Jorodani 33.50–36.13

Aisiraeli gũtarwo riita rĩa mbere

1 Na rĩĩrĩ, mũthenya wa mbere wa mweri wa keerĩ wa mwaka wa keerĩ kuuma andũ a Isiraeli moima Misiri, MWATHANI nĩarĩirie Musa Hemainĩ ya gũtũnganwo me werũinĩ wa Sinai akĩmwĩra atĩrĩ,

2-3 “ Ngwenda wee na Harũni mũtare andũ a Isiraeli kũringana na mĩhĩrĩga na mbarĩ ciao. Andĩkaai marĩĩtwa ma arũme oothe arĩa me na mĩaka mĩrongo ĩĩrĩ gũthiĩ na igũrũ, arĩa mangĩhota gũthiĩ mbaara.

4 Kuuma harĩ o mũhĩrĩga ũriai mũtongoria wao amũteithĩrĩrie.”

5-16 Nao andũ arĩa maathuurirwo a kũmateithĩrĩria nĩ:

Reubeni Elizuru mũrũ wa Shedeuru,
Simeoni Shelumieli mũrũ wa Zurishadai
Juda Nahashoni mũrũ wa Aminadabu
Isakaru Nethaneli mũrũ wa Zuaru
Zebuluni Eliabu mũrũ wa Heloni
Efiraimu Elishama mũrũ wa Amihudi
Manase Gamalieli mũrũ wa Pedahuzuri
Benjamini Abidani mũrũ wa Gideoni
Dani Ahiezeri mũrũ wa Amishadai
Asheri Pagieli mũrũ wa Okirani
Gadi Eliasafu mũrũ wa Deueli
Nafutali Ahira mũrũ wa Enani.

Acio nĩ o maathuurirwo kuuma harĩ mũingĩ, na nĩ o maarĩ atongoria a mũhĩrĩga ũrĩa mũndũ oimĩĩte, na anene a mĩhĩrĩga ya Aisiraeli.

17 Musa na Harũni mateithĩrĩirio nĩ andũ acio ikũmi na eerĩ,

18 magĩgĩĩta andũ oothe hamwe, mũthenya wa mbere wa mweri wa keerĩ, makĩmaandĩka oothe kũringana na mĩhĩrĩga yao na mbarĩ ciao. Marĩĩtwa ma arũme oothe arĩa maarĩ na mĩaka mĩrongo ĩĩrĩ gũthiĩ na igũrũ makĩandĩkwo na magĩtarĩrwo

19 o ta ũrĩa MWATHANI aathanĩĩte. Musa aandĩkĩire andũ marĩĩtwa werũinĩ wa Sinai.

20-46 Arũme arĩa maarĩ na mĩaka mĩrongo ĩĩrĩ gũthiĩ na igũrũ arĩa mangĩathiire mbaara magĩkĩandĩkwo marĩĩtwa kũringana na mĩhĩrĩga na mbarĩ. Maambĩrĩirio na mũhĩrĩga wa Reubeni ũrĩa warĩ irigithaathi rĩa Jakubu. Mũigana wao oothe warĩ:

Reubeni Ngiri mĩrongo ĩna na ithathatũ na magana mataano (46,500)
Simeoni Ngiri mĩrongo ĩtaano na kenda na magana matatũ (59,300)
Gadi Ngiri mĩrongo ĩna na ithaano na magana matandatũ na mĩrongo ĩtaano (45,650)
Juda Ngiri mĩrongo mũgwanja na inya na magana matandatũ (74,600)
Isakaru Ngiri mĩrongo ĩtaano na inya na magana mana (54,400)
Zebuluni Ngiri mĩrongo ĩtaano na mũgwanja na magana mana (57,400)
Efiraimu Ngiri mĩrongo ĩna na magana mataano (40,500)
Manase Ngiri mĩrongo ĩtatũ na igĩrĩ na magana meerĩ (32,200)
Benjamini Ngiri mĩrongo ĩtatũ na ithaano na magana mana (35,400)
Dani Ngiri mĩrongo ĩtandatũ na igĩrĩ na magana mũgwanja (62,700)
Asheri Ngiri mĩrongo ĩna na ĩmwe na magana mataano (41,500)
Nafutali Ngiri mĩrongo ĩtaano na ithatũ na magana mana (53,400)

Oothe maarĩ andũ ngiri magana matandatũ na ithatũ, na magana mataano na mĩrongo ĩtaano (603,550).

47 Alawii matiandĩkanĩirio marĩĩtwa na andũ a mĩhĩrĩga ĩyo ĩngĩ,

48 tondũ MWATHANI nĩerĩĩte Musa atĩrĩ,

49 “Ũgĩtara andũ arĩa mangĩthiĩ mbaara, ndũgatare andũ a mũhĩrĩga wa Lawi.

50 Handũ ha ũguo matue a kũroraga Hema ya gũtũnganwo o hamwe na indo ciothe ciayo. Nĩ o marĩmĩkuuaga o hamwe na indo ciayo, magatungataga thĩinĩ wayo, o na makaambaga hema ciao ĩmĩthiũrũrũkĩirie.

51 Hĩndĩ ĩrĩa mwathaama, Alawii nĩ o marĩambũraga Hema ĩyo, magacooka magathiĩ makamĩamba harĩa mwathaamĩra. Na rĩĩrĩ, mũndũ ũngĩ ũrĩa ũrĩmĩkuhagĩrĩria nĩkũũragwo arĩũragagwo.

52 Andũ acio angĩ a Isiraeli marĩambaga hema ciao me ikundi ikundi, o mũndũ akaamba harĩ andũ aao harĩa harĩ na bendera yao.

53 No rĩĩrĩ, Alawii marĩambaga hema ciao ithiũrũrũkĩirie Hema ya gũtũnganwo nĩguo makamĩgitĩra, nĩ geetha hatikaagĩe mũndũ ũkũmĩkuhĩrĩria atũme maraakara maakwa makinyĩre mũingĩ wa Isiraeli.”

54 Kwoguo andũ a Isiraeli magĩĩka maũndũ moothe kũringana na ũrĩa MWATHANI aathĩĩte Musa.

Mũtaratara wa ũrĩa mĩhĩrĩga yambire Hema yacio

1 MWATHANI nĩaheire Musa na Harũni mataaro maya:

2 Atĩrĩĩrĩ, andũ a Isiraeli makĩamba hema, o mũndũ arĩambaga harĩa harĩ bendera ya andũ aao, o harĩa harĩ marũũri ma nyũmba cia maithe maao. Kambĩ yothe ĩrĩakagwo ĩthiũrũrũkĩirie Hema ya gũtũnganwo.

3-9 Mwena wa na irathĩro ũrĩambagwo hema nĩ gĩkundi kĩrĩa gĩtongoreetio nĩ bendera ya mũhĩrĩga wa Juda, o mũhĩrĩga ũkaamba hema ciaguo rungu rwa atongoria aaguo ta ũũ:

Mwena wa irathĩro:

Juda Nahashoni mũrũ wa Aminadabu Ngiri mĩrongo mũgwanja na inya na magana matandatũ (74,600)
Isakaru Nethaneli mũrũ wa Zuaru Ngiri mĩrongo ĩtaano na inya na magana mana (54,400)
Zebuluni Eliabu mũrũ wa Heloni Ngiri mĩrongo ĩtaano na mũgwanja na magana mana (57,400)

Oothe nĩ ngiri igana rĩmwe na mĩrongo ĩnaana na ithathatũ na magana mana (186,400). Andũ acio a gĩkundi kĩa Juda nĩ o marĩthiaga.

10-16 Mwena wa na kĩanda ũrĩambagwo hema nĩ gĩkundi kĩrĩa gĩtongoreetio nĩ bendera ya mũhĩrĩga wa Reubeni, o mũhĩrĩga ũkaamba hema ciaguo rungu rwa atongoria aaguo ta ũũ:

Reubeni Elizuru mũrũ wa Shedeuru Ngiri mĩrongo ĩna na ithathatũ na magana mataano (46,500)
Simeoni Shelumieli mũrũ wa Zurishadai Ngiri mĩrongo ĩtaano na kenda na magana matatũ (59,300)
Gadi Eliasafu mũrũ wa Deueli Ngiri mĩrongo ĩna na ithaano na magana matandatũ na mĩrongo ĩtaano (45,650).

Oothe nĩ ngiri igana na mĩrongo ĩtaano na ĩmwe na magana mana na mĩrongo ĩtaano (151,450). Andũ acio a gĩkundi kĩa Reubeni nĩ o marĩrũmagĩrĩra.

17 Gatagatĩ ga ikundi cia mbere igĩrĩ na cia thuutha igĩrĩ, nĩ ho Alawii marĩkoragwo marĩ makuuĩĩte Hema ya gũtũnganwo. O gĩkundi kĩrĩthiaga na mũtaratara ũrĩa hema ciambĩĩtwo naguo, o gĩkundi handũ haakĩo gĩtongoreetio nĩ bendera yakĩo.

18-24 Mwena wa ithũĩro ũrĩambagwo hema nĩ gĩkundi kĩrĩa gĩtongoreetio nĩ bendera ya mũhĩrĩga wa Efiraimu, o mũhĩrĩga ũkaamba hema ciaguo rungu rwa atongoria aaguo ta ũũ:

Efiraimu Elishama mũrũ wa Amihudi Ngiri mĩrongo ĩna na magana mataano (40,500)
Manase Gamalieli mũrũ wa Pedahuzuri Ngiri mĩrongo ĩtatũ na igĩrĩ na magana meerĩ (32,200)
Benjamini Abidani mũrũ wa Gideoni Ngiri mĩrongo ĩtatũ na ithaano na magana mana (35,400)

Oothe nĩ andũ ngiri igana na inyaanya na igana rĩmwe (108,100). Andũ acio a gĩkundi kĩa Efiraimu nĩ o marĩthiaga marĩ a gatatũ.

25-31 Mwena wa na rũgongo ũrĩambagwo hema nĩ gĩkundi kĩrĩa gĩtongoreetio nĩ bendera ya mũhĩrĩga wa Dani, o mũhĩrĩga ũkaamba hema ciaguo rungu rwa atongoria aaguo ta ũũ:

Dani Ahiezeri mũrũ wa Amishadai Ngiri mĩrongo ĩtandatũ na igĩrĩ na magana mũgwanja (62,700)
Asheri Pegieli mũrũ wa Okirani Ngiri mĩrongo ĩna na ĩmwe na magana mataano (41,500)
Nafutali Ahira mũrũ wa Enani Ngiri mĩrongo ĩtaano na ithatũ na magana mana (53,400).

Oothe nĩ andũ ngiri igana na mĩrongo ĩtaano na mũgwanja na magana matandatũ (157,600). Andũ acio a gĩkundi kĩa Dani nĩ o marĩrigagia.

32 Mũigana wa andũ a Isiraeli matarĩĩtwo nyũmba o nyũmba kũringana na ikundi ciao maarĩ ngiri magana matandatũ na ithatũ na magana mataano na mĩrongo ĩtaano (603,550).

33 Na rĩĩrĩ, o ta ũrĩa MWATHANI aathĩĩte Musa, Alawii matiandĩkanĩirio marĩĩtwa na andũ acio angĩ a Isiraeli.

34 Kwoguo andũ a Isiraeli magĩĩka maũndũ moothe marĩa MWATHANI aathĩĩte Musa. Magĩkĩamba hema o mũndũ harĩa haarĩ bendera yao, na o mũndũ agatwaranaga na andũ a nyũmba ya ithe.

Aariũ a Harũni

1 Ici nĩcio njiarwa cia Harũni na Musa rĩrĩa MWATHANI aarĩirie Musa kĩrĩmainĩ gĩa Sinai.

2 Harũni aarĩ ithe wa aariũ ana: Nadabu, nĩ we warĩ irigithaathi, Abihu, Eleazaru, na Ithamaru.

3 Acio nĩmaitĩrĩirio maguta magĩtuuo athĩnjĩri Ngai.

4 No Nadabu na Abihu nĩmooragirwo rĩrĩa maarutĩire MWATHANI mwaki ũtaarĩ mũtheru werũinĩ wa Sinai. Matiarĩ na ciana, na kwoguo Eleazaru na Ithamaru nĩ o maatungataga ta athĩnjĩri Ngai hĩndĩ ĩrĩa Harũni ithe wao aarĩ muoyo.

Alawii gũthuurwo matungatagĩre Athĩnjĩri Ngai

5 MWATHANI nĩarĩirie Musa akĩmwĩra atĩrĩ,

6 “Reehe andũ a mũhĩrĩga wa Lawi haaha mbere ũmathuure matuĩke agũtungatagĩra Harũni mũthĩnjĩri Ngai.

7 Acio nĩ o marĩtungataga Hemainĩ ya gũtũnganwo, na matungatagĩre athĩnjĩri Ngai na andũ oothe.

8 Nĩ o marĩroraga indo ciothe cia Hema ya gũtũnganwo, na matungatagĩre andũ acio angĩ a Isiraeli.

9 Wĩra ũrĩa Alawii marĩrutaga no wa gũtungatĩra Harũni na aariũ aake.

10 Ũgũthuura Harũni na aariũ aake matuĩke agũtungataga ta athĩnjĩri Ngai; mũndũ ũngĩ ũrĩa ũrĩgeragia gwĩka ũguo nĩkũũragwo arĩũragagwo.”

11 MWATHANI akĩĩra Musa atĩrĩ,

12-13 “Alawii rĩu nĩmegũtuĩka aakwa. Rĩrĩa ndooragire marigithaathi moothe ma andũ a Misiri-rĩ, nĩndaamũrire aariũ oothe a marigithaathi a andũ a Isiraeli, o hamwe na marigithaathi ma nyamũ ciothe matuĩke maakwa. Rĩu handũ ha kũgĩa na tũmwana twa marigithaathi twa andũ a Isiraeli tũtuĩke twakwa-rĩ, ndĩ na Alawii; acio nĩ o megũtuĩka aakwa. Nĩ niĩ MWATHANI.”

Alawii gũtarwo

14 Ningĩ MWATHANI nĩerire Musa arĩ werũinĩ wa Sinai

15 atare Alawii kũringana na mbarĩ na nyũmba ciao, aandĩke marĩĩtwa ma arũme oothe kuuma tũmwana twa mweri ũmwe gũthiĩ na igũrũ.

16 Naake Musa agĩgĩĩka o ta ũguo eerirwo.

17-20 Lawi aarĩ ithe wa aariũ atatũ: Gerishoni, Kohathu, na Merari. Acio nĩ o maarĩ maithe ma andũ a mbarĩ iria cietanagio na marĩĩtwa maao. Gerishoni aarĩ ithe wa aariũ eerĩ: Libini na Shimei. Naake Kohathu aarĩ ithe wa aariũ ana: Amuramu, Iziharu, Heburoni, na Uzieli. Naake Merari aarĩ ithe wa aariũ eerĩ: Mahali na Mushi. Acio nĩ o maarĩ maithe ma andũ a nyũmba iria cietanagio na marĩĩtwa maao.

21 Mbarĩ ya Gerishoni yarĩ ya andũ a nyũmba ya Libini na ya Shimei.

22 Arũme oothe kuuma tũmwana twa mweri ũmwe arĩa maatarirwo maarĩ ngiri mũgwanja na magana mataano (7,500).

23 Mbarĩ ya Gerishoni yambaga hema ciayo thuutha wa Hema ya gũtũnganwo mwena wa na ithũĩro,

24 na Eliasafu, mũrũ wa Laeli, nĩwe warĩ mũnene wayo.

25 Alawii a mbarĩ ĩyo maakoragwo makĩrora Hema ya gũtũnganwo, kĩrĩa kĩamĩgitĩĩte na thĩinĩ na kĩrĩa kĩamĩgitĩĩte na igũrũ, mbathiya ĩrĩa yarĩ mũromoinĩ,

26 mbathiya ĩrĩa yathiũrũrũkĩirie Hema na kĩgongoona, o na mbathiya ĩrĩa yarĩ mũromoinĩ wa nja. Acio nĩ o maarũmbũyanagia na wĩra wothe ũrĩa warutagwo na indo icio.

27 Mbarĩ ya Kohathu yarĩ ya andũ a nyũmba ya Amuramu, Iziharu, Heburoni, na ya Uzieli.

28 Mũigana wa arũme oothe maatarwo kuuma tũmwana twa mweri ũmwe, maarĩ ngiri inyaanya na magana matandatũ (8,600).

29 Andũ aya a mbarĩ ya Kohathu maambaga hema ciao mwena wa na kĩanda wa Hema ya gũtũnganwo,

30 naake Elizafani mũrũ wa Uzieli nĩwe warĩ mũnene wa mbarĩ ĩyo.

31 Alawii a mbarĩ ĩyo nĩ o maaroraga Ithandũkũ rĩa Kĩrĩĩkanĩro, meetha, mũtĩ wa gũcuuria mataawa, kĩgongoona gĩothe, indo iria athĩnjĩri Ngai maahũthagĩra thĩinĩ wa Handũ Harĩa Hatheru, o hamwe na mbathiya ĩrĩa ĩrĩ mũromoinĩ wa Handũ Harĩa Hatheru Mũno. Acio nĩ o maarũmbũyanagia na wĩra wothe ũrĩa warutagwo na indo icio.

32 Mũnene wa Alawii aarĩ Eleazaru mũrũ wa Harũni mũthĩnjĩri Ngai. Nĩ we waroraga arĩa maarutaga wĩra Handũ Harĩa Hatheru.

33 Nayo mbarĩ ya Merari yarĩ ya andũ a nyũmba ya Mahali na Mushi.

34 Naguo mũigana wa arũme oothe kuumagia tũmwana twa mweri ũmwe maarĩ ngiri ithathatũ na magana meerĩ (6,200).

35 Andũ a mbarĩ ĩyo maambaga hema ciao mwena wa na rũgongo wa Hema ya gũtũnganwo. Zurieli mũrũ wa Abihaili nĩwe warĩ mũnene wa andũ a mbarĩ yao.

36 Nao maaheirwo wĩra wa kũrora buremu cia Hema, mĩratho yayo, itingĩ ciayo, njikarĩro ciayo, na indo ciothe iria ciamĩnyiitithanĩĩtie. Acio nĩ o maarũmbũyanagia na wĩra wothe ũrĩa warutagwo na indo icio.

37 No o maaroraga itingĩ, njikarĩro ciacio, higĩ, o hamwe na mĩkanda ya nja ya Hema.

38 Naake Musa na Harũni na aariũ aake maambaga hema ciao mwena wa na mbere wa Hema mwena wa irathĩro. Acio nĩ o maarutaga magongoona moothe marĩa marutagĩrwo Handũ Harĩa Hatheru nĩ ũndũ wa andũ a Isiraeli. Mũndũ ũngĩ ũrĩa wakuhagĩrĩria nĩkũũragwo ooragagwo.

39 Naguo mũigana wa arũme oothe a Alawii kuumagia tũmwana twa mweri ũmwe arĩa Musa aatarire kũringana na nyũmba ciao ta ũrĩa MWATHANI aamwathĩĩte maarĩ ngiri mĩrongo ĩĩrĩ na igĩrĩ (22,000).

Alawii gũcooka handũ ha aariũ a marigithaathi

40-41 Ningĩ MWATHANI akĩĩra Musa atĩrĩ, “Aariũ a marigithaathi a andũ a Isiraeli nĩ aakwa. Kwoguo andĩka arũme oothe marigithaathi na marĩĩtwa kuumagia tũmwana twa mweri ũmwe gũthiĩ na igũrũ. Handũ haao ngwenda Alawii oothe matuĩke aakwa! Nĩ niĩ MWATHANI! O na nĩngwenda mahiũ ma Alawii matuĩke maakwa handũinĩ ha marigithaathi moothe ma mahiũ.”

42 Naake Musa agĩĩka ũguo eerirwo nĩ MWATHANI, agĩkĩandĩka arũme oothe marigithaathi

43 kuumagia tũmwana tũrĩa twarĩ twa mweri ũmwe; oothe maarĩ ngiri mĩrongo ĩĩrĩ na igĩrĩ na magana meerĩ ma mĩrongo mũgwanja na atatũ (22,273).

44 Na rĩĩrĩ, MWATHANI akĩĩra Musa atĩrĩ,

45 “Nyamũrĩra Alawii matuĩke aakwa handũinĩ ha arũme a marigithaathi ma andũ a Isiraeli, na ũnyamũrĩre mahiũ ma Alawii matuĩke maakwa handũinĩ ha marigithaathi ma mahiũ ma andũ a Isiraeli.

46 Tondũ marigithaathi ma andũ a Isiraeli nĩ maingĩ gũkĩra Alawii na andũ magana meerĩ na mĩrongo mũgwanja na atatũ-rĩ (273), no mũhaka ũngũrĩre amwe a aariũ acio

47 o mũndũ arĩhe mbeeca ithaano cia betha ithimĩĩtwo na gĩthimi kĩrĩa kĩiguanĩirwo.

48 Mbeeca icio ũcinengere Harũni na aariũ aake.”

49 Musa agĩgĩĩka ũguo eerirwo, agĩkĩoya

50 mbeeca icio cia betha ngiri ĩmwe na magana matatũ na mĩrongo ĩtandatũ na ithaano (1,365),

51 agĩcinengera Harũni na aariũ aake.

Mawĩra ma Alawii a mbarĩ ya Kohathu

1 Ningĩ MWATHANI akĩĩra Musa na Harũni

2 matare Alawii a mbarĩ ya Kohathu kũringana na nyũmba ciao,

3 aandĩke arũme oothe a kuuma mĩaka mĩrongo ĩtatũ nginya mĩrongo ĩtaano, arĩa mangĩhota gũtungatĩra Hema ya gũtũnganwo.

4 Ũtungatarĩ wao ũrĩkoragwo ũkoniĩ indo iria theru mũno.

5 MWATHANI akĩĩra Musa maũndũ maya: Ihinda rĩa gũtharia kambĩ rĩakinya, Harũni na aariũ aake marĩtoonyaga Hemainĩ magacuurũria mbathiya ĩrĩa ĩ mbere ya Ithandũkũ rĩa Kĩrĩĩkanĩro, magacooka makahumbĩra ithandũkũ rĩu nayo.

6 Magacooka makarĩhumbĩra na rũũa rũrĩa rwega rwa mbũri, makaigĩrĩra mbathiya ya rangi wa mburuu igũrũ, magacooka magatoonyia mĩtĩ ya kũrĩkuua.

7 Ningĩ nĩmarĩaraga gĩtambaya kĩa rangi wa mburuu methaini ya mũgate ũrĩa ũrutĩirwo MWATHANI, makaigĩrĩra igũrũ wakĩo thaani, mbakũri cia ũbaani, mbakũri cia mĩhothi, na ndigithũ cia ndibei ya igongoona. No mũhaka gũkoragwo kwĩ mĩgate meethainĩ.

8 Magacooka makaara gĩtambaya gĩtuune igũrũ wa indo icio ciothe, na hĩndĩ ciothe magacihumbĩra na rũũa rũrĩa rwega, magacooka magatoonyia mĩtĩ ya gũkuua meetha ĩyo.

9 Ningĩ makooya gĩtambaya kĩa rangi wa mburuu makahumbĩra mũtĩ wa gũcuuria mataawa, wĩ na mataawa maguo, mĩĩhato, turee, o hamwe na tũnyamũ tũrĩa twĩkĩragwo maguta ma mĩtamaiyũ tuothe.

10 Makawoha wothe hamwe na indo ciaguo ciothe na rũũa rũrĩa rwega, magacooka makaũigĩrĩra mĩtĩinĩ ya kũũkuua.

11 Thuutha wa ũguo magatambũrũkia gĩtambaya kĩa rangi wa mburuu igũrũ wa kĩgongoona kĩrĩa gĩa thahabu, magakĩhumbĩra igũrũ na rũũa rũrĩa rwega, magacooka magatoonyia mĩtĩ ya gũgĩkuua.

12 Ningĩ makooya indo ciothe iria ihũthagĩrwo thĩinĩ wa Handũ Harĩa Hatheru, magacioha na gĩtambaya kĩa rangi wa mburuu, magacihumbĩra igũrũ na rũũa rũrĩa rwega, magacooka magaciigĩrĩra mĩtĩinĩ ya gũcikuua.

13 Ningĩ makaruta mũhu kĩgongoonainĩ, magakĩhumbĩra na nguo ya rangi wa babũ.

14 Magacooka makaigĩrĩra igũrũ wakĩo indo ciothe iria ihũthagĩrwo gũgĩtungatĩrwo kĩgongoonainĩ, na nĩcio: ngĩo, njibe cia mĩtheece, iciko cia tĩĩri, na mbakũri. Marĩĩkia gwĩka ũguo magacihumbĩra ciothe na rũũa rũrĩa rwega, na magatoonyia mĩtĩ ya gũkuua.

15 Ihinda rĩa gũtharia kambĩ rĩakinya, mbarĩ ya Kohathu ĩgooka ĩgakuua indo iria theru Harũni na aariũ aake marĩĩkia gũcihumbĩra o hamwe na indo ciacio ciothe. No mbarĩ ya Kohathu ndĩkaanahuutie indo icio theru ndĩkaanakue.

Macio nĩ mo mawĩra ma mbarĩ ya Kohathu rĩrĩa rĩothe Hema ĩgũthaamio.

16 Naake Eleazaru mũrũ wa Harũni, mũthĩnjĩri Ngai, nĩ we ũrĩroraga Hema yothe, maguta ma mataawa, ũbaani, maguta ma kwamũrana, mĩhothi ya irio, na indo ciothe iria i thĩinĩ wa Hema iria irĩĩkĩĩtie kwamũrĩrwo MWATHANI.

17 MWATHANI akĩĩra Musa na Harũni atĩrĩ,

18 “Mũtikaareke andũ a mbarĩ ya Kohathu

19 mooragwo nĩ ũndũ wa gũkuhĩrĩria indo iria theru mũno. Nĩguo ũndũ ũcio ũrigĩrĩrio, Harũni na aariũ aake marĩtoonyaga thĩinĩ, makamahe o mũndũ wĩra wake, na makamwĩra kĩrĩa egũkuua.

20 No rĩĩrĩ, andũ a mbarĩ ya Kohathu mangĩtoonya thĩinĩ wa Hema moone athĩnjĩri Ngai makĩhaarĩria indo nĩguo ithaamio, no gũkua magakua.”

Wĩra wa Alawii a mbarĩ ya Gerishoni

21 Ningĩ MWATHANI akĩĩra Musa

22 atare Alawii a mbarĩ ya Gerishoni kũringana na nyũmba ciao,

23 na aandĩke marĩĩtwa ma arũme oothe a kuuma mĩaka mĩrongo ĩtatũ nginya mĩrongo ĩtaano, arĩa mangĩhota gũtungatĩra Hema ya gũtũnganwo.

24 Acio nĩ o meehokeirwo gũkuuaga indo ici:

25 Hema gũtũnganwo na kĩrĩa kĩamĩgitĩĩte na thĩinĩ na igũrũ, rũũa rũrĩa rwega rũmĩhumbĩire igũrũ, mbathiya cia harĩa hatoonyagĩrwo,

26 mbathiya na mĩhĩndo ya nja ĩrĩa ĩthiũrũrũkĩirie Hema o hamwe na kĩgongoona, mbathiya iria i mũromoinĩ wa nja ĩyo, hamwe na indo ciothe iria ihũthagĩrwo cia kũrũũgamia indo icio. O nĩ o marĩrutaga wĩra o wothe ũngĩbatarania wa indo icio.

27 Musa na Harũni magatiga moona atĩ andũ a mbarĩ ya Gerishoni nĩmaaruta mawĩra macio moothe na maakuua indo ciothe iria Harũni na aariũ aake mamanengera makuue.

28 Ũcio nĩguo wĩra wa mbarĩ ya Gerishoni thĩinĩ wa Hema; marĩcikuuaga kũringana na ũrĩa marĩonagĩrĩrio nĩ Ithamaru, mũrũ wa Harũni mũthĩnjĩri Ngai.

Wĩra wa Alawii a mbarĩ ya Merari

29 MWATHANI akĩĩra Musa atare Alawii a mbarĩ ya Merari kũringana na nyũmba ciao na mĩciĩ yao,

30 na aandĩke marĩĩtwa ma arũme oothe a mĩaka kuuma mĩrongo ĩtatũ nginya mĩrongo ĩtaano, arĩa mangĩhota gũtungatĩra Hema ya gũtũnganwo.

31 Acio nĩ o meehokeirwo gũkuuaga mĩratho, mĩgamba, itugĩ na njikarĩro cia Hema,

32 o hamwe na itugĩ, njikarĩro, higĩ, mĩhĩndo ya nja ĩrĩa ĩthiũrũrũkĩirie Hema, o hamwe na indo ciothe iria ihũthĩrĩĩtwo gũkĩrũũgamia. O mũndũ agakorwo na indo iria aagĩrĩirwo nĩgũkuua.

33 Macio nĩ mo mawĩra ma andũ a mbarĩ ya Merari ũtungatainĩ wa Hema. Marĩcikuuaga kũringana na ũrĩa marĩonagĩrĩrio nĩ Ithamaru mũrũ wa Harũni mũthĩnjĩri Ngai.

Gũtarwo kwa Alawii

34-48 Musa na Harũni magĩgĩĩka ũguo meerirwo nĩ MWATHANI, na me hamwe na atongoria a mũingĩ magĩtara mbarĩ ithatũ cia Alawii: mbarĩ ya Kohathu, Gerishoni, na Merari. Maamatarire kũringana na nyũmba ciao na mĩciĩ yao, magĩkĩandĩka marĩĩtwa ma arũme oothe arĩa maarĩ na mĩaka kuuma mĩrongo ĩtatũ nginya mĩaka mĩrongo ĩtaano, arĩa mangĩahotire gũtungata Hema ya gũtũnganwo. Mamaandĩkire ta ũũ:

Kohathu Ngiri igĩrĩ na magana mũgwanja na mĩrongo ĩtaano (2,750).
Gerishoni Ngiri igĩrĩ na magana matandatũ na mĩrongo ĩtatũ (2,630).
Merari Ngiri ithatũ na magana meerĩ (3,200).

Mũigana wa andũ a mbarĩ icio ithatũ warĩ ngiri inyaanya na magana mataano na mĩrongo ĩnaana (8,580).

49 O mũndũ agĩkĩandĩkwo o ta ũrĩa MWATHANI aathanĩĩte ahũthĩrĩĩte Musa; na o mũndũ akĩnengerwo wĩra wake wa gũtungata kana gũkuua, o ta ũrĩa MWATHANI aathanĩĩte ahũthĩrĩĩte Musa.

Andũ arĩa me thaahu

1 Naake MWATHANI akĩĩra Musa atĩrĩ,

2 “Ĩra andũ a Isiraeli maingate kuuma kambĩinĩ ciao mũndũ o wothe wĩ na mũrimũ mũũru wa ngoothi, kana ũroira, kana ũgwatĩĩtio thaahu nĩ kĩimba.

3 Ingataai arũme na atumia arĩa me na thaahu nĩ geetha matikaagwatie kambĩ thaahu kũrĩa njikaranagia na andũ aakwa.”

4 Andũ a Isiraeli magĩgĩathĩkĩra MWATHANI, magĩkĩmaingata oothe kuuma kambĩinĩ ciao.

Kũrĩhanĩrio nĩ ũndũ wa mahĩtia marĩa meekĩĩtwo

5 Ningĩ MWATHANI akĩĩra Musa

6 eere andũ a Isiraeli maũndũ maya: Mũndũ angĩkorwo atarĩ mwĩhokeku kũrĩ MWATHANI na agĩkĩhĩtĩrie mũndũ,

7 no mũhaka oimbũre meehia maake na akĩrĩhe thiirĩ wothe wa wĩhia ũcio, acooke oongerere mũndũ ũrĩa ahĩtĩirie gĩcunjĩ kĩa mĩrongo ĩĩrĩ harĩ igana gĩa thogora ũcio.

8 No rĩĩrĩ, mũndũ ũcio ũhĩtĩirio angĩkua, na gũtirĩ mũndũ ũrĩa matarainie mũno wĩ ho ũngĩrĩhwo, irĩhi rĩu nĩrĩnengeragwo MWATHANI rĩgatuĩka rĩa athĩnjĩri Ngai. Irĩhi rĩu rĩongereirwo harĩ ndũrũme ya horohio ĩrĩa ĩrutagwo ya gũthaahũra mũndũ ũrĩa wĩkĩĩte ũũru.

9 Na rĩĩrĩ, iheeo ciothe cia mwanya iria Aisiraeli marutagĩra MWATHANI nĩ cia athĩnjĩri Ngai arĩa marĩciamũkagĩra.

10 Iheeo iria mũthĩnjĩri Ngai arĩamũkagĩra irĩtuĩkaga ciake.

Ũhoro wa atumia arĩa me na athuuri marameekũũa

11 Ningĩ MWATHANI akĩĩra Musa

12-14 eere andũ a Isiraeli maũndũ maya. Mũndũ mũrũme ahota gwĩkũũĩra mũtumia wake atĩ ti mwĩhokeku na atĩ nĩethaahĩĩtie na ũndũ wa gũkoma na mũndũ mũrũme ũngĩ. No rĩĩrĩ, mũndũ mũrũme ũcio no akorwo ndarĩ na ma ya ũhoro ũcio, tondũ mũtumia aũigĩĩte wĩ hitho, na gũtirĩ mũira wa ũhoro ũcio, na ningĩ mũtumia ũcio ndaanyitirwo agĩĩka ũguo. Ningĩ mũndũ mũrũme no ahote gwĩkũĩra mũtumia wake o na angĩkorwo mũtumia nĩ mwĩhokeku.

15 Maũndũinĩ macio meerĩ-rĩ, mũndũ mũrũme arĩtwaraga mũtumia wake kũrĩ mũthĩnjĩri Ngai. O na agatwara kĩheeo gĩa kiro ĩmwe ya mũtu wa mbaarĩ, no ndakaũitĩrĩrie maguta ma mĩtamaiyũ kana ũbaani, amu kĩu nĩ kĩheeo kuuma kwĩ mũndũ mũrũme wĩkũũĩre mũtumia wake ũũru, na kĩrutĩĩtwo nĩ geetha ũũma ũmenyeke.

16 Naake mũthĩnjĩri Ngai akareehe mũtumia ũcio akamũrũũgamia mbere ya kĩgongoona,

17 agacooka ageekĩra maaĩ marĩa mamũre mbakũriinĩ ya rĩũmba, agacooka akoya tĩĩri ũrĩa wĩ kũu Hemainĩ ya gũtũnganwo akawĩkĩra maaĩinĩ nĩguo marũre.

18 Agacooka akoohora njuĩrĩ ya mũtumia ũcio, na ageekĩra mũtu ũrĩa wa kĩheeo mookoinĩ ma mũtumia ũcio. Mũthĩnjĩri Ngai akanyiita mbakũri ĩrĩa ĩ na maaĩ marĩa marũrũ mareehaga kĩrumi.

19 Mũthĩnjĩri Ngai agatũma mũtumia ũcio eetĩkĩre muuma ũrĩa ekũmũhe ta ũũ: “Angĩkorwo ndũthaarĩĩtie, ndũkũrĩo nĩ kĩrumi kĩrĩa maaĩ maya mareehaga.

20 No angĩkorwo nĩũtharĩĩtie,

21 MWATHANI arotũma rĩĩtwa rĩaku rĩtuĩke kĩrumi kũrĩ andũ aanyu. Arotũma nyũngũ yaku ya mwana ĩhiũke na nda yaku ĩimbe.

22 Maaĩ maya marotoonya nda yaku matũme ĩimbe na matũme nyũngũ yaku ya mwana ĩhiũke.”

Naake mũtumia agacookia atĩrĩ, “Nĩndeetĩkĩra; MWATHANI aroeka ũguo.”

23 Naake mũthĩnjĩri Ngai akaandĩka kĩrumi kĩu ibukuinĩ, agacooka agatharĩria maandĩko macio mbakũriinĩ ya maaĩ marĩa marũrũ.

24 Mũthĩnjĩri Ngai atanatũma mũtumia ũcio anyue maaĩ macio marũrũ, o macio mangĩtũma agĩe na ruwo rũnene mũno,

25 akooya mũtu ũrĩa wa kũhothwo kuuma mookoinĩ ma mũtumia ũcio akaũthũngũthia mbere ya MWATHANI, agacooka akaũruta kĩgongoonainĩ.

26 Agacooka akarũma ngundi ya mũtu ũcio akaũcinĩra kĩgongoonainĩ. Agacooka akanengera mũtumia ũcio maaĩ macio marũrũ akamanyua akĩonaga.

27 Angĩkorwo mũtumia ũcio nĩatharĩĩtie, maaĩ macio megũtũma aigue ruwo mũno, nda yake ĩimbe, nayo nyũngũ yake ya mwana ĩhiũke, narĩo rĩĩtwa rĩake rĩgĩtuĩke kĩrumi harĩ andũ aao.

28 No angĩkorwo ndatharĩĩtie, ndarĩ ũndũ mũũru angĩona na nĩarĩgĩaga na ciana.

29-30 Ũcio nĩguo watho ũrĩa ũrĩrũmagĩrĩrwo mũndũ mũrũme angĩigua ũiru na ekũũĩre atĩ mũtumia wake nĩatharĩĩtie. Mũtumia arĩrũũgamagio mbere ya kĩgongoona, naake mũthĩnjĩri Ngai akaruta igongoona rĩu.

31 Mũndũ mũrũme ndarĩkoragwo na mahĩtia, no mũtumia angĩkorwo nĩehĩĩtie, no mũhaka acookagĩrĩrwo nĩ wĩhia ũcio wake.

Mawatho ma Anaziri

1 Ningĩ MWATHANI akĩĩra Musa

2 ahe andũ a Isiraeli mawatho maya: Mũndũ mũrũme kana mũtumia o wothe ũkeehĩta atĩ nĩegũtuĩka Mũnaziri, akĩyamũrĩre MWATHANI,

3 ndakaanyuage ndibei kana njoohi o yothe. Ndakaananyue kĩndũ o gĩothe gĩthondekeetwo na thabibũ kana arĩe thabibũ ciũmithĩĩtio kana itoomithĩĩtio.

4 Rĩrĩa rĩothe egũtũũra e Mũnaziri ndakaanarĩe kĩndũ kiumanĩĩte na mũthabibũ, kĩrĩ mbegũ cia thabibũ kana makoro maacio.

5 Rĩrĩa rĩothe egũkorwo e rungu rwa mwĩhĩtwa wa Anaziri, ndakaaneenje njuĩrĩ cia mũtwe wake. Mũndũ ũcio egũtũũra e mũtheru nginya ihinda rĩake rĩrĩa aamũrĩire MWATHANI rĩthire. Nĩarĩrekagĩrĩa njuĩrĩ ciake inenehe.

6-7 Njuĩrĩ ciake nĩcio rũũri rwake rwa kwĩrutĩra MWATHANI, na ndakĩagĩrĩirwo nĩgwĩthaahia na ũndũ wa gũthiĩ hakuhĩ na kĩimba o na angĩkorwo nĩ gĩa ithe, nyina, mwanake, kana mũirĩĩtu maciaranĩirwo.

8 Rĩrĩa rĩothe e Mũnaziri-rĩ, arĩkoragwo aamũrĩirwo MWATHANI.

9 Na rĩĩrĩ, njuĩrĩ icio nyamũre cia Mũnaziri ingĩthaahio nĩ mũndũ na ũndũ wa gũkua o rĩmwe arigainie naake, no mũhaka eeterere mĩthenya mũgwanja nĩguo eenje njuĩrĩ; na njĩra ĩyo agagĩthirwo nĩ thaahu.

10 Mũthenya wa ĩnaana-rĩ, Mũnaziri ũcio arĩreehagĩra mũthĩnjĩri Ngai ndutuura igĩrĩ kana ndirahũgĩ igĩrĩ mũromoinĩ wa Hema ya gũtũnganwo.

11 Naake mũthĩnjĩri Ngai akaruta ĩmwe ĩrĩ igongoona rĩa meehia, nayo ĩyo ĩngĩ ĩrĩ igongoona rĩa njino, nĩ geetha Mũnaziri ũcio agĩtherio tondũ wa gũkorwo ahuutanĩĩtie na kĩimba. Mũthenya o ro ũcio akaamũra njuĩrĩ ciake rĩngĩ,

12 o na akaamũrĩra MWATHANI rĩngĩ mahinda maake. Ihinda rĩu rĩngĩ rĩothe rĩhĩtũku rĩtirĩtaragwo, amu njuĩrĩ ciake iria nyamũre nĩirathaahirio. Naake acooke arute gatũrũme ka mwaka ũmwe karĩ igongoona rĩa kũrĩhĩra meehia.

13 Mwĩhĩtwa wa Mũnaziri ũcio wathira, arĩtwaragwo mũromoinĩ wa Hema ya gũtũnganwo, akaruta igongoona.

14 Arĩrutagĩra MWATHANI igongoona rĩa gatũrũme ka mwaka ũmwe gatarĩ kaũũgũ karĩ igongoona rĩa njino, mwatĩ wa mwaka ũmwe ũtarĩ kaũũgũ ũrĩ igongoona rĩa meehia, na ndũrũme ĩtarĩ kaũũgũ ĩrĩ igongoona rĩa thaayũ.

15 O na akaruta mĩgate gĩkabũ kĩmwe ĩtarĩ mĩĩkĩre ndaawa ya kũimbia. Mĩgate mĩtungu ĩrugĩĩtwo na mũtu mũhinyu ũtukanĩĩtio na maguta ma mĩtamaiyũ, na mĩthuguiti ĩhakĩĩtwo maguta ma mĩtamaiyũ, oonganĩrĩrie na magongoona marĩa maagĩrĩire ma mũtu na ma ndibei.

16 Mũthĩnjĩri Ngai akĩrutĩre MWATHANI indo icio ciothe, o na akĩrute igongoona rĩa meehia na rĩa njino.

17 O na akĩrutĩre MWATHANI ndũrũme ĩyo ĩrĩ igongoona rĩa thaayũ, amĩrutanĩrie na mĩgate ĩrĩa ĩtarĩ mĩimbie ĩrĩ gĩkabũinĩ, na arute igongoona rĩa mũtu na rĩa ndibei.

18 Naake Mũnaziri e mũromoinĩ wa Hema ya gũtũnganwo eenje njuĩrĩ ciake, aciikie mwakiinĩ wa igongoona rĩa thaayũ.

19 Na rĩĩrĩ, kĩande kĩa ndũrũme kĩarugwo, mũthĩnjĩri Ngai akĩoe hamwe na mũgate ũmwe mũtungu ũtarĩ mwĩkĩre ndaawa ya kũimbia, na mũthugwiti ũmwe kuuma gĩkabũinĩ anengere Mũnaziri.

20 Thuutha ũcio mũthĩnjĩri Ngai acirutĩre MWATHANI irĩ kĩheeo kĩa mwanya. Rĩu nĩ igongoona rĩamũre rĩa mũthĩnjĩri Ngai, rĩonganĩrĩirio na gĩthũri na magũrũ ma ndũrũme, iria kũringana na watho ikoragwo irĩ cia mũthĩnjĩri Ngai. Thuutha wa ũguo Mũnaziri no akĩnyue ndibei.

21 Ũcio nĩguo watho wa Mũnaziri. No rĩĩrĩ, Mũnaziri angĩĩranĩra kĩndũ gĩkĩrĩĩte kĩrĩa aagĩrĩirwo nĩkũruta, no mũhaka ahingie kĩĩranĩro kĩu gĩake.

Ũrĩa mũthĩnjĩri Ngai arĩraathimanaga

22 MWATHANI akĩĩra Musa

23 eere Harũni na aariũ aake mahũthagĩre ciugo ici makĩraathima andũ a Isiraeli:

24 MWATHANI arokũraathima

na akũmenyerere;

25 MWATHANI arokũiguĩra tha

o na agũtuge;

26 MWATHANI arogũcũũthĩrĩria na wendo

na akũhe thaayũ.

27 Naake MWATHANI akiuga atĩrĩ, “Magweta rĩĩtwa rĩakwa makĩraathimana, nĩndĩraathimaga andũ a Isiraeli.”

Mĩhothi ya atongoria

1 Mũthenya ũrĩa Musa aarĩĩkirie kũrũũgamia Hema ya gũtũnganwo, nĩamĩitĩrĩirie maguta akĩmĩamũra o hamwe na indo ciayo ciothe, o na agĩitĩrĩria maguta na akĩamũra kĩgongoona hamwe na indo ciakĩo ciothe.

2 Na rĩĩrĩ, atongoria a mĩhĩrĩga ya Aisiraeli, na no o maarũũgamĩrĩire andũ magĩtarwo,

3 makĩreehere MWATHANI mĩhothi yao: makaari matandatũ na ndeegwa ikũmi na igĩrĩ: o atongoria eerĩ gĩkaari kĩmwe, na o mũtongoria ndeegwa ĩmwe. Marĩĩkia gũcinengerana,

4 MWATHANI akĩĩra Musa atĩrĩ,

5 “Amũkĩra iheeo icio irĩ cia kũhũthĩrwo wĩrainĩ ũrĩa ũrĩrutagwo wa Hema ya gũtũnganwo. Ineane kũrĩ Alawii kũringana na wĩra ũrĩa maagĩrĩirwo nĩkũruta.”

6 Kwoguo Musa akĩoya makaari macio o hamwe na ndeegwa icio agĩcinengera Alawii.

7 Akĩnengera aariũ a Gerishoni makaari meerĩ na ndeegwa inya,

8 nao aariũ a Merari akĩmanengera makaari mana na ndeegwa inyaanya. Maagĩrĩirwo nĩkũruta wĩra wao wothe marũũgamĩrĩirwo nĩ Ithamaru mũrũ wa Harũni.

9 No rĩĩrĩ, Musa ndaheire aariũ a Kohathu makaari kana ndeegwa, tondũ indo theru iria maamenyagĩrĩra ciagĩrĩirwo gũkuuo na ciande.

10 Ningĩ atongoria acio nĩmaarutire iheeo cia gũkũngũĩra kwamũrwo gwa kĩgongoona. Na rĩĩrĩ, rĩrĩa maareehage iheeo ciao kĩgongoonainĩ,

11 MWATHANI akĩĩra Musa atĩrĩ, “Meere atĩ handũinĩ ha mĩthenya ikũmi na ĩĩrĩ, o mũthenya mũtongoria ũmwe nĩ we ũrĩreehaga iheeo ciake cia kwamũrwo gwa kĩgongoona.”

12-83 Maarutire mĩhothi yao na mũtaratara ũyũ:

Wa mbere Juda Nahashoni mũrũ wa Aminadabu
Wa keerĩ Isakaru Nethaneli mũrũ wa Zuaru
Wa gatatũ Zebuluni Eliabu mũrũ wa Heloni
Wa kana Reubeni Elizuru mũrũ wa Shedeuru
Wa gataano Simeoni Shelumieli mũrũ wa Zurishadai
Wa gatandatũ Gadi Eliasafu mũrũ wa Dueli
Wa mũgwanja Efiraimu Elishama mũrũ wa Amihudi
Wa kanaana Manase Gamalieli mũrũ wa Pedahuzuri
Wa kenda Benjamini Abidani mũrũ wa Gideoni
Wa ikũmi Dani Ahiezeri mũrũ wa Amishadai
Wa ikũmi na ũmwe Asheri Pagieli mũrũ wa Okurani
Wa ikũmi na ĩĩrĩ Nafutali Ahira mũrũ wa Enani.

Indo cia igongoona iria o mũndũ aareehaga nĩciahaanaine, nacio ciarĩ: Mbakũri ĩmwe ya betha ĩ na ũritũ wa kiro ĩmwe na nuthu, na mbeeceni ĩmwe ya betha ĩ na ũritũ wa ngiramu magana manaana, kũringana na gĩthimi kĩrĩa kĩiguanĩirwo, cierĩ ciyũire mũtu ũtukanĩĩtio na maguta ũrĩ igongoona rĩa mũtu; thaani ĩmwe ya thahabu ĩ na ũritũ wa ngiramu igana na ikũmi ĩiyũire ũbaani; gateegwa kamwe, ndũrũme ĩmwe, na gatũrũme ka mwaka ũmwe irĩ cia igongoona rĩa njino; thenge ĩmwe ĩrĩ ya igongoona rĩa meehia; ndeegwa igĩrĩ, ndũrũme ithaano, thenge ithaano, na tũtũrũme tũtaano twa mwaka ũmwe irĩ cia igongoona rĩa thaayũ.

84-88 Mũigana wa mĩhothi yothe ĩrĩa yarutagwo nĩ atongoria acio ikũmi na eerĩ ya kwamũrwo gwa kĩgongoona yarĩ ta ũũ:

— mbakũri ikũmi na igĩrĩ cia betha, na mbeeceni ikũmi na igĩrĩ cia betha ciothe irĩ hamwe i na ũritũ wa kiro mĩrongo ĩĩrĩ na mũgwanja na boiniti ithathatũ;

— thaani ikũmi na igĩrĩ cia thahabu ciothe cia ũritũ wa kiro ĩmwe na boiniti mĩrongo ĩtatũ na igĩrĩ ituranĩirwo, ciyũire ũbaani;

— ndeegwa ikũmi na igĩrĩ, ndũrũme ikũmi na igĩrĩ, tũtũrũme ikũmi na twĩrĩ twa mwaka ũmwe, hamwe na mũhothi wa mũtu ũrĩa ũrutanagĩrio natuo, irĩ cia igongoona rĩa njino;

— thenge ikũmi na igĩrĩ irĩ cia igongoona rĩa meehia;

— ndeegwa mĩrongo ĩĩrĩ na inya, ndũrũme mĩrongo ĩtandatũ, thenge mĩrongo ĩtandatũ, na tũtũrũme mĩrongo ĩtandatũ twa mwaka ũmwe, irĩ cia igongoona rĩa thaayũ.

89 Rĩrĩa Musa aatoonyire Hemainĩ ya gũtũnganwo aarie na MWATHANI, akĩigua MWATHANI akĩmwarĩria arĩ igũrũ wa gĩkunĩko gĩa Ithandũkũ rĩa Kĩrĩĩkanĩro, e gatagatĩ ga ciũmbe iria igĩrĩ irĩ mathagu.

Gwĩkĩra mataawa

1 MWATHANI akĩĩra Musa atĩrĩ,

2 “Ĩra Harũni atĩ agĩĩkĩra mataawa marĩa mũgwanja mũtĩinĩ wa kũhangĩrwo mataawa, amaige ũguo atĩ nĩmarĩmũrĩkaga mwena wa na mbere wa mũtĩ ũcio.”

3 Harũni nĩathĩkire, agĩkĩiga mataawa macio maroreete mwena wa na mbere wa mũtĩ ũcio wa kũhangĩrwo mataawa.

4 Kuuma igũrũ nginya thĩ mũtĩ ũcio wa kũhangĩrwo mataawa wathondekeetwo na thahabu ndure; wathondekeetwo kũringana na mũthondekere ũrĩa MWATHANI ooneetie Musa.

Gũtherio na kwamũrwo kwa Alawii

5 Ningĩ MWATHANI akĩĩra Musa atĩrĩ,

6 “Amũrania Alawii na andũ acio angĩ a Isiraeli ũmatherie

7 na njĩra ĩno: Maminjaminjĩrie maaĩ ma gũtherania, ũcooke ũmeere meenje mĩĩrĩ yao yothe, na mathambie nguo ciao. Hĩndĩ ĩyo nĩmegũkorwo matarĩ na thaahu.

8 Macooke mooe gateegwa na indo iria ciagĩrĩire cia igongoona rĩa mũtu na nĩcio: mũtu mũhinyu ũtukanĩĩtio na maguta ma mĩtamaiyũ, na ũthiĩ na gateegwa kangĩ ga kũrutwo igongoona rĩa meehia.

9 Ũcooke ũcookanĩrĩrie mũingĩ wothe wa Isiraeli, na ũrũũgamie Alawii mbere ya Hema ya gũtũnganwo.

10 Nao andũ a Isiraeli maigĩrĩre mooko maao mĩtweinĩ ya Alawii.

11 Naake Harũni anyamũrĩre Alawii marĩ kĩheeo kĩa mwanya kuuma kũrĩ Aisiraeli, nĩ geetha marutage wĩra wakwa.

12 Alawii nao macooke maigĩrĩre mooko maao mĩtweinĩ ya tũteegwa tũrĩa twĩrĩ, kamwe karutwo igongoona rĩa meehia, nako kau kangĩ igongoona rĩa njino, nĩ geetha ũhoroherie Alawii.

13 “Amũra Alawii marĩ kĩheeo kĩa mwanya harĩ niĩ, ũcooke ũtue Harũni na aariũ aake anene aao.

14 Amũrania Alawii na andũ acio angĩ na njĩra ĩyo, nĩ geetha matuĩke andũ aakwa.

15 Warĩĩkia gũtheria na kwamũra Alawii-rĩ, nĩmegũkorwo meetĩkĩrĩĩtio kũruta wĩra Hemainĩ ya gũtũnganwo.

16 Nĩndĩyoeire Alawii matuĩke aakwa kĩũmbe handũinĩ ha aariũ oothe a marigithaathi a andũ a Isiraeli.

17 Rĩrĩa ndooragire marigithaathi moothe ma andũ a Misiri, nĩndaamũrire aariũ oothe a marigithaathi ma Aisiraeli, o na ma mahiũ matuĩke maakwa.

18 Rĩu nĩndooya Alawii handũinĩ ha marigithaathi moothe ma Aisiraeli.

19 Nĩndamanenganĩra kũrĩ Harũni na aariũ aake marĩ kĩheeo kuuma kũrĩ Aisiraeli, marutagĩre Aisiraeli wĩra Hemainĩ ya gũtũnganwo, na mamagitagĩre kuuma harĩ mũthiro ũrĩa ũngĩmanyiita mangĩkuhĩrĩria Handũ Harĩa Hatheru.”

20 Kwoguo Musa, Harũni na andũ oothe Aisiraeli makĩamũra Alawii o ta ũrĩa MWATHANI aathĩĩte Musa.

21 Alawii magĩgĩĩtheria, na magĩthambia nguo ciao, naake Harũni akĩmaamũrĩra MWATHANI marĩ kĩheeo kĩa mwanya. O na ningĩ nĩarutire igongoona rĩa kũmatheria.

22 Andũ magĩgĩĩka Alawii maũndũ moothe marĩa Ngai aathĩĩte Musa mameeke. Kwoguo Alawii magĩĩtĩkĩrio kũruta wĩra thĩinĩ wa Hema ya gũtũnganwo marũũgamĩrĩirwo nĩ Harũni na aariũ aake.

23 Ningĩ MWATHANI akĩĩra Musa atĩrĩ,

24 “Mũlawii arĩambagĩrĩria kũruta wĩra Hemainĩ ya gũtũnganwo e wa mĩaka mĩrongo ĩĩrĩ na ĩtaano,

25 na akinyia mĩaka mĩrongo ĩtaano akahuurũka.

26 Thuutha wa ũguo no ateithagĩrĩrie Alawii arĩa angĩ mawĩrainĩ maao thĩinĩ wa Hema, no ndakaarutage wĩra o na ũmwe e wiki. Ũguo nĩguo wagĩrĩirwo nĩkũbanga wĩra wa Alawii.”

Bathaka ya keerĩ

1 Na rĩĩrĩ, MWATHANI nĩarĩirie Musa werũinĩ wa Sinai mweriinĩ wa mbere wa mwaka wa keerĩ kuuma andũ a Isiraeli moima Misiri. Aamwĩrire atĩrĩ,

2-3 “Mũthenya wa ikũmi na ĩna mweriinĩ ũyũ, kwambĩrĩria riũa rĩgĩthũa, andũ a Isiraeli no mũhaka makũngũĩre Bathaka kũringana na mawatho maayo moothe na mũtaratara wayo.”

4 Kwoguo Musa akĩĩra andũ makũngũĩre Bathaka,

5 nao magĩĩka ũguo riũa rĩgĩthũa mũthenya wa ikũmi na ĩna wa mweri wa mbere werũinĩ wa Sinai. Andũ magĩgĩĩka maũndũ moothe o ta ũrĩa MWATHANI aathĩĩte Musa.

6 No nĩkwarĩ na andũ amwe maarĩ na thaahu nĩ ũndũ nĩmaahuutĩĩtie kĩimba, na matingĩakĩhotire gũkũngũĩra Bathaka mũthenya ũcio. Nao magĩthiĩ kwĩ Musa na Harũni

7 makĩmeera atĩrĩ, “Ithuĩ twĩ na thaahu nĩ ũndũ nĩtũrahuutĩĩtie kĩimba, no rĩĩrĩ, nĩ kĩĩ gĩkũgiria o na ithuĩ tũrutĩre MWATHANI iheeo ciitũ twĩ hamwe na Aisiraeli arĩa angĩ ihindainĩ rĩrĩa rĩtuĩtwo?”

8 Naake Musa akĩmacookeria atĩrĩ, “Etereraai nginya rĩrĩa ndĩrĩamũkĩra mataaro kuuma kũrĩ MWATHANI.”

9 MWATHANI akĩĩra Musa

10 eere andũ a Aisiraeli atĩrĩ, “Rĩrĩa mũndũ o wothe wanyu, kana wa rũciaro rwanyu agaakorwo arĩ na thaahu nĩ ũndũ wa kũhuutia kĩimba kana arĩ rũgendoinĩ, na no arenda gũkũngũĩra Bathaka,

11 mũndũ ũcio nĩetagĩrĩre akaamĩkũngũĩra thuutha wa mweri ũmwe hwaĩinĩ wa mũthenya wa ikũmi na ĩna mweriinĩ wa keerĩ. Akaamĩkũngũĩra na mũgate ũtarĩ mwĩkĩre ndaawa ya kũimbia na nyeni ndũrũ.

12 Mũtigaatigie irio o na niini nginya rũũciinĩ, na mũtikoinage ihĩndĩ o na rĩmwe rĩa nyamũ ĩyo. Bathaka nĩkũngũagĩrwo kũringana na mũtaratara wayo wothe.

13 No rĩĩrĩ, mũndũ o wothe ũtarĩ na thaahu, na ndathiĩte rũgendo, ũrĩagaga gũkũngũĩra Bathaka, ndarĩcookaga gũtuĩka ũmwe wa andũ aakwa, amu nĩagire kũũndutĩra iheeo ihinda rĩrĩa rĩamũre. No mũhaka acookagĩrĩrwo nĩ meehia maake.

14 “Mũrũũrĩrĩ ũrĩa ũtũũranagia na inyuĩ angĩenda gũkũngũĩra Bathaka, no mũhaka amĩkũngũĩre kũringana na mawatho na mũtaratara wayo. Watho no o ro ũmwe kũrĩ Aisiraeli na kũrĩ andũ a ndũũrĩrĩ.”

Itu rĩtariĩ ta mwaki

15-16 Na rĩĩrĩ, mũthenya ũrĩa Hema ya gũtũnganwo yakirwo, itu rĩgĩũka rĩkĩmĩhumbĩra. Ũtukũ itu rĩu rĩahaanaga ta mwaki.

17 O hĩndĩ ĩrĩa itu rĩu rĩehera igũrũ wa Hema ĩyo, andũ a Isiraeli makaambũra hema ciao magathiĩ magaciamba harĩa itu rĩu rĩngĩathiire rĩrũũgame.

18 Andũ maambũraga hema ciao maathwo nĩ MWATHANI, na magacooka magathiĩ magaciamba maathwo nĩ we. Ihinda rĩrĩa rĩothe itu rĩngĩarũũgamire igũrũ wa Hema ya gũtũnganwo, maikaraga kambĩ o ro ĩyo.

19 O na itu rĩngĩaikarire igũrũ wa Hema matukũ maingĩ, andũ a Isiraeli matioinaga watho wa MWATHANI, na matiathiaga na mbere.

20 Mahinda mamwe itu nĩrĩaikaraga Hema igũrũ mĩthenya ĩtarĩ mĩingĩ; no rĩĩrĩ, maakoragwo me kambĩ kana magĩthiĩ kũringana na watho wa MWATHANI.

21 Mahinda mamwe itu rĩaikaraga kuuma hwaĩinĩ nginya rũũciinĩ, na maathaamaga o rĩrĩa itu rĩngĩeherire. Itu rĩa kũũrĩrĩra, nao magakũũrĩrĩra.

22 O na angĩkorwo nĩ mĩthenya ĩĩrĩ, mweri, mwaka, o na kana makĩria ma mwaka, matingĩathire na mbere ihindainĩ rĩrĩa rĩothe itu rĩakoragwo rĩ igũrũ wa Hema; no itu rĩakũũrĩrĩra, nao magakũũrĩrĩra.

23 Maambaga na makaambũra hema ciao magĩathĩkĩra mawatho marĩa MWATHANI aamaathaga ahũthĩrĩĩte Musa.