Arĩa aaganu kwĩrira
1 Hingo ĩyo-rĩ, mũndũ ũrĩa mũthingu akaarũũgama na ũcamba,
mang’ethanire na arĩa maamũhinyĩrĩirie,
arĩa mateeciiragia o na haniini igũrũ rĩa mathĩĩna maake.
2 Nao me mbere yake nĩkũinaina makainaina marĩ na guoya mũnene,
magegeare nĩ ũrĩa ahonokeetio narua.
3 Nĩmakeerira ũrĩa meekire magĩcaayaga me na ruo ngoro
meerane mũndũ na ũrĩa ũngĩ atĩrĩ,
4 “Mũndũ ũyũ nĩ we twathekagĩrĩra na twamenaga.
Kaĩ twarĩ irimũ-ĩ!
Tuonaga ta arĩ kũgũrũka agũrũkĩĩte,
na marigĩrĩrio maake ta kĩndũ gĩtarĩ kĩene.
5 Rĩu-rĩ, gũtuĩkĩĩte atĩa
atarwo ta ũmwe wa ciana cia Ngai?
Aheetwo gĩikaro hamwe na atheru atĩa?
6 Ti itherũ, ithuĩ nĩgũtheema twatheemire njĩra ya ũũma.
Ũtheri wa ũthingu ndwatwarĩire,
na riũa rĩaguo rĩtianatũrathĩra.
7 Gũtirĩ njĩra o na ĩmwe ya ũmaramari na ya rĩũra tũtaagereire.
Twathiagĩra werũinĩ kũrĩa gũtaarĩ njĩra
na tũtiigana kũmenya njĩra ya Mwathani.
8 Wĩtĩĩi witũ-rĩ, rĩu ũgũtũguna nakĩ?
Ũtonga na kwĩraha gwitũ-rĩ, nĩkĩ ituoneire?
9 Maũndũ macio moothe-rĩ, maahĩtũkire o ta kĩĩruru.
Maahĩtũkire o ta mũhuuhu ũtegwatĩrĩire.
10 “O ta meeri ĩrĩa ĩhĩtũkagĩra kĩhuuhũkanioinĩ kĩnene
na ndĩtige rũũri o na rũrĩkũ rwayo makũmbĩinĩ ma maaĩ.
11 O na kana ta nyoni ĩthiagĩra rĩerainĩ ĩtegũtiga mũgirito wa njĩra ĩrĩa yagerera.
Ĩgayanagia rĩera na kũbatabata kwa mathagu maayo
ikarĩtema na ihenya, ĩgathiĩ na mbere yũmbũkĩĩte na ihenya
na thuutha ũcio gũtionagwo harĩa yagerera.
12 Kana o ta mũguĩ ũthimithĩĩtio handũ,
ũgathiĩ ũguo atĩ mũndũ ndangĩmenya
kũrĩa mũguĩ ũcio wahĩtũkĩra.
13 Ũguo noguo na ithuĩ tũhaana,
tondũ twaciarwo o ro ũguo, norĩo twabuĩririe.
Tũtingĩhota kuonania rũũri o na rũmwe rwa ũthingu.
No gũthirĩrĩkĩra twathirĩrĩkĩire thĩinĩ wa waganu witũ.”
14 Kwoguo-rĩ, nĩ ma atĩ kĩĩrĩgĩrĩro kĩa eeki naaĩ,
nĩ ta mahuti marĩa moombũragwo nĩ rũhuuho.
No ta rũkũngũ rũrĩa rũmbũragwo
nĩ kĩhuuhũkanio kĩa rũhuuho,
kĩhuurunjũkaga o ta ndoogo
yũmbũrĩĩtwo nĩ rũhuuho,
na gĩthiraga o ta kĩririkano kĩa
mũgeni wa mũthenya ũmwe.
15 Andũ arĩa athingu-rĩ magatũũra tene na tene
na ũtugi wao ũrĩ thĩinĩ wa Mwathani.
Ũrĩa Ũrĩ Igũrũ Mũno nĩ we ũmabaaragĩrĩra.
16 Kwoguo nĩmakaamũkĩra thũmbĩ ya ũthamaki ya riiri,
na itunga rĩa ũthaka kuuma guokoinĩ kwa Mwathani,
nĩ gũkorwo nĩakaamahitha na guoko gwake kwa ũrĩo,
nayo njara yake ĩtuĩke ngo yao.
17 Akooya wendo wake ũrĩa ũtangĩĩtiirio,
ũtuĩke matharaita maake ma mbaara.
Nĩakaanengera ciũmbe ciothe matharaita ma kũherithia thũ ciake.
18 Ũthingu-rĩ nĩguo akeehumba ta gako ga kũgitĩra gĩthũri.
Nakuo gũtuanĩra ciira gwake kũrĩa gwa kĩhooto-rĩ,
agwĩkĩre ta ngobia.
19 Ũtheru ũrĩa ũtangiunwo mũtĩ-rĩ, akawoya o ta arĩ ngo.
20 Nĩkũnoora akanoora rũhiũ rwa njora rwa matũkũya maake.
Na thĩ yothe nĩgaathiĩ hamwe naake
makahũũrane na andũ arĩa matarĩ kĩhaarĩro.
21 Ũta wa rũheni-rĩ, nĩũkaarekagĩrĩria mĩguĩ ĩrĩ mĩgereke wega biũ
na ĩgaathĩrĩrĩkagĩra harĩa yoroteete yumĩĩte matuinĩ
o ta kuuma thiakainĩ ũrĩa ũiyũire biũ.
22 Nakĩo kĩgũtha-rĩ, gĩgaikagia mahiga ma mbura na ũrũrũ mũno.
Maaĩ ma iria namo nĩmakaamoomokera na hinya,
nacio njũũĩ imaiyũrĩrĩre o kũmaiyũrĩrĩra itarĩ na tha.
23 Nayo mĩhũũmũ ya Mwene Hinya Wothe ĩkaahuruutana ĩmeerekeire
ĩmoombũre o ta mahuti moombũrĩĩtwo nĩ rũhuuho rũnene.
Kwoguo-rĩ, kũregenyũka nĩgũkaareehere thĩ mũthiro,
naguo ũtũrĩka ũharũrũkie itĩ cia arĩa marĩ hinya.