Ihooya rĩa kũũria Ngai ahoote thũ cia Isiraeli
1 Wee, Ngai, tiga gũkira;
tiga gũikara ũhooreire na wĩnyiitanĩirie!
2 Atĩrĩĩrĩ, thũ ciaku nĩkũnegena iranegena;
arĩa magũthũire nĩkũng’athia mang’athĩĩtie.
3 Marabanga na hitho ũrĩa mekũũnũha andũ aaku;
maraciira ũũru igũrũ rĩa andũ arĩa wee ũmenyagĩrĩra.
4 Mareerana atĩrĩ, “Ũkaai twanange rũũrĩrĩ rwao
nĩguo rĩĩtwa rĩa Isiraeli rĩtikaanaririkanwo rĩ o rĩ.”
5 Nĩmaiguithanĩirie ũrĩa mabangĩĩte gwĩka
na makaiguithanĩria magũũkĩrĩre:
6 andũ a Edomu na a Ishumaeli;
andũ a Moabi na a Hagari;
7 andũ a Gebali, Aamoni, Aamaleki,
Filisitia, na Turo.
8 O nao Aasiria nĩmeturanĩire nao
nĩguo mateithĩrĩrie na ũcamba njiarwa cia Loti,
nĩcio Aamoni na Amoabi.
9 Meeke ta ũrĩa wekire Amidiani,
na ta ũrĩa wekire Sisera na Jabini rũũĩinĩ rwa Kishoni.
10 Wamahooteire Enidori,
nayo mĩĩrĩ yao ĩkĩbuthĩra thĩ.
11 Ĩka atongoria aao ũrĩa wekire Orebu na Zeebu;
hoota aathani aao oothe
ta ũrĩa wahootire Zeba na Zalimuna,
12 arĩa moigire atĩrĩ, “Nĩtwĩgwatĩre bũrũri
ũrĩa wĩ wa Ngai ũtuĩke witũ.”
13 Tondũ ũcio, mahurunje ta rũkũngũ, Ngai;
moombũre ta ũrĩa mahuti moombũragwo nĩ rũhuuho.
14-15 Maingatithie na kĩhuuhũkanio gĩaku,
na ũmaguoyohie na huuho ciaku iria ihuruutanaga na hinya.
Mateng’erie ta mwaki ũgĩcina mũtitũ,
kana ta nĩnĩmbĩ igĩciana irĩma.
16 Humba moothiũ maao na thoni, MWATHANI,
nĩguo meetĩkie atĩ wee ũrĩ hinya.
17 Marotoorio na maguoyohio nginya tene na tene;
marokua na gĩconoko kĩnene.
18 Maromenya atĩ wee wiki, nĩ we MWATHANI,
mũthamaki ũrĩa mũnene wathaga thĩ yothe.