Jesũ kũriũka
1 Nayo Thabatũ yathira, mũthenya wa kiumia rũũciinĩ tene, Mariamu Mũmagidali na Mariamu ũcio ũngĩ magĩthiĩ kũrora mbĩĩrĩra.
2 O rĩmwe gũkĩgĩa na gĩthingithia kĩnene; mũraika wa Mwathani agĩikũrũka kuuma igũrũ, akĩgaragaria ihiga akĩrĩthengia na akĩrĩikarĩra.
3 Mũraika ũcio ookire ahaana rũheni, nguo ciake ciarĩ njerũ o ta ira.
4 Nao arangĩri makĩmaka mũno na makĩinaina, makĩhaana ta andũ makuĩte.
5 Naake mũraika ũcio akĩĩra atumia acio atĩrĩ, “Tigaai gwĩtigĩra, nĩ amu nĩnjũũĩ mũracaria Jesũ ũrĩa ũrambĩĩtwo.
6 Ndarĩ haaha; nĩariũkĩĩte o ta ũrĩa oigire. Tookaai muone harĩa araarĩ.
7 Rĩu thiĩi narua mwĩre arutwo aake atĩrĩ, ‘Nĩariũkĩĩte kuuma kũrĩ akuũ, na nĩegũthiĩ Galili mbere yanyu, na kũu nĩkuo mũrĩmuona!’ Ririkanaai ũguo ndamwĩra.”
8 Nao makiuma mbĩĩrĩrainĩ na ihenya mamakĩĩte no marĩ na gĩkeno, magĩteng’era kwĩra arutwo aake.
9 Na rĩĩrĩ, o rĩmwe Jesũ agĩtũnga atumia acio akĩmeera atĩrĩ, “Mũrĩ eega!” Nao magĩthiĩ harĩ we, makĩmũnyiita magũrũ na makĩmũthaathaiya.
10 Naake akĩmeera atĩrĩ, “Tigaai gwĩtigĩra. Thiĩi mwĩre aariũ a Awa mathiĩ Galili, kũu nĩkuo makaanyona.”
Ũrĩa arangĩri moigire
11 Hĩndĩ ĩrĩa atumia acio maathiire, arangĩri amwe magĩcooka itũũrainĩ, makĩĩra athĩnjĩri Ngai arĩa anene ũrĩa wothe gwekĩkĩĩte.
12 Nao athĩnjĩri Ngai acio magĩcemania na athuuri, magĩthondeka mũbango wao. Makĩhe arangĩri acio mbeeca makĩmeera atĩrĩ,
13 “Mũkuuga atĩ arutwo aake marookire ũtukũ maraiya mwĩrĩ wake mwĩ toro.
14 Barũũthi angĩigua ũguo nĩtũkũmwĩra atĩ mũtiĩhĩĩtie, nĩ ũndũ ũcio mũtikaae gwĩtigĩra.”
15 Nao arangĩri makĩoya mbeeca, magĩgĩĩka ũrĩa meerĩĩtwo meeke. Na ũguo nĩguo Ayahudi matũire moigaga kinyagia ũũmũũthĩ.
Jesũ kuumĩrĩra arutwo aake
16 Nao arutwo arĩa ikũmi na ũmwe magĩthiĩ Galili kĩrĩmainĩ kũrĩa Jesũ aameerĩĩte mathiĩ.
17 Nao mamuona makĩmũthaathaiya o na gũtuĩka amwe aao maarĩ na nganja.
18 Naake Jesũ akĩmakuhĩrĩria akĩmeera atĩrĩ, “Nĩheetwo ũhoti wothe kũũrĩa igũrũ o na gũũkũ thĩ.
19 Nĩ ũndũ ũcio thiĩi kũrĩ andũ oothe kũndũ guothe mũmatue arutwo aakwa, mũkĩmabatithagia thĩinĩ wa rĩĩtwa rĩa Ithe, na rĩa Mũũriũ na rĩa Roho Mũtheru,
20 na mũmarute gwathĩkĩra maũndũ moothe marĩa ndĩmwathĩĩte. Na nĩndĩkoragwo na inyuĩ hĩndĩ ciothe kinyagia ithirĩro rĩa mahinda.”