Jesũ gũtwarwo kwĩ Pilato
1 Na rĩĩrĩ, rũũciinĩ tene athĩnjĩri Ngai arĩa anene oothe na athuuri makĩrĩĩkanĩra atĩ mooragithie Jesũ,
2 nao makĩmuoha na mĩnyororo, makĩmũtwara kwĩ Pilato ũrĩa warĩ Barũũthi Mũroma.
Gĩkuũ kĩa Judasi
3 Hĩndĩ ĩrĩa Judasi ũrĩa wakunyanĩire Jesũ aamenyire atĩ Jesũ nĩatuĩrĩirwo gũkua, akĩĩrira na agĩcookia icunjĩ iria mĩrongo ĩtatũ cia betha kũrĩ athĩnjĩri Ngai arĩa anene na athuuri akĩmeera atĩrĩ,
4 “Nĩnjĩhĩĩtie nĩ ũndũ wa gũkunyanĩra mũndũ ũtehĩĩtie nĩguo ooragwo.”
Nao makĩmũũria atĩrĩ, “Ũcio ũkĩrĩ ũhoro witũ? Githĩ ũcio ti ũhoro waku?”
5 Naake Judasi agĩikania icunjĩ icio cia betha thĩinĩ wa Hekaarũ, akiuma agĩthiĩ akĩĩita.
6 Nao athĩnjĩri Ngai arĩa anene makĩoya mbeeca icio makiuga atĩrĩ, “Ici nĩ mbeeca ciumanĩĩte na thakame, na Watho witũ ndwĩtĩkĩrĩĩtie tũcituranĩre na mũhothi wa Hekaarũ.”
7 Nao maacookania ndundu makĩiguithania atĩ magũre gĩthaka kĩa Mũũmbi Nyũngũ gĩtuĩke gĩa gũthikagwo ageni.
8 Nĩkĩo kinya o na ũũmũũthĩ gĩthaka kĩu gĩĩtagwo, “Gĩthaka gĩa Thakame.”
9 Nacio ciugo iria ciarĩĩtio nĩ mũnabii Jeremia igĩkĩhinga harĩa oigĩĩte atĩrĩ, “Nĩmoire mbeeca iria mĩrongo ĩtatũ cia betha, thogora ũrĩa andũ a Isiraeli meetĩkĩrĩĩte kũrĩha nĩ ũndũ wake.
10 Magĩcitũmĩra na kũgũra gĩthaka kĩa Mũũmbi Nyũngũ kũringana na ũrĩa Mwathani aanjathĩĩte.”
Jesũ gũciirithio nĩ Pilato
11 Na rĩĩrĩ, Jesũ arũũgama mbere ya Barũũthi Mũroma, Barũũthi ũcio akĩmũũria atĩrĩ, “Wee nĩ we mũthamaki wa Ayahudi?”
Naake Jesũ akĩmũcookeria atĩrĩ, “Nĩ we woiga ũguo.”
12 No ndarĩ ũndũ aacookirie igũrũ rĩa maũndũ marĩa aathitangagwo namo nĩ athĩnjĩri Ngai arĩa anene na athuuri.
13 Nĩ ũndũ ũcio Pilato akĩmũũria atĩrĩ, “Kaĩ ũtaraigua maũndũ macio moothe maragũthitanga namo?”
14 Jesũ ndacookirie ũndũ o na ũmwe, na nĩ ũndũ ũcio Barũũthi akĩgega mũno.
Jesũ gũtuĩrwo kũũragwo
15 Na rĩĩrĩ, o thigũkũ ya Bathaka yakinya, Barũũthi nĩamenyereete kuohorera andũ mũohwo ũmwe o ũrĩa mangĩoririe.
16 Hĩndĩ ĩyo nĩkwarĩ na mũndũ ũmwe woheetwo na woĩkaine mũno wetagwo Baraba.
17 Hĩndĩ ĩrĩa andũ moonganire, Pilato akĩmooria atĩrĩ, “Nũũ mũkwenda ndĩmuohorere? Nĩ Baraba kana nĩ Jesũ ũrĩa wĩtagwo Mesia?”
18 We nĩamenyaga wega biũ atĩ atongoria a Ayahudi maareeheete Jesũ kũrĩ we nĩ ũndũ wa ũiru.
19 Na rĩĩri, rĩrĩa Pilato aarĩ kũu nyũmbainĩ ĩrĩa yatuithanagĩrio maciira, mũtumia wake akĩmũtũmanĩra akĩmwĩra atĩrĩ, “Ndũkaae kũhuutia mũndũ ũcio nĩ ũndũ ndarĩ ũũru eekĩĩte, nĩ ũndũ hwaĩ nĩndĩrathĩĩnĩkire mũno kĩrootoinĩ igũrũ rĩake.”
20 Nao athĩnjĩri Ngai arĩa anene na athuuri makĩringĩrĩria andũ meere Pilato amoohorere Baraba no ooragithie Jesũ.
21 No Pilato akĩũria andũ atĩrĩ, “Andũ aya eerĩ-rĩ, nũũ mũkwenda ndĩmuohorere?”
Nao makiuga atĩrĩ, “Nĩ Baraba!”
22 Ningĩ akĩmooria atĩrĩ, “Mũgũkĩenda njĩke atĩa na Jesũ ũyũ wĩtagwo Mesia?”
Nao oothe makĩanĩrĩra atĩrĩ, “Mwambe!”
23 No Pilato akĩmooria atĩrĩ, “Nĩ ũũru ũrĩkũ eekĩĩte?”
Nao makĩanĩrĩra makĩria: “Mwambe!”
24 Hĩndĩ ĩrĩa Pilato oonire atĩ gũtiarĩ na bata wa gũthiĩ na mbere, na akĩona atĩ nĩgũkuuma mbaara, akĩoya maaĩ agĩĩthamba mooko mbere ya andũ akiuga atĩrĩ, “Niĩ ndirĩ ho igũrũ rĩa thakame ya mũndũ ũyũ! Nĩ ũhoro wanyu!”
25 Nao andũ oothe magĩcookia, “Reke thakame yake ĩtũcookerere ithuĩ hamwe na ciana ciitũ!”
26 Pilato agĩkĩmoohorera Baraba; na arĩĩkia kũhũũrithia Jesũ na kĩboko, akĩmũneana akaambwo.
Thigari gũthirĩkia Jesũ
27 Hĩndĩ ĩyo thigari cia Pilato igĩtwara Jesũ mũciĩ kwa Barũũthi ũcio Mũroma, nacio thigari ciothe cia mbũtũ ĩyo igĩũka ikĩmũrigiicĩria.
28 Igĩcooka ikĩmũruta nguo ciake ikĩmwĩkĩra nguo nduune,
29 ikĩmũthondekera thũmbĩ ya mĩigua ikĩmwĩkĩra mũtwe, na ikĩmũnyiitithia karũthanju guoko kwa ũrĩo. Igĩcooka ikĩmũturĩria ndu ikĩmũnyũrũria ikĩmwĩraga atĩrĩ, “Ũrĩ mwega mũthamaki wa Ayahudi!”
30 Igĩcooka ikĩmũtuĩra mata, ikĩoya karũthanju kau ikĩmũhũũra nako mũtwe.
31 Ciarĩĩkia kũmũnyũrũria ikĩmũruta nguo ĩyo nduune ikĩmwĩkĩra nguo ciake ikĩmuumagaria ikamwambe.
Jesũ kwambwo
32 Na rĩĩrĩ, irĩ njĩrainĩ igĩcemania na mũndũ woimĩĩte Kurene wetagwo Simoni, nacio thigari ikĩmũringĩrĩria akuuĩre Jesũ mũtharaba.
33 Ciakinya handũ heetagwo Gologotha, na ũguo nĩ ta kuuga, “Handũ ha Ihĩndĩ rĩa Mũtwe,”
34 ikĩhe Jesũ ndibei yatukanĩĩtio na kĩndũ kĩrũrũ; no amĩcama akĩrega kũmĩnyua.
35 Nacio thigari ciarĩĩkia kũmwamba igĩcuukĩra nguo ciake mĩtĩ igĩcigayana.
36 Thuutha wa ũguo igĩikara thĩ kũmwĩrorera.
37 Naho hau igũrũ wa mũtwe wake hakĩandĩkwo ũndũ ũrĩa aathitangĩirwo: “Ũyũ nĩ we Jesũ, Mũthamaki wa Ayahudi.”
38 Igĩcooka ikĩamba aici eerĩ hamwe naake, ũmwe mwena wake wa ũrĩo, na ũrĩa ũngĩ mwena wa ũmotho.
39 Nao andũ arĩa maahĩtũkagĩra hau moona Jesũ makĩmũnyũrũria makĩinagia mĩtwe makiugaga atĩrĩ,
40 “Wee ũngĩatharirie Hekaarũ na ũcooke ũmĩake na mĩthenya ĩtatũ-rĩ, kĩĩhonokie! Angĩkorwo nĩ we Mũrũ wa Ngai-rĩ, uma mũtharaba igũrũ!”
41 O nao athĩnjĩri Ngai arĩa anene na arutani a Watho na athuuri makĩmũnyũrũria makiugaga atĩrĩ,
42 “Nĩarahonokagia arĩa angĩ, no ndangĩhota kwĩhonokia we mwene! Githĩ ti we mũthamaki wa Isiraeli? Tanĩakiume mũtharabainĩ nĩ geetha tũmwĩtĩkie!
43 Ningĩ-rĩ, nĩetĩkĩĩtie Ngai, na oigaga atĩ nĩ Mũrũ wa Ngai. Tarekeei tukĩone kana Ngai nĩekwenda kũmũhonokia rĩu!”
44 O nao aici arĩa maambanĩirio naake makĩmũruma o ũguo.
Jesũ gũkua
45 Na rĩĩrĩ, thaa thita cia mũthenya ciakinya, bũrũri wothe ũkĩgĩa nduma kinya thaa kenda.
46 Ta thaa kenda Jesũ akĩgũũthũka na mũgambo mũnene akiuga atĩrĩ, “Eli, Eli, lema sabakithani?” Na ũguo nĩ ta kuuga atĩrĩ, “Ngai wakwa, Ngai wakwa, ũndiganĩirie nĩkĩ?”
47 Nao andũ amwe arĩa marũũgamĩĩte hau makiuga atĩrĩ, “Mũndũ ũyũ areeta Elija!”
48 Naake ũmwe wao agĩteng’era, akĩoya thibonji o rĩmwe, akĩmĩtobokia ndibeiinĩ ngagatu, akĩmĩtheecerera kamũrangiinĩ akĩgeria kũmũkundia.
49 No arĩa angĩ makĩĩrana atĩrĩ, “Rekeei tuone kana Elija nĩegũũka kũmũhonokia!”
50 Thuutha ũcio Jesũ akĩgũũthũka rĩngĩ na hinya mũno, agĩtuĩkana.
51 Nakĩo gĩtambaya kĩa Hekaarũ gĩgĩatũkana maita meerĩ kuuma igũrũ kinya thĩ. Nakuo gũkĩgĩa na gĩthingithia, namo mahiga magĩatũkanga.
52 Nacio mbĩĩrĩra ikĩhingũka, nao andũ aingĩ atheru a Ngai arĩa maakuĩte makĩriũka,
53 makiuma mbĩĩrĩrainĩ ciao. Naake Jesũ aariũka, magĩthiĩ itũũrainĩ rĩrĩa itheru na andũ aingĩ makĩmoona.
54 Na rĩĩrĩ, hĩndĩ ĩrĩa Mũroma mũnene wa thigari igana hamwe na thigari iria arĩ nacio akĩrangĩra Jesũ, maiguire gĩthingithia na makĩona ũrĩa kwahaanire, makĩiyũrwo nĩ kĩmako makiuga atĩrĩ, “Ti itherũ ũyũ oima Mũrũ wa Ngai.”
55 Naho nĩhaarĩ atumia aingĩ meeroragĩra ũrĩa kũrathiĩ na mbere me haraaya, arĩa maarũmĩrĩire Jesũ kuuma Galili makĩmũtungatagĩra.
56 Gatagatĩinĩ kaao haarĩ Mariamu Mũmagidali, Mariamu nyina wa Jakubu na Josefu, na nyina wa aariũ a Zebedi.
Jesũ gũthikwo
57 Hwaĩinĩ ũcio mũndũ mũtongu woimĩĩte itũũra rĩa Arimathea wetagwo Josefu, warĩ mũrutwo wa Jesũ,
58 agĩthiĩ kũrĩ Pilato akiuga anengerwo mwĩrĩ wa Jesũ. Naake Pilato agĩathana atĩ Josefu anengerwo.
59 Naake Josefu agĩkĩwoya, akĩwoha na cuka wa gataani,
60 akĩũiga mbĩĩrĩrainĩ yake ĩrĩa eenjeete ihigainĩ. Agĩcooka akĩgaragaria ihiga inene akĩhinga mbĩĩrĩra, agĩĩthiĩra.
61 Naake Mariamu Mũmagidali na Mariamu ũcio ũngĩ maikarĩĩte hau kũng’ethanĩra na mbĩĩrĩra.
Thigari kũrangĩra mbĩĩrĩra
62 Mũthenya ũyũ ũngĩ, nĩguo warĩ wa Thabatũ, athĩnjĩri Ngai arĩa anene na Afarisai makĩũngana mbere ya Pilato, makĩmwĩra atĩrĩ,
63 “Mwathi witũ, nĩtũkũririkana atĩ mũndũ ũcio wa maheeni arĩ muoyo nĩoigĩĩte atĩrĩ, ‘Nĩngaariũka mũthenya wa ĩtatũ.’
64 Nĩ ũndũ ũcio athana mbĩĩrĩra yake ĩrangĩrwo kinya mũthenya wa ĩtatũ, nĩ geetha arutwo aake matikaae gũthiĩ maiye mwĩrĩ wake, macooke meere andũ atĩ nĩariũkĩĩte kuuma kũrĩ arĩa akuũ. Maheeni ta macio no makorwo marĩ mooru kũrĩ marĩa ma mbere.”
65 Naake Pilato akĩmeera atĩrĩ, “Nĩmũkoragwo na arangĩri. Thiĩi mũkamĩrangĩrithie o ta ũrĩa mũngĩhota.”
66 Nĩ ũndũ ũcio, magĩthiĩ makĩhinga ihiga rĩa mbĩĩrĩra biũ na makĩrĩĩkĩra mũhũũri, magĩcooka magĩtiga arangĩri a kũmĩrangĩra.