Mũbango wa kũũraga Jesũ
1 Na rĩĩrĩ, Jesũ arĩĩkia kũrutana maũndũ macio moothe akĩĩra arutwo aake atĩrĩ,
2 “Nĩmũũĩ atĩ thigũkũ ya Bathaka nĩgũkinya thuutha wa mĩthenya ĩĩrĩ, na Mũrũ wa Mũndũ nĩekũnengeranwo akaambwo.”
3 Hĩndĩ o ĩyo athĩnjĩri Ngai arĩa anene na athuuri magĩcemania mũciĩ kwa Mũthĩnjĩri Ngai Ũrĩa Mũnene wetagwo Kaiafa,
4 makĩbanga kũnyiita Jesũ na hitho nĩguo mamũũrage.
5 No makĩĩrana atĩrĩ, “Tũtigwĩka ũguo hĩndĩ ĩno ya thigũkũ, mũingĩ ndũgatũũkĩrĩre.”
Jesũ gũitĩrĩrio maguta e Bethania
6 Na rĩĩrĩ, hĩndĩ ĩmwe Jesũ arĩ Bethania mũciĩ gwa Simoni ũrĩa warũarĩĩte mũrimũ mũũru wa ngoothi,
7 aikaire meethainĩ akĩrĩa, mũtumia ũmwe nĩokire harĩ we arĩ na cuuba yarĩ na maguta manungi wega ma goro mũno, akĩmũitĩrĩria mũtwe.
8 Hĩndĩ ĩrĩa arutwo moonire ũguo makĩraakara makĩũrania atĩrĩ, “Nĩ wa kĩ ũitangi ũyũ?
9 Maguta maya nĩmangĩendio mbeeca nyingĩ iheeo athĩĩni.”
10 Naake Jesũ akĩmenya ũrĩa moigaga, na akĩmooria atĩrĩ, “Mũrathĩĩnia mũtumia ũyũ nĩkĩ? We nĩanjĩka ũndũ mwega.
11 Nĩ amu andũ arĩa athĩĩni mũrĩkoragwo nao hĩndĩ ciothe no mũtirĩkoragwo na niĩ hĩndĩ ciothe.
12 Anjitĩrĩria maguta macio nĩ geetha ahaarĩrĩrie mwĩrĩ wakwa ũhoroinĩ wa gũthikwo.
13 Ngũmwĩra na ma atĩ kũrĩa guothe ũhoro ũyũ Mwega ũkaahunjio thĩinĩ wa thĩ yothe, ũndũ ũcio anjĩka nĩũkaaganagwo nĩ geetha aririkanagwo.”
Judasi gwĩtĩkĩra gũkunyanĩra Jesũ
14 Na hĩndĩ ĩyo ũmwe wa arutwo arĩa ikũmi na eerĩ ũrĩa wetagwo Judasi Mũisikariota, agĩthiĩ kũrĩ athĩnjĩri Ngai arĩa anene
15 akĩmooria atĩrĩ, “Nĩ kĩĩ mũkũũhe ndamũnengera Jesũ?” Nao magĩtara icunjĩ mĩrongo ĩtatũ cia betha makĩmũnengera.
16 Kuuma hĩndĩ ĩyo Judasi akĩambĩrĩria gũcaria mweke wa kũneana Jesũ kũrĩ o.
Jesũ kũrĩanĩra Bathaka na arutwo aake
17 Mũthenya wa mbere wa Thigũkũ ya mĩgate ĩrĩa ĩtarĩ mĩĩkĩre ndaawa ya kũimbia, arutwo a Jesũ magĩthiĩ kũrĩ we makĩmũũria atĩrĩ, “Ũkwenda tũgakũhaarĩrĩrie irio cia Bathaka kũ?”
18 Naake akĩmeera atĩrĩ, “Thiĩi itũũrainĩ kũrĩ mũndũ mũna mũmwĩre atĩrĩ, ‘Mũrutani ekuuga ihinda rĩakwa nĩikinyu na ngũrĩĩra irio cia Bathaka nyũmba gwaku na arutwo aakwa.’ ”
19 Nao arutwo magĩĩka o ta ũrĩa Jesũ aameerĩĩte makĩhaarĩria irio cia Bathaka.
20 Gwakinya hwaĩinĩ, Jesũ na arutwo arĩa ikũmi na eerĩ magĩikara meethainĩ kũrĩa.
21 Rĩrĩa maarĩaga-rĩ, Jesũ akĩmeera atĩrĩ, “Ngũmwĩra na ma atĩ, ũmwe wanyu nĩekũngunyanĩra.”
22 Nao arutwo makĩnyiitwo nĩ kĩeha kĩnene, makĩambĩrĩria kũmũũria ũmwe kwa ũmwe atĩrĩ, “Hiihi nĩ niĩ, Mwathani?”
23 Naake Jesũ akĩmacookeria atĩrĩ, “Ũrĩa twatobokanĩria mũgate mbakũriinĩ nĩ we ũkũngunyanĩra.
24 Mũrũ wa Mũndũ nĩegũkua o ta ũrĩa kwandĩkĩĩtwo, indĩ kaĩ mũndũ ũrĩa ũkũmũkunyanĩra e thĩĩna-ĩ! Nĩ kaba mũndũ ũcio atangĩaciarirwo!”
25 Naake Judasi ũrĩa mũmũkunyanĩri akĩmũũria atĩrĩ, “Mũrutani, hiihi nĩ niĩ?”
Naake Jesũ akĩmũcookeria akĩmwĩra atĩrĩ, “Nĩwoiga.”
Irio cia Mwathani
26 Na rĩĩrĩ, o hĩndĩ ĩyo maarĩaga, Jesũ akĩoya mũgate, akĩũraathima, agĩcooka akĩwenyũra, akĩũnengera arutwo aake akĩmeera atĩrĩ, “Keei mũrĩe, ũyũ nĩ mwĩrĩ wakwa.”
27 Agĩcooka akĩoya gĩkombe, na arĩĩkia gũcookeria Ngai ngaatho akĩmanengera akiugaga atĩrĩ, “Nyuanĩraai inyuothe.
28 Ĩno nĩ yo thakame yakwa ya kĩrĩĩkanĩroĩrĩa ĩgũitwo tondũ wa andũ aingĩ nĩ ũndũ wa kuohanĩrwo kwa meehia.
29 No ngũmwĩra atĩ, ndigaacooka kũnyua ndibei ĩno rĩngĩ kinya mũthenya ũrĩa ngaamĩnyuanĩra na inyuĩ yerũhĩĩtio Ũthamakiinĩ wa Awa.”
30 Nao marĩĩkia kũina rwĩmbo, makiuma magĩthiĩ kĩrĩmainĩ kĩa Mĩtamaiyũ.
Jesũ kwĩra Petero o mbere atĩ nĩarĩmũkaana
31 Ningĩ Jesũ akĩmeera atĩrĩ, “Ũtukũ ũyũ inyuothe nĩmũrĩndirika. Amu nĩkwandĩkĩĩtwo atĩrĩ, ‘Ngai nĩakooraga mũrĩithi, nacio ng’ondu cia rũũru rwake ihurunjũke.’
32 No ndaariũkio nĩngaamũtongoria gũthiĩ Galili.”
33 Hĩndĩ ĩyo Petero akĩĩra Jesũ atĩrĩ, “Niĩ ndirĩ hĩndĩ ngaagũtirika o na arĩa angĩ oothe mangĩgũtirika.”
34 Naake Jesũ akĩmwĩra atĩrĩ, “Ngũkwĩra na ma atĩ ũtukũ ũyũ ngũkũ ĩtaanakũga nĩũrĩngaana gatatũ.”
35 Naake Petero akĩmwĩra atĩrĩ, “O na angĩkorwo nĩgũkuanĩra ndĩrĩkuanĩra nawe, niĩ ndirĩgũtirika!”
Nao arutwo acio angĩ oothe makiuga o ro ũguo.
Jesũ kũhooya e Gethisemane
36 Jesũ agĩcooka agĩthiĩ na arutwo aake handũ heetagwo Gethisemane, na akĩmeera atĩrĩ, “Ikaragaai haaha thiĩ haarĩa mbere ngahooe.”
37 Akĩoya Petero na aariũ arĩa eerĩ a Zebedi agĩthiĩ nao. Naake agĩkĩambĩrĩria kũigua kĩeha na gũthĩĩnĩka ngoro,
38 akĩmeera atĩrĩ, “Ndĩraigua kĩeha mũno o ta ngirie gũkua. Ikaragaai haaha na mwĩhũũge hamwe na niĩ.”
39 Agĩthiĩ kabere haniini, akĩĩgũithia thĩ, na akĩhooya atĩrĩ, “Awa, angĩkorwo no kũhoteke, reke gĩkombe gĩĩkĩ kĩa mĩnyamaaro kĩnjeherere! No ti ũrĩa niĩ ngwenda, no nĩ ũrĩa wee ũkwenda.”
40 Rĩrĩa aacookire harĩa arutwo maarĩ agĩkora makomeete, akĩũria Petero atĩrĩ, “Tuuge mũtingĩhota kwĩhũũga hamwe na niĩ o na ithaa rĩmwe?
41 Mwĩhũũgeei na mũhooe nĩguo mũtikagũe magerioinĩ. Ngoro nĩkwenda no mwĩrĩ ndũrĩ na hinya.”
42 Agĩcooka akĩmatiga rĩngĩ agĩthiĩ akĩhooya atĩrĩ, “Awa angĩkorwo gĩkombe gĩĩkĩ kĩa mĩnyamaaro gĩtingĩnjeherera tiga ndĩkĩnyuĩrĩire-rĩ, reke wendi waku wĩkwo.”
43 Naake acooka rĩngĩ harĩa arutwo maarĩ, agĩkora makomeete tondũ nĩmaathĩĩnagio nĩ toro.
44 Ningĩ Jesũ akĩmatiga, agĩthiĩ akĩhooya riita rĩa gatatũ akiugaga ciugo o icio.
45 Rĩrĩa aacookire harĩ arutwo akĩmooria atĩrĩ, “No gũkoma mũkomeete mũkahuurũka? Oneei! Ihinda nĩikinyu, Mũrũ wa Mũndũ nĩekũneanwo mookoinĩ ma andũ eehia.
46 Ũkĩraai tũthiĩ; ũrĩa ũkũngunyanĩra nĩakinya!”
Jesũ Kũnyiitwo
47 Na rĩrĩa Jesũ aaragia ũguo Judasi, ũmwe wa arĩa ikũmi na eerĩ, agĩkinya. Ookĩĩte na andũ gĩkundi kĩnene me na hiũ cia njora na njũgũma, matũmĩĩtwo nĩ athĩnjĩri Ngai arĩa anene, o na athuuri a kĩama.
48 Judasi ũcio wamũkunyanagĩra nĩamaheete kĩmenyithia akameera atĩrĩ, “Ũrĩa ndĩmumunya, ũcio nĩ we; mũnyiiteei!”
49 Naake Judasi agĩthiĩ o rĩmwe harĩ Jesũ akĩmwĩra atĩrĩ, “Mũrutani! Ũrĩ mũhoro!” Na akĩmũmumunya.
50 Naake Jesũ akĩmwĩra atĩrĩ, “Ũrĩa ũreeka ĩka narua!”
Nao magĩũka makĩnyiita Jesũ makĩmũrũmia.
51 Naake ũmwe wa arĩa maarĩ na Jesũ, agĩcomora rũhiũ rwa njora, agĩtema ngombo ya Mũthĩnjĩri Ngai Ũrĩa Mũnene, akĩmĩtinia gũtũ.
52 Naake Jesũ akĩmwĩra atĩrĩ, “Cookia rũhiũ rwaku njora, nĩ amu arĩa oothe moyaga hiũ, makooragwo na hiũ.
53 Githĩ ndũũĩ atĩ no njĩtie ũteithio kuuma kũrĩ Awa, na andũmĩre thigari cia araika makĩria ma mbũtũ ikũmi na igĩrĩ?
54 No ningĩ-rĩ, Maandĩko mangĩkĩhinga atĩa marĩa moigaga atĩ, ũndũ ũyũ no mũhaka ũhinge?”
55 Hĩndĩ ĩyo Jesũ akĩũria andũ acio atĩrĩ, “Kaĩ muoka na hiũ na njũgũma ta arĩ mũici muoka kũnyiita? Mũthenya o mũthenya ndĩrakoragwo Hekaarũinĩ ngĩrutana na mũtingĩnyiita.
56 No maũndũ maya moonekeete nĩ geetha Maandĩko ma anabii mahinge.”
Naake arĩĩkia kũnyiitwo, arutwo aake oothe makĩmũtirĩka, makĩũra.
Jesũ gũtwarwo mbere ya kĩama
57 Nao acio maanyiitire Jesũ makĩmũtwara mũciĩ gwa Kaiafa ũrĩa warĩ Mũthĩnjĩri Ngai Ũrĩa Mũnene, kũrĩa arutani a Watho na athuuri maagomanĩĩte.
58 Naake Petero akĩmũrũmĩrĩra arĩ o haraaya, kinya agĩkinya nja kwa Mũthĩnjĩri Ngai Ũrĩa Mũnene. Agĩthiĩ agĩikara hau nja na arangĩri nĩ geetha oone ũrĩa gũkũhaana.
59 Nao athĩnjĩri Ngai arĩa anene o na kĩama gĩothe magĩcaria ũira wa maheeni ũrĩa mangĩruta nĩguo mamũũragithie,
60 no makĩaga, o na gũtuĩka andũ aingĩ nĩmaarutire ũira wa maheeni. Thuuthainĩ andũ eerĩ nĩmaarũũgamire makiuga atĩrĩ,
61 “Mũndũ ũyũ oigire atĩ no ahote gũtharia Hekaarũ ya Ngai, na acooke amĩake na mĩthenya ĩtatũ.”
62 Naake Mũthĩnjĩri Ngai Ũrĩa Mũnene akĩrũũgama akĩĩra Jesũ atĩrĩ, “Kaĩ wee ũtarĩ ũndũ ũgũcookia ũhoroinĩ ũcio?”
63 No Jesũ agĩkira ki. Hĩndĩ ĩyo Mũthĩnjĩri Ngai ũcio Mũnene akĩmwĩra atĩrĩ, “Ndagũthaitha na Ngai ũrĩa ũrĩ muoyo, ũtwĩre kana wee nĩ we Mesia Mũrũ wa Ngai.”
64 Naake Jesũ akĩmwĩra atĩrĩ, “Nĩwoiga. No ngũmwĩra atĩ thuutha wa ihinda rĩĩrĩ, nĩmũkoona Mũrũ wa Mũndũ aikarĩĩte mwena wa ũrĩo wa Mwene Hinya Wothe, o na muone agĩũka arĩ matuinĩ ma igũrũ!”
65 Naake Mũthĩnjĩri Ngai ũcio Mũnene aigua ũguo agĩtembũranga nguo yake nĩ ũndũ wa kũraakara akiuga atĩrĩ, “Nĩaruma Ngai! Kaĩ tũgũkĩenda aira angĩ? Githĩ mũtiakĩiguĩra ũrĩa aruma Ngai?
66 Mũgũtua atĩa?”
Nao magĩcookia atĩrĩ, “Nĩahĩtĩĩtie na aagĩrĩire o kũũragwo.”
67 Magĩcooka makĩmũtuĩra mata ũthiũ na makĩmũhũũra. Nao acio maamũgũthire makĩmwĩra atĩrĩ,
68 “Mesia tũrathĩre nũũ wakũgũtha!”
Petero gũkaana Jesũ
69 Na rĩĩrĩ, Petero aikarĩĩte hau nja ha Mũthĩnjĩri Ngai ũcio Mũnene-rĩ, mũirĩĩtu ũmwe ndungata agĩũka harĩ we akĩmwĩra atĩrĩ, “O nawe uuma na Jesũ ũũrĩa wa Galili.”
70 Naake Petero agĩkaana mbere yao oothe akiuga atĩrĩ, “Niĩ ndiũĩ ũrĩa ũroiga.”
71 Hĩndĩ ĩyo agĩthiĩ kĩhingoinĩ. Naake mũirĩĩtu ũngĩ ndungata akĩmuona akĩĩra andũ arĩa maarĩ hau atĩrĩ, “Mũndũ ũyũ oima na Jesũ wa Nazarethi.”
72 Naake Petero akĩambĩrĩria kwĩhĩta akiugaga atĩrĩ, “Na ma niĩ ndiũĩ mũndũ ũcio!”
73 Thuutha wa ihinda iniini andũ arĩa maarũũgamĩĩte hau magĩthiĩ harĩ Petero makĩmwĩra atĩrĩ, “Ti itherũ ũrĩ ũmwe wao nĩ ũndũ mwarĩrie waku nĩũraiguĩka!”
74 Naake Petero akĩambĩrĩria kwĩhĩta akiuga atĩrĩ, “Ndĩraaria ma, atĩ niĩ ndiũĩ mũndũ ũcio!”
Na ihinda o rĩu ngũkũ ĩgĩkũga,
75 naake Petero akĩririkana ũrĩa Jesũ aamwĩrĩĩte atĩ, “Mbere ya ngũkũ gũkũga nĩũrĩngaana gatatũ.” Naake Petero akiuma nja akĩrĩra e na ruwo rũingĩ.