Jesũ kwĩra andũ memenyerere arutani a Watho na Afarisai
1 Ningĩ Jesũ akĩĩra andũ o hamwe na arutwo aake atĩrĩ,
2 “Arutani a Watho na Afarisai nĩ o maheetwo rũũtha rwa gũtaũra Watho wa Musa.
3 Nĩ ũndũ ũcio no mũhaka mwathĩkagĩre na mũhingagie ũrĩa wothe mamwĩraga mwĩke; no mũtikaarũmagĩrĩre mĩtugo yao nĩ ũndũ matiĩkaga ũrĩa o eene mahunjagia.
4 Moohagĩra andũ mĩrigo mĩritũ mũno makamaigĩrĩra, o na gũtuĩka o eene matingĩĩtĩkĩra kũmĩhuutia na kaara mamateithĩrĩrie.
5 Meekaga maũndũ moothe nĩ geetha moonwo nĩ andũ. Taroraai ndaamĩiria irĩ na Maandĩko, iria meyohaga ũthiũ na mooko, muone ũrĩa irĩ ndaaya. Taroraai ũrĩa maraihagia tuohe twa ndigi cia nguo ciao!
6 Meendaga gũikarĩra itĩ cia mbere marugainĩ o na thunagogiinĩ.
7 Ningĩ meendaga kũgeithĩrio ndũũnyũ na gwĩtwo ‘Arutani, nĩ andũ.’
8 No rĩĩrĩ, inyuĩ mũtiagĩrĩirwo nĩgwĩtwo ‘Arutani,’ nĩ ũndũ inyuothe mũrĩ a ithe ũmwe, na mũrĩ na Mũrutani ũmwe tu.
9 Ningĩ gũũkũ thĩ ĩno mũtiagĩrĩirwo nĩgwĩta mũndũ o na ũmwe ‘Baaba,’ nĩ ũndũ mũrĩ a Ithe o ũmwe tu ũrĩa ũrĩ igũrũ.
10 O na ningĩ mũtiagĩrĩirwo nĩgwĩtwo ‘atongoria’ nĩ ũndũ mũtongoria wanyu no ũmwe na nĩ we Mesia.
11 Ũrĩa mũnene mũno gatagatĩinĩ kaanyu no mũhaka akorwo arĩ ndungata yanyu.
12 Na rĩĩrĩ, mũndũ ũrĩa wĩtuaga mũnene nĩakaanyiihio, na ũrĩa wĩnyiihagia nĩakaanenehio.
Jesũ gũtetia arutani a Watho na Afarisai nĩ ũndũ wa ũhinga wao
13 “Kaĩ inyuĩ arutani a Watho na Afarisai mũrĩ thĩĩnainĩ-ĩ! Hinga ici! Nĩ amu mũgiragia andũ matoonye Ũthamaki wa igũrũ, na inyuĩ eene mũtitoonyaga, o na kana mũgeetĩkĩria arĩa marenda gũtoonya matoonye. [
14 Kaĩ inyuĩ arutani a Watho na Afarisai mũrĩ thĩĩnainĩ-ĩ! Hinga ici! Nĩ inyuĩ mũtoonyagĩrĩra atumia a ndigwa mũkamathũũkĩria mĩciĩ yao, mũgacooka mũkehoithia mahooya maraihu! Nĩ ũndũ wa ũguo iherithia rĩanyu rĩgaakorwo rĩrĩ rĩũru mũno!]
15 “Kaĩ inyuĩ arutani a Watho na Afarisai mũrĩ thĩĩnainĩ-ĩ! Hinga ici! Mũringaga maria na mũgatuĩkania mabũrũri nĩ geetha mũgĩe na mũrutwo ũmwe, no mwarĩĩkia kũgĩa naake, mũgatũma atuĩke wa gũgaikio icuainĩ maita meerĩ ma ũrĩa inyuĩ mwagĩrĩirwo nĩgũgaikio!
16 “Kaĩ inyuĩ atongoria atumuumu mũrĩ thĩĩnainĩ-ĩ! Mũrutanaga atĩ, ‘Mũndũ angĩĩhĩta na Hekaarũ to mũhaka ahingie ũrĩa ehĩta, no mũndũ angĩĩhĩta na thahabu ĩrĩa ĩkoragwo Hekaarũinĩ, no mũhaka ahingie ũguo ehĩta.’
17 Inyuĩ irimũ ici ndumuumu! Nĩ kĩĩ kĩ bata makĩria, nĩ thahabu kana nĩ Hekaarũ ĩrĩa ĩtũmaga thahabu ĩtuĩke nyamũre?
18 Na no mũrutanaga atĩrĩ, ‘Mũndũ angĩĩhĩta na kĩheeo kĩrĩa kĩrĩ kĩgongoonainĩ no mũhaka ahingie ũrĩa ehĩta.’
19 Kaĩ mũrĩ atumuumu-ĩ! Nĩ kĩĩ kĩrĩ bata makĩria, nĩ kĩheeo kana nĩ kĩgongoona kĩrĩa gĩtũmaga kĩheeo kĩu gĩtuĩke kĩamũre?
20 Hĩndĩ ĩrĩa mũndũ ekwĩhĩta na kĩgongoona ehĩtaga nakĩo o hamwe na iheeo iria irĩ ho;
21 na mũndũ angĩĩhĩta na Hekaarũ ehĩtaga nayo na akehĩta na Ngai ũrĩa ũikaraga thĩinĩ wayo.
22 Ningĩ mũndũ ehĩta na igũrũ ehĩtaga na gĩtĩ kĩa ũnene kĩa Ngai na akehĩta na Ngai ũrĩa ũgĩikaragĩra.
23 “Kaĩ inyuĩ arutani a Watho na Afarisai mũrĩ thĩĩnainĩ-ĩ! Hinga ici! Mũhothaga gĩcunjĩ gĩa ikũmi o na gĩa terere, na bithaarĩ na ndania, no mũkarega kũrũmbũyania na ũrutani wa Watho ũrĩa ũkoniĩ ũhoro wa kĩhooto, kũiguanĩra tha,na kwĩhokeka. Maũndũ maya mwagĩrĩirwo nĩkũmahingagia mũtegũtiganĩria macio mangĩ.
24 Inyuĩ atongoria aya atumuumu! Mũcungaga ngi kuuma caaiinĩ wanyu no mũkameria ngamĩĩra!
25 “Kaĩ inyuĩ arutani a Watho na Afarisai mũrĩ thĩĩnainĩ-ĩ! Hinga ici! Mũthambagia ikombe na thaani cianyu na igũrũ, hĩndĩ ĩrĩa na kũu thĩinĩ ciyũire indo iria muoneete na njĩra ya gũtuunyana na ya kwĩyenda.
26 Afarisai aya atumuumu! Ambaai mũthambie gĩkombe na thĩinĩ, na kũu nja nĩgĩgũcooka gĩthere!
27 “Kaĩ inyuĩ arutani a Watho na Afarisai mũrĩ thĩĩnainĩ-ĩ! Hinga ici! Mũhaana ta ũrĩa mbĩĩrĩra cionekaga irĩ thaka ihakĩĩtwo rangi na igũrũ, no na kũu thĩinĩ ciyũire mahĩndĩ na mĩĩrĩ mĩbuthu.
28 Muonekaga na igũrũ mũrĩ eega nĩ andũ oothe no na kũu thĩinĩ mũiyũirwo nĩ ũhinga na meehia.
Jesũ kũratha ũhoro wa kũherithio kwao
29 “Kaĩ inyuĩ arutani a Watho na Afarisai mũrĩ thĩĩna-ĩ! Hinga ici! Mwakaga mbĩĩrĩra cia anabii na mũkagemia mbĩĩrĩra cia andũ arĩa maarĩ athingu.
30 Mũgacooka mũkoiga atĩ korwo mwarĩ muoyo hĩndĩ ya maithe maanyu mũtingĩekire ũrĩa meekire makĩũraga anabii.
31 Nĩ ũndũ ũcio, nĩmwĩtĩkĩrĩĩte atĩ mũrĩ ciana cia arĩa mooragire anabii!
32 Mũtigĩthiĩ na mbere mũhingie maũndũ marĩa maithe maanyu maambĩrĩirie!
33 Inyuĩ nyoka ici o inyuĩ ciana cia nduĩra! Mũkaahonoka atĩa gũthiĩ icuainĩ?
34 Nĩngaamũtũmĩra anabii na athuuri oogĩ o na arutani; amwe nĩmũkaamooraga, angĩ mũmaambe, na angĩ mũmahũũrĩre thunagogiinĩ na iboko na mũmaingate kuuma itũũra o itũũra.
35 Nĩ ũndũ ũcio nĩmũgaakinyĩrwo nĩ iherithia nĩ ũndũ wa gũita thakame ya andũ oothe arĩa athingu, kuuma kũũragwo kwa Habili kinya gwa Zakaria mũrũ wa Barakia ũrĩa mworagĩire gatagatĩ ka Harĩa Hatheru na kĩgongoona.
36 Ngũmwĩra na ma atĩ, rũciaro rũũrũ nĩrũgaakinyĩrĩrwo nĩ iherithia nĩ ũndũ wa maũndũ macio moothe!
Ũrĩa Jesũ eendeete Jerusalemu
37 “Jerusalemu, Jerusalemu! Wee ũũragaga anabii na ũkahũũra na mahiga andũ arĩa Ngai agũtũmagĩra! Nĩ maita maigana ngoreetwo ngĩenda gũcookanĩrĩria andũ aaku oothe hamwe o ta ũrĩa ngũkũ ĩcookagĩrĩria tũcui twayo rungu rwa mathagu maayo, no ndũnjĩtĩkagĩria!
38 Nĩ ũndũ ũcio, Hekaarũ yaku nĩgũtiganĩrio ĩtigwo ĩtarĩ mũndũ.
39 Kuuma rĩu ndũrĩ hĩndĩ ũkaanyona rĩngĩ kinya rĩrĩa ũkoiga atĩrĩ, ‘Kũraathimwo nĩ ũrĩa ũgũũka thĩinĩ wa rĩĩtwa rĩa Mwathani.’ ”