Araika na matũhũũhũ ma mũthia
1 Nĩndacookire ngĩona ũrirũ ũngĩ kũũria matuinĩ, naguo warĩ mũnene na wa kũgegania. Ndoonire araika mũgwanja maarĩ na matũhũũhũ mũgwanja ma mũthia, amu macio nĩmo marĩĩkĩrĩirie maraakara ma Ngai.
2 Ngĩcooka ngĩona kĩndũ kĩahaanaga ta arĩ iria rĩa gĩciicio rĩtukanĩĩtio na mwaki. Nao andũ arĩa maahooteete nyamũ ĩrĩa na mũhianano wayo o na makahoota ũrĩa rĩĩtwa rĩake rĩarũũgamĩrĩirwo nĩ namba ĩrĩa, marũũgamĩĩte rũteereinĩ rwa iria rĩu rĩa gĩciicio. Nao maanyiitĩĩte inanda maaheetwo nĩ Ngai,
3 na mainaga rwĩmbo rwa Musa ndungata ya Ngai o hamwe na rwa Gatũrũme makoiga atĩrĩ:
“Mwathani Ngai Mwene Hinya Wothe,
ciĩko ciaku nĩ nene na cia kũgegania!
Mũthamaki wa ndũũrĩrĩ
njĩra ciaku nĩ cia kĩhooto na cia ma!
4 Nũũ ũtangĩkũhe gĩtĩĩo,
na akumie rĩĩtwa rĩaku, wee Mwathani?
Amu we no we wiki mũtheru.
Andũ a ndũũrĩrĩ ciothe nĩmagooka magũthaathaiye,
tondũ ciĩko ciaku cia kĩhooto nĩcioneetwo nĩ andũ oothe.”
5 Thuutha wa ũguo, ngĩona Hekaarũ ya Hema ya ũira ĩrĩa ĩrĩ kũu igũrũ yahingũrwo.
6 Nakuo kũu Hekaarũinĩ gũkiuma araika mũgwanja maarĩ na matũhũũhũ mũgwanja. Nao mehumbĩĩte nguo cia gataani theru ciahenagia, na makeyoha mĩcibi ya thahabu gĩthũri.
7 Nakĩo kĩũmbe kĩmwe kĩa iria inya i muoyo gĩkĩnengera araika acio mũgwanja mbakũri mũgwanja cia thahabu ciyũrĩĩte maraakara ma Ngai ũrĩa ũtũũraga muoyo tene na tene.
8 Nayo Hekaarũ ĩkĩiyũra ndoogo kuuma riiriinĩ na hinyainĩ wa Ngai, na gũtirĩ mũndũ ũngĩahotire gũtoonya kũu Hekaarũ kinya rĩrĩa matũhũũhũ macio mũgwanja ma araika acio mũgwanja maarĩĩkĩrĩirie.