Joshua kwarĩria andũ a Isiraeli marĩ Shekemu
1 Hĩndĩ ĩyo Joshua agĩcookanĩrĩria mĩhĩrĩga yothe ya Isiraeli o kũu Shekemu, agĩgĩĩta athuuri, atongoria, aciirithania, o na anyabaara a Isiraeli, nao magĩgĩthiĩ makĩrũũgama hau mbere ya Ngai.
2 Naake Joshua agĩkĩĩra andũ oothe atĩrĩ, “MWATHANI Ngai wa Isiraeli ekuuga ũũ: ‘Tene-rĩ, maithe maanyu maatũire mũrĩmo ũũrĩa ũngĩ wa rũũĩ rwa Farati, na nĩmaathaathayagia ngai ingĩ. Ũmwe wa maithe macio maanyu aarĩ Tera, ithe wa Aburahamu na Nahori.
3 Ngĩkĩruta ithe wanyu Aburahamu kuuma mũrĩmo ũcio wa rũũĩ rwa Farati, ngĩmũtongoria bũrũri wothe wa Kanaani, na ngĩmũhe njiarwa nyingĩ. Nĩndamũheire Isaaka,
4 naake Isaaka ngĩmũhe Jakubu na Esau. Naake Esau ngĩmũhe bũrũri ũrĩa ũrĩ irĩma wa Edomu ũtuĩke igai rĩake. No ithe wanyu Jakubu hamwe na ciana ciake, magĩikũrũka, magĩthiĩ Misiri.
5 Thuuthainĩ ngĩcooka ngĩrekia Musa na Harũni, na ngĩreehithĩria bũrũri wa Misiri mĩnyamaaro mĩnene, no inyuĩ ngĩmũruta kuo.
6 Ngĩkĩruta maithe maanyu kũu Misiri, nao Amisiri makĩmarũmĩrĩra na ihenya me na ngaari cia mbarathi, na thigari cia mbarathi. No rĩrĩa maithe maanyu maakinyire Iriainĩ Ituune-rĩ,
7 makĩngaĩra ndĩmateithie, na niĩ ngĩgĩĩkĩra nduma gatagatĩ kaao na Amisiri. Ngĩcooka ngĩtũma iria rĩu rĩkorerere Amisiri, rĩkĩmahumbanĩria. Inyuĩ nĩmũũĩ ũrĩa wothe ndeekire bũrũri wa Misiri.
“ ‘Na inyuĩ mũgĩgĩtũũra werũinĩ ihinda iraaya.
8 Ngĩcooka ngĩmũtwara bũrũri wa Aamori, arĩa maatũũraga mwena wa irathĩro wa Jorodani. Nao makĩhũũrana na inyuĩ, no ngĩmũhotithia kũmatooria. Mũgĩkĩĩgwatĩra bũrũri wao, na niĩ ngĩkĩmaniina, nĩguo meehere mbere yanyu.
9 Hĩndĩ o ĩyo, Balaki mũthamaki wa Moabi, mũrũ wa Ziporu, akĩhũũrana na inyuĩ. Agĩcooka akĩrekanĩria Balaamu mũrũ wa Beori, ooke amũrume.
10 No rĩĩrĩ, ndiigana gũthikĩrĩria Balaamu, na tondũ ũcio agĩkĩmũraathima. Na njĩra ĩyo ngĩkĩmũhonokia ngĩmũruta mookoinĩ ma Balaki.
11 Na inyuĩ mũgĩkĩringa Jorodani, mũgĩkinya Jeriko. Nao andũ a Jeriko makĩhũũrana na inyuĩ, o ta ũrĩa o nao Aamori, Aperizi, Akanaani, Ahiti, Agirigashi, Ahivi, na Ajebusi meekire. No niĩ-rĩ, ngĩmũhotithia kũmatooria.
12 O mũgĩthiyaga na mbere-rĩ, ngĩtũma metigĩre, na mainaine mũno nĩguo ndutũrũre athamaki arĩa eerĩ a Aamori. Ti hiũ cianyu cia njora, o na kana moota maanyu meekire ũndũ ũcio.
13 Ngĩkĩmũhe bũrũri mũtaanogeire o na matũũra mũteeyakĩire. Kũu nĩkuo rĩu mũtũire mũrĩyaga maciaro ma mĩthabibũ, o na ma mĩtamaiyũ ĩrĩa mũtaahandire.’ ”
14 Joshua agĩthiĩ o na mbere akĩmeera atĩrĩ, “Tondũ ũcio rĩu tĩĩagaai MWATHANI, mũmũtungatagĩre mũtarĩ na ũhinga na mũmwĩhokage na ma. Eheriai ngai iria maithe maanyu maathaathayagia bũrũriinĩ wa Mesopotamia, o na wa Misiri, mũtungatagĩre MWATHANI arĩ we wiki.
15 Angĩkorwo mũtikwenda kũmũtungatagĩra-rĩ, thuuraai ũũmũũthĩ ũrĩa mũrĩtungatagĩra. Menyaai kana mũrĩtungatagĩra ngai iria maithe maanyu maathaathayagia Mesopotamia, kana mũrĩtungatagĩra ngai cia Aamori, arĩa bũrũri wao mũratũũra. No rĩĩrĩ, haakwa mwene, na nyũmba yakwa-rĩ, tũrĩtungatagĩra MWATHANI.”
16 Nao andũ acio magĩcookia atĩrĩ, “Tũroaga gũkaanatigana na MWATHANI tũtungatagĩre ngai ingĩ!
17 Nĩ ũndũ-rĩ, MWATHANI Ngai witũ nĩ we warutire maithe maitũ, o na ithuĩ ũkomboinĩ wa Misiri, na tũkĩĩyonera na maitho maitũ ciama iria aaringire. Nĩ we watũmenyereire njĩrainĩ ciothe iria twageragĩra, o na mabũrũriinĩ moothe marĩa twatuĩkanagĩria.
18 O na ningĩ rĩrĩa twatoonyaga bũrũriinĩ ũyũ-rĩ, MWATHANI nĩ we waingatire Aamori oothe arĩa maatũire gũũkũ. Tondũ ũcio, o na ithuĩ tũrĩtungatagĩra MWATHANI nĩ ũndũ nĩ we Ngai witũ.”
19 Joshua agĩkĩĩra andũ acio atĩrĩ, “Inyuĩ-rĩ, mũtingĩhota gũtungatĩra MWATHANI, nĩ ũndũ nĩ Ngai Mũtheru, na ndarĩmuohagĩra meehia maanyu. Ningĩ nĩ Ngai ũteendeete kũigananio na ngai ĩngĩ,
20 na mũngĩtigana naake, mũtungatagĩre ngai ng’eni, nĩarĩmũgarũrũkaga akamũherithia na akamũniina biũ, o na harĩa aanamwĩka maũndũ meega.”
21 Nao andũ acio magĩkĩĩra Joshua atĩrĩ, “Aaca! Ithuĩ tũrĩtungatagĩra MWATHANI.”
22 Joshua agĩkĩmeera atĩrĩ, “Inyui eene nĩ inyuĩ aira a ũguo mwoiga atĩ mwathuura gũtungatagĩra MWATHANI.”
Nao makiuga atĩrĩ, “Ĩĩ, tũrĩ aira.”
23 Naake agĩkĩmeera atĩrĩ, “Angĩkorwo nĩ ũguo-rĩ, kĩeheriei ngai icio ng’eni mwĩ nacio, mwĩrĩre MWATHANI, Ngai wa Isiraeli, atĩ nĩmũgũtũũra mũrĩ ehokeku.”
24 Nao andũ acio makĩĩra Joshua atĩrĩ, “Nĩtũrĩtungatagĩra MWATHANI Ngai witũ, na nĩtũrĩathĩkagĩra uuge wake.”
25 Mũthenya o ro ũcio andũ oothe marĩ o kũu Shekemu, Joshua agĩthondeka kĩrĩĩkanĩro nao. Agĩcooka akĩhe andũ acio mawatho marĩa marĩrũmagĩrĩra.
26 Naake Joshua akĩandĩka mawatho macio ibukuinĩ rĩa watho wa Ngai. Agĩcooka akĩoya ihiga inene, akĩrĩhanda gĩtinainĩ kĩa mũtĩ wa mũgandi ũrĩa warĩ handũ hau haamũre ha MWATHANI.
27 Joshua akĩĩra andũ acio oothe atĩrĩ, “Ihiga rĩĩrĩ nĩrĩo rĩgũtuĩka mũira witũ, nĩ gũkorwo nĩrĩaigua ciugo ciothe iria MWATHANI atwarĩria. Tondũ ũcio-rĩ, nĩrĩo rĩgũtuĩka mũira wanyu, nĩ geetha mũtikaanakaane Ngai wanyu.”
28 Agĩcooka akĩĩra andũ methiĩre, na mũndũ o mũndũ agĩkĩinũka ũgaiinĩ wake.
Joshua na Eleazaru gũkua
29 Thuutha wa maũndũ macio, ndungata ya MWATHANI Joshua mũrũ wa Nuni agĩkua e na ũkũrũ wa mĩaka igana na ikũmi.
30 Nao makĩmũthika mũgũndainĩ wake ũrĩa warĩ Timinathu Sera, bũrũriinĩ ũrĩa ũrĩ irĩma wa Efiraimu, mwena wa na rũgongo wa kĩrĩma gĩa Gaashu.
31 Andũ a Isiraeli maatungatĩire MWATHANI matukũ moothe marĩa Joshua aarĩ muoyo, o na matukũ moothe ma atongoria arĩa maatigirwo Joshua arĩĩkia gũkua, o arĩa meyoneire na maitho maao maũndũ moothe marĩa MWATHANI eekĩire Isiraeli.
32 Na rĩĩrĩ, mahĩndĩ ma Josefu, marĩa andũ a Isiraeli maambatĩĩte namo kuuma Misiri, maathikirwo Shekemu. Gĩcigo kĩu gĩa gĩthaka kĩagũrĩĩtwo nĩ Jakubu kuuma kũrĩ aariũ a Hamori, ithe wa Shekemu, na thogora wa icunjĩ igana cia betha. Gĩcigo kĩu gĩa gĩthaka kĩagaĩirwo njiarwa cia Josefu.
33 O naake Eleazaru, mũrũ wa Harũni, agĩkua, agĩthikwo Gibea, itũũra rĩrĩa rĩrĩ bũrũriinĩ ũrĩa ũrĩ irĩma wa Efiraimu, rĩrĩa rĩaheetwo mũũrũwe Finehasi.