Iraathimo nĩ ũndũ wa gwathĩka
1 Ningĩ MWATHANI akiuga atĩrĩ, “Mũtigaathondekage mĩhianano, kana mũhandage mĩhianano ya gwacũhio, kana itugĩ cia mahiga, o na kana mahiga macũhie nĩguo mũmathaathayagie. Niĩ nĩ niĩ MWATHANI Ngai wanyu.
2 Menyagĩrĩraai Thabatũ ciakwa na mũheage gĩtĩĩo handũ haakwa harĩa haamũre. Niĩ nĩ niĩ MWATHANI.
3 “Mwarũmĩrĩra mawatho na mwathĩkĩre maathani maakwa,
4 ngaamuuragĩria mbura ihinda rĩrĩa rĩagĩrĩire rĩakinya, nĩguo mĩgũnda ĩgaaciaraga irio, nayo mĩtĩ ĩciarage matunda.
5 Mũgaakoragwo na irio nyingĩ ũguo atĩ magetha ma thabibũ makaamũkoragĩrĩra mũkĩgetha o ngano, namo mahanda ma ngano mamũkoragĩrĩre mũkĩgetha o thabibũ. Mũkaarĩaga mũkahũũna na mũgatũũra na thaayũ bũrũriinĩ wanyu.
6 “Na rĩĩrĩ, nĩngaatũma mũikarage na thaayũ mũrĩ bũrũriinĩ wanyu, na mũkomage gũtarĩ mũndũ o na ũrĩkũ mũgwĩtigĩra. Ningĩ nĩngaamwehereria nyamũ ciothe ĩrĩ ũgwati bũrũriinĩ wanyu, na gũtirĩ mbaara mũkoonanaga nayo.
7 O nacio thũ cianyu nĩmũgaacitooragia;
8 andũ ataano aanyu magaatooragia thũ igana rĩmwe, nao igana rĩmwe magatooria thũ ngiri ikũmi.
9 Na niĩ nĩngaamũraathima na ndĩmũhe ciana nyingĩ; nĩngaamũhingĩria kĩrĩĩkanĩro kĩrĩa ndarĩĩkanĩire na inyuĩ.
10 Na rĩĩrĩ, mũgaakoragwo o mũkĩrĩa magetha ma mwaka mũkũrũ hĩndĩ ya magetha ĩgĩkinya, na nĩkweheria mũkeeheragia magetha ma mwaka mũkũrũ kuuma thitooinĩ cianyu nĩguo muone gwa kũiga magetha ma mwaka mwerũ.
11 Nĩngaathondeka gĩikaro gĩakwa gatagatĩinĩ kaanyu, na ndikaamũtiganĩria o na rĩ.
12 Ngaakoragwo ndĩ hamwe na inyuĩ hĩndĩ ciothe; ngaatuĩka Ngai wanyu, na inyuĩ mũtuĩke andũ aakwa.
13 Niĩ nĩ niĩ MWATHANI Ngai wanyu ũrĩa wamũrutire bũrũri wa Misiri, nĩguo mũtikaanacooke gũtuĩka ngombo ciao rĩngĩ. Nĩ niĩ ndoinangire icooki rĩrĩa maamwĩkĩrĩĩte ngingo ngĩtũma mũthiage mwĩhandĩĩte wega.”
Ihera nĩ ũndũ wa kwaga gwathĩka
14 Ningĩ MWATHANI akiuga atĩrĩ, “Mũngĩkaaga gwathĩkĩra maathani maakwa-rĩ, nĩmũkaaherithio.
15 Mũngĩkaarega gwathĩkĩra mawatho na maathani maakwa, mũgĩthũũkie kĩrĩĩkanĩro kĩrĩa ndĩĩkanĩire na inyuĩ-rĩ,
16 nĩngaamũherithia. Ngaamũreehithĩria mũthiro. Ngaamũreehithĩria mĩrimũ ĩtakaahonaga na mĩrimũ ya kũhiũha mwĩrĩ, nayo ĩmũtue itumuumu na ĩhinyarie mĩĩrĩ yanyu. Mũkaahandaga mbeũ cianyu, no itikaamũgunaga, tondũ thũ cianyu ikaamũhootaga igacooka ikarĩa kĩrĩa mũhandĩĩte.
17 Ngaamũũkagĩrĩra, na inyuĩ mũkahootwo nĩ thũ cianyu; arĩa mamũthũire nĩ o makaamwathaga. Mũgaikaraga mũrĩ na guoya ũguo atĩ mũkooraga o na mũtateng’ereetio nĩ mũndũ.
18 “Na rĩĩrĩ, mũngĩkaaga kũnjathĩkĩra o na ndĩmũherithĩĩtie na maũndũ macio moothe-rĩ, niĩ na niĩ no ngaakĩrĩrĩria kũmũherithia.
19 Ngaaniina hinya wanyu ũrĩa ũtũmaga mwĩtĩĩe, na ndĩmũime mbura, naguo bũrũri wanyu ũũme na watũkange.
20 Mĩnoga yanyu yothe ĩkooragĩra thĩ, tondũ bũrũri wanyu ndũrĩ irio ũgaaciaraga, o nayo mĩtĩ ndĩrĩ matunda ĩgaaciaraga.
21 “Mũngĩgaathiĩ o na mbere kũregana na niĩ na mwage kũnjathĩkĩra, niĩ na niĩ no gũthiĩ ngaathiĩ o na mbere kũmũherithia.
22 Ngaamũreehithĩria nyamũ cia gĩthaka, nacio ciũrage ciana cianyu, na cianange mahiũ maanyu. Ĩkaamwananga mũnyiihe ũguo atĩ, barabara cianyu itigaakorwo na andũ.
23 “Mũngĩkaaga kũnjigua o na ndĩmũherithĩĩtie na maũndũ macio moothe, mũthiĩ o na mbere kũregana na niĩ-rĩ,
24 niĩ na niĩ nĩngaamũgarũrũka na ngĩrĩrĩrie o kũmũherithia.
25 Ngaamũreehithĩria mbaara ndĩmũherithie nĩ ũndũ wa gũthũũkia kĩrĩĩkanĩro kĩrĩa ndarĩĩkanĩire na inyuĩ. Na rĩĩrĩ, mũngĩkoorĩra matũũrainĩ maanyu mũkeehithe kuo-rĩ, niĩ na niĩ ngaamũrekeria mĩrimũ ĩtahonaga, na nĩmũkaaneanwo mookoinĩ ma thũ cianyu.
26 O na ningĩ nĩngaaniina mĩthiithũ yanyu ya irio; ngaamĩniina ũguo atĩ andũ a nja ikũmi makaabataragio no riiko rĩmwe tu rĩa kũrugĩra mĩgate. Makaamũgayagĩra mĩgate ĩyo mamũthimĩire, mũkamĩrĩa na mũtihũũne.
27 “Na rĩĩrĩ, mũngĩgaathiĩ o na mbere kũregana na niĩ, o na kwaga kũnjathĩkĩra o na ndĩmũherithĩĩtie na maũndũ macio moothe-rĩ,
28 niĩ na niĩ nĩngaamũgarũrũka ndĩ na maraakara, na ngĩrĩrĩrie kũmũherithia o makĩria.
29 Mũkaahũũta o nginya mũrĩe ciana cianyu.
30 Na niĩ nĩngaananga kũndũ kwanyu kũrĩa gũtũũgĩru gwa gũthaathaĩria, na tharũranie igongoona cianyu cia gũcinĩra ũbaani, o na njikanie ciimba cianyu igũrũ wa mĩhianano yanyu yanangĩĩtwo. Ngaamũnyarara o biũ,
31 na ndũme matũũra maanyu matuĩke maganjo. Ningĩ nĩngaananga kũndũ kwanyu kũrĩa mũthaathayagĩria na ndege kwamũkĩra magongoona maanyu.
32 Ngaananga bũrũri wanyu ũguo atĩ thũ cianyu iria igooka kũũtũũra no kũmaka ikaamakaga ciona ũrĩa wanangĩkĩĩte.
33 Ngaamũreehithĩria mbaara ndĩmũhurunje mabũrũriinĩ mageni. Bũrũri wanyu ũgaatigwo ũtarĩ na andũ, namo matũũra maanyu matigwo marĩ maganjo.
34-35 Hĩndĩ ĩyo-rĩ, bũrũri nĩũgaakorwo na ihinda rĩa kũhuurũka o biũ rĩrĩa inyuĩ mũtaaũheire. Ũgaikara ũtarĩ na andũ wĩhuurũkĩire, rĩrĩa na inyuĩ mũgaakorwo mũrĩ ithaamĩrioinĩ bũrũriinĩ wa thũ cianyu.
36 “Na rĩĩrĩ, nĩngaatũma andũ aanyu arĩa magaakorwo ithaamĩrioinĩ manyiitagwo nĩ guoya ũguo atĩ kahuti karahuurutwo nĩ rũhuuho nĩgagaatũmaga methare. Mũgeetharaga ta arĩ kũũrĩra mũroorĩra mbaara, na mũkagũaga thĩ hatarĩ thũ ĩmũhanyũkĩĩtie.
37 Mũkaahĩnganaga mũndũ na ũrĩa ũngĩ hatarĩ mũndũ ũmũtengereetie, na mũtikaahotaga gwĩtiiria thũ cianyu o na atĩa.
38 Mũgaakuĩra ithaamĩrioinĩ; bũrũriinĩ wa thũ cianyu nĩkuo mũgaathikwo.
39 Na rĩĩrĩ, andũ aanyu arĩa magaatigara kũu bũrũriinĩ wa thũ cianyu nĩmakaanyariirĩkĩra kuo nĩ ũndũ wa meehia maao o na ma maithe maao.
40 “No rĩĩrĩ, njiarwa cianyu nĩikoimbũra meehia maacio na ma maithe maacio, marĩa maareganire na niĩ na makĩĩnemera.
41 Magĩgĩtũma o na niĩ ndĩmookĩrĩre ndĩmatware ithaamĩrioinĩ bũrũriinĩ wa thũ ciao. Hĩndĩ ĩyo njiarwa icio cianyu ingĩkenyiihia na ihere meehia maacio na ũremi wacio,
42 niĩ na niĩ nĩngaaririkana kĩrĩĩkanĩro gĩakwa kĩrĩa ndarĩĩkanĩire na Jakubu, Isaaka, na Aburahamu, o na ningĩ nĩngeerũhĩria andũ aakwa kĩĩranĩro kĩrĩa ndameerĩire atĩ nĩngaamahe bũrũri wa Kanaani.
43 No rĩĩrĩ, no nginya bũrũri ũcio ũgaathaamwo nĩ andũ, nĩguo ũhuurũke o biũ ũtegũtũũrwo nĩ o. Hĩndĩ ĩyo nao magaakorwo makĩhera nĩ ũndũ wa kũrega mawatho na maathani maakwa.
44 O na kũhaana ũguo-rĩ, ndikaamatiganĩria kana ndĩmaanange o biũ hĩndĩ ĩyo magaakorwo marĩ bũrũriinĩ wa thũ ciao. Ndigeeka ũguo tondũ no thũũkie kĩrĩĩkanĩro kĩrĩa ndarĩĩkanĩire nao, na niĩ nĩ niĩ MWATHANI Ngai wao.
45 Nĩngeerũhia kĩrĩĩkanĩro kĩrĩa ndarĩĩkanĩire na maithe maao, arĩa ndarutire bũrũri wa Misiri ndũũrĩrĩ ciothe ikĩonaga, nĩguo niĩ, MWATHANI nduĩke Ngai wao.”
46 Macio nĩ mo mawatho na maathani marĩa MWATHANI aaheire Musa kĩrĩmainĩ gĩa Sinai ma kũrũmagĩrĩrwo nĩ andũ a Isiraeli.