Gũtaarĩria
Ibuku rĩa Mbere rĩa ma Maũndũ ma Matukũ ma Tene, nĩ nuthu ya ibuku rĩmwe rĩarĩ inene mũno rĩrĩa rĩagayanirio maita meerĩ: Ibuku rĩa Mbere na rĩa Keerĩ. Mabuku maya meerĩ macookereete ũhoro wa maũndũ marĩa maandĩkĩĩtwo Mabukuinĩ marĩa Meerĩ ma Samũeli na marĩa Meerĩ ma Athamaki. No rĩĩrĩ, nĩmaheanĩĩte maũndũ na njĩra ya mũthemba mwanya. Mabuku maya moohanĩĩtie hamwe maũndũ meerĩ ma bata ma ũthamaki wa Aisiraeli:
(1) Mabuku maya nĩmataarĩirie wega mũno atĩ, o na angĩkorwo moothamaki ma Isiraeli na Juda nĩmoonagio mathĩĩna kaingĩ, Ngai no aathiaga akĩhingagia irĩĩkanĩro iria aarĩĩkanĩire nao. Ningĩ no aabangaga mĩbango yake na ũndũ wa andũ arĩa matũũraga Juda. Mwandĩki nĩonanĩĩtie ũhoro ũcio makĩria na ũndũ wa kwandĩka maũndũ marĩa meekĩkire hĩndĩ ya wathani wa Daudi na Solomoni. Nĩonanĩĩtie ũrĩa Jehoshafatu, Hezekia, na Josia maagĩrithirie maũndũ. O na nĩandĩkĩĩte ũhoro wa andũ arĩa maikaraga mehokeete Ngai.
(2) Ningĩ mabuku maya nĩmataarĩirie kĩhumo gĩa gũthaathaiya Ngai Hekaarũinĩ ya Jerusalemu, na makĩria mũtaratara ũrĩa athĩnjĩri Ngai na Alawii maarũmagĩrĩra hĩndĩ ya gũthaathaiya. O na nĩmoonanĩĩtie atĩ Daudi nĩ we warĩ mwambĩrĩrĩria wa Hekaarũ o na magongoona maayo o na gwatuĩka atĩ Solomoni nĩ we wamĩakire.
Maũndũ marĩa marĩ ibukuinĩ rĩĩrĩ
Ndĩra na mũtaratara wacio 1.1–9.44
Gũkua gwa Saũlũ 10.1-14
Ũthamaki wa Daudi 11.1–29.30
Mathĩĩna na ũhootani wake 11.1–22.1
Kwĩhaarĩria gwaka Hekaarũ 22.2–29.30