Kũriũka gwa Kristũ
1 Aariũ na aarĩ a Ithe witũ, nĩngwenda kũmũririkania Ũhoro ũrĩa Mwega ũrĩa niĩ ndamũhunjĩirie, na mũkĩwamũkĩra, na noguo mũtũire mwĩtĩkĩĩtie na mũrũmĩĩtie.
2 Ũhoro ũcio nĩguo ũrĩtũmaga mũgĩe na ũhonokio angĩkorwo nĩmũrĩikaraga mũũrũmĩĩtie, tiga no mũkorirwo mwawĩtĩkirie o ũguo tũhũ.
3 Amu ndamũhunjĩirie ũhoro wa bata mũno ũrĩa o na niĩ ndaamũkĩrĩĩte. Ũhoro ũcio nĩguo ũyũ: kũringana na maandĩko Kristũ nĩakuire nĩ ũndũ wa meehia maitũ;
4 nĩathikirwo, na mũthenya wa ĩtatũ akĩriũkio o ta ũrĩa kwandĩkĩĩtwo Maandĩkoinĩ.
5 O na ningĩ nĩeyonanirie kũrĩ Petero, na agĩcooka akĩyonania kũrĩ atũmwo arĩa ikũmi na eerĩ.
6 Nĩacookire akĩyonania hĩndĩ o ĩmwe kũrĩ andũ arĩa meetĩkĩĩtie makĩria ma magana mataano. Amwe a acio rĩu nĩmakuĩte no aingĩ aao me o muoyo.
7 Thuutha ũcio nĩacookire akĩyonania kũrĩ Jakubu na agĩcooka akĩyonania kũrĩ atũmwo marĩ oothe.
8 Thuutha wao oothe nĩeyonanirie kũrĩ niĩ, o na akorwo haana ta mũndũ waciarirwo atarĩ mũkinyu.
9 Amu niĩ nĩ niĩ mũnyiinyi biũ harĩ atũmwo oothe, na o na ndiagĩrĩirwo nĩgwĩtwo mũtũmwo tondũ nĩndanyariirire kanitha wa Ngai.
10 No wega wa Ngai nĩguo ũtũmĩĩte haane ũguo ndariĩ, na wega ũcio harĩ niĩ ndwarĩ wa tũhũ. O na kũrĩ ũguo nĩndarutire wĩra makĩria ma atũmwo arĩa angĩ oothe, no ti niĩ ndaũrutire warutirwo nĩ wega wa Ngai ũrĩa ũkoragwo hamwe na niĩ.
11 Atĩrĩĩrĩ, akorwo nĩ niĩ ndamũhunjĩirie kana nĩ angĩ, ũguo nĩguo tũhunjagia, na nĩguo inyuothe mwĩtĩkĩĩtie.
Kũriũka kwa arĩa akuũ
12 Angĩkorwo ũhoro ũrĩa tũhunjagia nĩ atĩ Kristũ nĩariũkirio kuuma kũrĩ akuũ-rĩ, nĩ kĩĩ gĩgĩtũmaga amwe aanyu moige atĩ arĩa akuũ matikaariũka?
13 Ningĩ angĩkorwo arĩa akuũ matikaariũka-rĩ, o naake Kristũ ndakĩriũkirio.
14 Angĩkorwo Kristũ ndakĩriũkirio-rĩ, kũhunjia gwitũ no gwa tũhũ, o na kuo gwĩtĩkia kwanyu no gwa tũhũ.
15 Na ithuĩ no tũgĩtuĩke atĩ tũrĩ aira a Ngai a maheeni tondũ nĩtuumbũraga atĩ Ngai nĩariũkirie Kristũ kuuma kũrĩ arĩa akuũ o rĩrĩa, angĩkorwo arĩa akuũ matikaariũka, ataakĩmũriũkirie.
16 Amu angĩkorwo arĩa akuũ matikaariũkio, o naake Kristũ ndakĩriũkirio.
17 Angĩkorwo Kristũ ndariũkirio, wĩtĩkio wanyu nĩ wa tũhũ, na kwoguo mũtũũraga o meehiainĩ maanyu.
18 Nao Akristiano arĩa maakuire meetĩkĩĩtie Kristũ nĩkũũra moorire.
19 Angĩkorwo kĩĩrĩgĩrĩro giitũ harĩ Kristũnĩ kĩa muoyo o ro ũyũ tũrĩ-rĩ, tũkĩagĩrĩirwo kũiguĩrwo tha gũkĩra mũndũ ũngĩ o wothe ũrĩ gũũkũ thĩ.
20 No rĩu ũhoro ũrĩa wa ma nĩ atĩ Kristũ nĩariũkirio kuuma kũrĩ arĩa akuũ, agĩgĩtuĩka kĩonereria atĩ arĩa makomeete toro wa gĩkuũ nĩmakaariũkio.
21 Tondũ o ta ũrĩa gĩkuũ gĩokire thĩ nĩ ũndũ wa mũndũ ũmwe, noguo kũriũka kwa arĩa akuũ guokire nĩ ũndũ wa mũndũ ũmwe.
22 Ningĩ o ta ũrĩa andũ oothe makuaga thĩinĩ wa Adamu-rĩ, noguo oothe makaariũka thĩinĩ wa Kristũ.
23 Na o mũndũ akaariũka ihinda rĩake: Kristũ nĩ we wambĩrĩirie kũriũka, nao arĩa mamwĩtĩkĩĩtie nĩ o makaamba kũriũka mũthenya ũrĩa Kristũ agacooka.
24 Hĩndĩ ĩyo mũthia ũgĩkinye rĩrĩa Kristũ akaanengera Ngai, na nowe Ithe, ũthamaki, arĩĩkĩĩtie kũniina wathani ũngĩ wothe na ũhoti o na maahinya ma mĩthemba yothe.
25 Tondũ Kristũ no mũhaka athamake kinya Ngai ahoote thũ ciothe aciige rungu rwa makinya maake.
26 Thũ ya mũthia ĩrĩa ĩkaahootwo nĩ yo gĩkuũ.
27 Amu Maandĩko moigaga atĩrĩ, “Ngai nĩaigire indo ciothe rungu rwa makinya maake.” Hĩndĩ ĩrĩa kwerwo atĩ nĩaigire indo ciothe rungu rwa makinya maake nĩkuonania atĩ Ngai we mwene ndanyiitithanĩĩtio na indo ciothe tondũ nĩ we waciigire rungu rwa makinya maake.
28 Kwoguo hĩndĩ ĩrĩa indo ciothe igaakorwo irĩ rungu rwake, o naake Mũũriũ nĩakeeiga rungu rwa ũrĩa waigire indo icio ciothe rungu rwake; naake Ngai atuĩke maũndũ moothe kũrĩ andũ oothe.
29 Andũ arĩa mabatithagio handũinĩ ha andũ arĩa akuũ-rĩ, mabatithagio nĩkĩ angĩkorwo gũtirĩ mwĩhoko atĩ arĩa akuũ nĩmakaariũka?
30 O na ithuĩ eene-rĩ, nĩ kĩĩ gĩtũmaga tũikare ũgwatiinĩ hĩndĩ ciothe?
31 Aariũ na aarĩ a Ithe witũ, niĩ ngoragwo ndĩ ũgwatiinĩ wa gĩkuũ mũthenya o mũthenya! Gwĩtĩĩa kũrĩa ndĩtĩĩaga nĩ ũndũ wanyu mũtũũrĩreinĩ witũ thĩinĩ wa Kristũ Jesũ Mwathani witũ, nĩkuo kũrahotithia kuuga ũguo.
32 Korwo andũ nĩ o gĩtũmi gĩakwa gĩa kũrũa na nyamũ cia gĩthaka gũũkũ Efeso-rĩ, igai rĩakwa nĩ kĩĩ? No angĩkorwo arĩa akuũ matikaariũkio no tũgĩĩke o ta ũrĩa kwĩragwo atĩ, “Kĩrekeei tũrĩe na tũnyue tondũ rũũciũ nĩtũgaakua.”
33 Tigaai kũheenererio: “Mũceera na mũkũndũ akũndũkaga o taake.”
34 Tiganaai na meehia mũcookerere mĩtugo ĩrĩa mĩega. Nĩngũmwĩra ũndũ wa kũmũconora atĩ amwe aanyu matiũĩ Ngai.
Mwĩrĩ ũrĩa ũkaariũka
35 Mũndũ ahota kũũria atĩrĩ, “Andũ arĩa akuũ-rĩ, makaariũka atĩa? Makaariũka me na mwĩrĩ ũhaana atĩa?”
36 Wee ũkũũria ũguo kaĩ wĩ mũkĩĩgu atĩa? Mbegũ ĩrĩa ũhandaga-rĩ, nĩũkũmenya atĩ ndĩmeeraga ĩtaambĩĩte gũkua yo nyene?
37 Kĩrĩa wee ũhandaga nĩ mbegũ ya ngano kana mbegũ ĩngĩ ĩrĩ iiki, no ti mũmera ũrĩa ũcookaga gũkũra.
38 Naake Ngai nĩ we ũheaga mbegũ o yothe mwĩrĩ ũrĩa we atuĩte nĩekũmĩhe; aheaga o mbegũ o yothe mwĩrĩ ũrĩa ũmĩagĩrĩire.
39 Mĩĩrĩ ya ciũmbe ciothe iria irĩ muoyo ndĩhaanaine; ya andũ nĩ mwanya, ya nyamũ cia gĩthaka nĩ mwanya ya nyoni nĩ mwanya, na o na ya thamaki nayo nĩ mwanya.
40 O na ningĩ nĩkũrĩ indo iria ikoragwo matuinĩ na iria ikoragwo gũũkũ thĩ, na riiri wa iria ikoragwo igũrũ tiguo wa iria irĩ gũũkũ thĩ.
41 Riũa rĩ na riiri warĩo mwanya, mweri wĩ na riiri waguo, na njata o nacio i na riiri wacio. O na njata cio nyene itihaanaine tondũ riiri wa ĩmwe tiguo wa ĩrĩa ĩngĩ.
42 Ũguo noguo gũkaahaana hĩndĩ ĩrĩa akuũ makaariũkio. Hĩndĩ ĩrĩa mwĩrĩ wathikwo ũkoragwo ũrĩ wa kũbutha, no ũkaariũka ũtarĩ wa kũbutha.
43 Ningĩ hĩndĩ ĩrĩa mwĩrĩ ũgũthikwo ũkoragwo ũrĩ mũcong’i na ũtarĩ na hinya, no hĩndĩ ĩrĩa ũkaariũkio ũgaakorwo wĩ mũthaka na wĩ na hinya.
44 Atĩrĩĩrĩ, mwĩrĩ ũyũ wa kĩndũire nĩguo ũthikagwo, no ũkĩriũkio ũkaariũka wĩ mwĩrĩ wa kĩĩroho. Angĩkorwo mwĩrĩ ũyũ wa kĩndũire wĩ kuo-rĩ, o naguo mwĩrĩ wa kĩĩroho wĩ kuo.
45 Tondũ Maandĩko moigaga atĩrĩ, “Mũndũ wa mbere kũũmbwo, na nĩ we Adamu, nĩatuĩkire mũndũ wĩ muoyo,” no Adamu wa kũrigĩrĩria nĩ Roho ũrĩa ũheanaga muoyo.
46 Mwĩrĩ ũcio wa kĩĩroho tiguo ũgĩaga mbere no nĩ ũrĩa wa ndũire, na thuutha waguo gũgooka ũcio wa kĩĩroho.
47 Mũndũ wa mbere oimire tĩĩriinĩ na nĩ rũkũngũ, no mũndũ wa keerĩ oimire igũrũ.
48 Kwoguo andũ arĩa marũmagĩrĩra maũndũ ma gũũkũ thĩ mahaanaine na mũndũ ũcio woimire na tĩĩriinĩ, nao arĩa marũmagĩrĩra maũndũ ma igũrũ, mahaanaine na ũcio woimire na igũrũ.
49 Ningĩ o ta ũrĩa tũhaanaine na mũndũ ũcio woimire tĩĩriinĩ-rĩ, noguo tũkaahaanana na ũcio woimire igũrũ.
50 Ndĩrenda kuuga atĩrĩĩrĩ aariũ na aarĩ a Ithe witũ, mwĩrĩ na thakame itingĩhota kũgaya Ũthamaki wa Ngai. Ningĩ kĩndũ kĩbuthaga gĩtingĩhota kũgaya kĩrĩa gĩtabuthaga.
51 Atĩrĩĩrĩ, nĩngũmũhithũrĩria hitho ndĩmwĩre atĩrĩ: ithuothe tũtigaakua, no nĩkũgarũrwo tũkaagarũrwo ithuothe ũrĩa tũhaana
52 o ihinda iniini ta kũbucia kwa riitho rĩrĩa karumbeeta ka mũthia gakaahuuhwo. Nĩ ũndũ karumbeeta nĩgakaahuuhwo, nao andũ arĩa akuũ mariũkio matarĩ a gũcooka kũbutha, na ithuĩ tũgarũrwo ũrĩa tũhaana.
53 Amu kĩrĩa gĩkuaga no mũhaka kĩgarũrwo gĩtuĩke kĩndũ gĩtangĩkua; nakĩo kĩrĩa kĩbuthaga kĩgarũrwo gĩtuĩke kĩndũ gĩtangĩbutha.
54 Atĩrĩĩrĩ, hĩndĩ ĩrĩa kĩrĩa kĩbuthaga gĩgaatuĩka kĩrĩa gĩtangĩbutha, na kĩrĩa gĩkuaga gĩtuĩke kĩrĩa gĩtangĩkua-rĩ, hĩndĩ ĩyo ũrĩa kwandĩkĩĩtwo Maandĩkoinĩ nĩũkaahinga. Tondũ kwandĩkĩĩtwo atĩrĩ:
“Gĩkuũ nĩkĩniinĩĩtwo, ũhootani nĩũrĩĩkĩĩtie kwoneka!”
55 “Wee Gĩkuũ-rĩ, ũhootani waku ũkĩrĩ kũ?
Wee Gĩkuũ-rĩ, hinya waku wa kũũnũha ũkĩrĩ ha?”
56 Meehia nĩ mo maheaga gĩkuũ hinya wa kũũnũha, na meehia namo maheagwo hinya nĩ Watho.
57 Kĩrekeei tũcookagĩrie Ngai ngaatho tondũ nĩwe ũtũheaga ũhootani ahũthĩrĩĩte Mwathani witũ Jesũ Kristũ.
58 Kwoguo aariũ na aarĩ a Ithe witũ, o inyuĩ nyendeete mũno, ikaragaai mũũmĩrĩirie na mũtekwenyenyeka. Rutagaai wĩra wa Mwathani hĩndĩ ciothe, ondũ nĩmũũĩ atĩ gũtirĩ wĩra o na ũmwe mũrutaga thĩinĩ wa Mwathani wĩ wa tũhũ.